ໃນວັນທີ 23 ພຶດສະພາ 2016, ທີ່ ກະຊວງການຕ່າງປະເທດ, ໄດ້ມີການແລກປ່ຽນໜັງສືທາງການທູດ ລະຫວ່າງ ກະຊວງການຕ່າງປະເທດ ແລະ ສະຖານທູດຍີ່ປຸ່ນ ປະຈຳ ສປປ ລາວ ເພື່ອຈັດຕັ້ງປະຕິບັດ ສັນຍາຂົນສົ່ງທາງອາກາດ (Air Service Agreement) ລະຫວ່າງ ສປປ ລາວ- ແລະ ຍີ່ປຸ່ນ. ຕາງໜ້າໃຫ້ລັດຖະບານລາວແມ່ນ ທ່ານ ວິໂຣດ ສຸນດາຣາ, ຫົວໜ້າກົມອາຊີ-ປາຊີຟິກ ແລະ ອາຟຣິກາ, ກະຊວງການຕ່າງປະເທດ ແລະ ຕາງໜ້າລັດຖະບານຍີ່ປຸ່ນ ແມ່ນ ທ່ານ ຣຽວທາໂຣະ ຊູຊູກິ, ອຸປະທຸດຊົ່ວຄາວຍີ່ປຸ່ນ ປະຈຳ ສປປ ລາວ ເພື່ອແລກປ່ຽນໜັງສືດັ່ງກ່າວ.
ໃນເດືອນມັງກອນ 2015 ຜ່ານມາ, ໄດ້ມີການລົງນາມສັນຍາຂົນສົ່ງທາງອາກາດ ສະບັບດັ່ງກ່າວ, ເພື່ອສະເຫລີມສະຫລອງ ວັນສ້າງຕັ້ງສາຍພົວພັນການທູດ ລາວ-ຍີ່ປຸ່ນ ຄົບຮອບ 60 ປີ ຮ່ວມກັນ. ການແລກປ່ຽນໜັງສື ທາງການທູດຄັ້ງນີ້, ເພື່ອເຮັດໃຫ້ສອງຝ່າຍສາມາດຈັດຕັ້ງປະຕິບັດບັນດາບັນຍັດ ໃນສັນຍາດັ່ງກ່າວ ແລະ ເປັນການຊຸກຍູ້ການຮ່ວມມືທາງດ້ານການຂົນສົ່ງທາງອາກາດ ລະຫວ່າງ ສປປ ລາວ ແລະ ຍີ່ປຸ່ນ ໃນການແລກປ່ຽນການໄປມາຫາສູ່ກັນ ລະຫວ່າງປະຊາຊົນສອງຊາດ, ໂດຍສະເພາະການພັດທະນາ ການທ່ອງທ່ຽວ ແລະ ການລົງທຶນ ລະຫວ່າງສອງປະເທດ ໃຫ້ນັບມື້ນັບຂະຫຍາຍຕົວ ໃນຊຸມປີຕໍ່ໜ້າ.