ໃນວັນທີ 6 ມິຖຸນາ 2016, ທີ່ ສຳນັກງານໃຫຍ່ຂອງອົງການເກືອດຫ້າມສານອາວຸດເຄມີ OPCW, ນະຄອນລາຮາຍ, ປະເທດ ໂຮນລັງ, ທ່ານ ຄຳເຄື່ອງ ບຸນເຕີມ, ເອກອັກຄະລັດຖະທູດ ແຫ່ງ ສປປ ລາວ ປະຈຳ ບຣຸກແຊນ, ປະເທດ ແບນຊິກ, ໄດ້ເຂົ້າຍື່ນສານແຕ່ງຕັ້ງຕໍ່ ທ່ານ Ahmet Uzumcu, ຫົວໜ້າກົມ ອົງການເກືອດຫ້າມສານອາວຸດເຄມີ ເພື່ອດຳລົງຕຳແໜ່ງເປັນຜູ້ຕາງໜ້າຖາວອນ ແຫ່ງ ສປປ ລາວ ປະຈຳ ອົງການເກືອດຫ້າມສານອາວຸດເຄມີ.
ໃນໂອກາດດັ່ງກ່າວ ທ່ານເອກອັກຄະລັດຖະທູດ ຄຳເຄື່ອງ ບຸນເຕີມ ໄດ້ສະແດງຄວາມຂອບໃຈຕໍ່ ທ່ານ Ahmet Uzumcu ກໍ່ຄື ອົງການ OPCW ທີ່ໄດ້ໃຫ້ການຮ່ວມມືຊ່ວຍເຫຼືອແກ່ ສປປ ລາວ ໃນດ້ານວິຊາການ ແລະ ທຶນຮອນ ເຮັດໃຫ້ເຈົ້າໜ້າທີ່ກ່ຽວຂ້ອງຂອງ ສປປ ລາວ ໄດ້ມີໂອກາດເຂົ້າຮ່ວມເຄື່ອນໄຫວໃນວຽກງານຕ່າງໆຂອງອົງການ OPCW ຢ່າງເປັນປົກກະຕິ. ປັດຈຸບັນນີ້ ສປປ ລາວ ຍັງປະສົບກັບສິ່ງທ້າທາຍຕ່າງໆ ເປັນຕົ້ນ ດ້ານການສຶກສາ, ການພັດທະນາຊັບພະຍາກອນມະນຸດ ເພື່ອຍົກລະດັບຄວາມຮັບຮູ້ ກ່ຽວກັບ ສານເຄມີຕ່າງໆ. ສປປ ລາວ ໃນຖານະເປັນປະທານອາຊຽນ ປີ 2016 ນີ້ ຈະໄດ້ມີການປຶກສາຫາລືຫຼາຍຢ່າງ ກ່ຽວກັບ ການຮ່ວມມືດ້ານການສຶກສາ ລວມທັງການປັບປຸງຫຼັກສູດການສິດສອນວິຊາເຄມີ ແລະ ພ້ອມແລ້ວທີ່ຈະປະຕິບັດພັນທະຂອງຕົນຕໍ່ວຽກງານຂອງອົງການ OPCW ຮ່ວມກັນກັບ ບັນດາປະເທດອາຊຽນອື່ນໆ. ລັດຖະບານ ແຫ່ງ ສປປ ລາວ ໄດ້ຕີລາຄາສູງຕໍ່ພາລະກິດອັນສູງສົ່ງຂອງອົງການ OPCW ທີ່ສາມາດປະຕິບັດໜ້າທີ່ວຽກງານໄດ້ດີ ແລະ ເປັນທີ່ຍອມຮັບຂອງສາກົນ, ຊຶ່ງໄດ້ສະແດງອອກໃນການໄດ້ຮັບລາງວັນໂນແບນ ສາຂາສັນຕິພາບ ປະຈຳປີ 2013.
ໃນໂອກາດດັ່ງກ່າວ, ທ່ານ Ahmet Uzumcu ກໍ່ໄດ້ແຈ້ງໃຫ້ຊາບວ່າ ໃນກອງປະຊຸມປະຈຳປີຂອງລັດພາຄີ ປີ 2015 ຜ່ານມາ, ໄດ້ຮັບຮອງເອົາໂຄງການ The Education and Outreach, ຊຶ່ງກໍາລັງມີການຈັດຕັ້ງໜ່ວຍງານສະເພາະຢູ່ OPCW ແລະ ຈະດໍາເນີນການໃຫ້ປະເທດພາຄີມີສ່ວນຮ່ວມສະເໜີໂຄງການຈັດຕັ້ງປະຕິບັດການສິດສອນ ໃນສະຖາບັນການສຶກສາຕ່າງໆຂອງປະເທດພາຄີ ແລະ ກິດຈະກຳອື່ນໆ ເພື່ອຄວາມປອດໄພຂອງສານເຄມີຕ່າງໆ.