ຊົມເຊີຍຜົນສໍາເລັດກອງປະຊຸມໃຫຍ່ ຄັ້ງທີ X ຂອງພັກ ຢ່າງສຸດໃຈ ! ພັກປະຊາຊົນ ປະຕິວັດລາວ ທີ່ມີກຽດສະຫງ່າໝັ້ນຍືນ ! ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃຫ້ປະກົດຜົນເປັນຈິງ ! ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ
a
ເຊື່ອມຕໍ່ເວັບໄຊພາຍໃນລາວ
Links
Lao Government
Law Project
UN
Lao PDR Trade Portal

ທຸດລາວຍື່ນສານຕາຕັ້ງຕໍ່ເລຂາທິການແຫ່ງລັດຂອງ ສ.ກາຊັກສະຖານ

em-kazakhstan

    ໃນຕອນແລງຂອງວັນທີ 7/08/2017, ເວລາ 16.00 ໂມງຕາມເວລາທ້ອງຖິ່ນ, ທີ່ທໍານຽບປະທານາທິບໍດີ ໃນນະຄອນຫລວງອາຊະຕານາ, ທ່ານ ສີວຽງເພັດ ເພັດວໍຣະສັກ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສະຫະພັນລັດເຊຍ ໄດ້ຍື່ນສານຕາຕັ້ງ ຕໍ່ພະນະທ່ານນາງ ກູນຊາຣາ ອັບດີກາລີໂກວາ, ເລຂາທິການແຫ່ງລັດ ຂອງສາທາລະນະລັດກາຊັກສະຖານ ເພື່ອດໍາລົງຕໍາແຫ່ນງເປັນເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ຄົນໃຫມ່ ປະຈໍາ ສ.ກາຊັກສະຖານ ໂດຍມີສໍານັກງານຕັ້ງຢູ່ນະຄອນຫລວງມົດສະກູ, ສ.ລັດເຊຍ.

 ໃນໂອກາດເຂົ້າຍື່ນສານຕາຕັ້ງ ໃນຄັ້ງນີ້, ກ່ອນອື່ນຫມົດ ທູດເຮົາ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ, ພ້ອມທັງໄດ້ສົ່ງຄໍາຢື້ຢາມຈາກ ພະນະທ່ານ ບຸນຍັງ ວໍຣະຈິດ, ປະທານປະເທດ ແຫ່ງ ສປປລາວ ໄປຍັງ ພະນະທ່ານ ນູຣຊູນຕານ ແອບິດຊູລີ ນາຊາຣບາແຢບ, ປະທານາທິບໍດີກາຊັກສະຖານ.

  ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອລະຫວ່າງ ກາຊັກສະຖານ ແລະ ສປປ ລາວ ໃນໄລຍະຜ່ານມາ. ທຸດເຮົາໄດ້ທົບທວນຄືນມູນເຊື້ອຂອງການພົວພັນ ແລະ ຮ່ວມມື ລະຫວ່າງ ສອງປະເທດ ໃນສະໄຫມອະດິດສະຫະພາບໂຊຫວຽດ, ທູດລາວໄດ້ຕາງຫນ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ແລະ ຮູ້ບຸນຄຸນ ລັດຖະບານ ແລະ ປະຊາຊົນ ກາຊັກສະຖານທີ່ໃຫ້ການສະຫນັບສະຫນູນຊ່ວຍເຫລືອລາວເຮົາ ໃນສະໄຫມຕໍ່ສູ້ ຂອງປະຊາຊົນລາວ ເພື່ອຄວາມເປັນເອກະລາດແຫ່ງຊາດ ແລະ ໃນໄລຍະສ້າງສາພັດທະນາປະເທດຊາດ ໃນປັດຈຸບັນ, ໂດຍສະເພາະການຊວຍເຫລືອ ຂອງລັດຖະບານ ແລະ ປະຊາຊົນກາຊັກສະຖານໃນການສ້າງຊັບພະຍາກອນມະນຸດໃຫ້ແກ່ລາວເຮົາ ໃນໄລຍະຜ່ານມາ. ນອກຈາກນີ້, ທູດເຮົາຍັງໄດ້ແຈ້ງໃຫ້ຝ່າຍເຈົ້າພາບຊາບ ກ່ຽວກັບຜົນສໍາເລັດຂອງການປົກປັກຮັກສາ ແລະ ສ້າງສາພັດທະນາປະເທດຊາດຂອງຕົນ, ໃນນັ້ນໄດ້ຍົກໃຫ້ເຫັນ ແຜນພັດທະນາເສດຖະກິດ-ສັງຄົມແຫ່ງຊາດ 5ປີຄັ້ງທີ 8, ແນໃສ່ສູ້ຊົນນໍາເອົາປະເທດຊາດໃຫ້ຫລຸດພົ້ນອອກຈາກປະເທດດ້ອຍພັດທະນາ ໃນປີ 2020.

 ທູດເຮົາຍັງໄດ້ກ່າວວ່າ ຕົນເອງຈະສືບຕໍ່ອອກແຮງຊຸກຍູ້ສົ່ງເສີມ ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງ ສອງປະເທດໃຫ້ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ແລະ ທັງຖືເອົາໂອກາດນີ້ສະເຫນີໃຫ້ທາງການກາຊັກສະຖານ ຊ່ວຍລະດົມ ແລະ ຊຸກຍູ້ນັກທຸລະກິດຈາກພາກລັດ ແລະ ພາກເອກະຊົນຂອງປະເທດເພິ່ນ ເຂົ້າໄປລົງທືນຢູ່ ສປປ ລາວ ໃນຂົງເຂດຕ່າງໆທີ່ສອງປະເທດມີຄວາມສົນໃຈນໍາກັນ.

 ຕອນທ້າຍ, ທູດເຮົາໄດ້ສະແດງຄວາມຂອບໃຈ ເຈົ້າພາບ ຕໍ່ການຕ້ອນຮັບອັນອົບອຸ່ນ ແລະ ທັງອໍານວຍຄວາມສະດວກທຸກຢ່າງອັນໄດ້ເຮັດໃຫ້ການເຂົ້າຍື່ນສານຂອງທູດເຮົາປະສົບຜົນສໍາເລັດເປັນຢ່າງດີ, ພ້ອມທັງອວຍພອນໃຫ້ທ່ານເລຂາທິການແຫ່ງລັດ ຂອງສາທາລະນະລັດ ກາຊັກສະຖານ ມີສຸກຂະພາບເຂັ້ມແຂງ, ປະສົບຜົນສໍາເລັດໃນຫນ້າທີ່ອັນມີກຽດອັນສູງສົ່ງຂອງຕົນ ແລະ ອວຍພອນໃຫ້ປະຊາຊົນກາຊັກສະຖານຈົ່ງມີແຕ່ຄວາມວັດທະນາຖາວອນ.

ບັນຍາກາດຂອງການພົບປະ ແມ່ນເຕັມໄປດ້ວຍໄມຕີຈິດມິດຕະພາບ, ຄວາມເຂົ້າອົກເຂົ້າໃຈຊຶ່ງກັນ ແລະ ກັນ ແຕ່ຕົ້ນຕະຫລອດປາຍ ໃນໂອກາດຍື່ນສານຕາຕັ້ງຂອງທູດເຮົາ ທີ່ທໍານຽບປະທານາທິບໍດີກາຊັກສະຖານໃນຄັ້ງນີ້.