ໃນວັນທີ 06 ມີຖຸນາ 2020, ໜ່ວຍພັກສະຖານກົງສຸນໃຫຍ່ ແຫ່ງ ສປປ ລາວ ທີ່ ນະຄອນຄຸນມິງ ສປ ຈີນ ໄດ້ເປີດກອງປະຊຸມໃຫຍ່ ຄັ້ງທີ II ຂອງຕົນຂື້ນຢ່າງເປັນທາງການ, ໂດຍການເປັນປະທານຂອງ ສະຫາຍ ຄຳພອນ ວົງສັນຕິ, ເລຂາໜ່ວຍພັກ. ເປັນກຽດເຂົ້າຮ່ວມມີ ສະຫາຍ ນ. ຄຳເພົາ ເອີນທະວັນ, ຄະນະປະຈຳພັກກະຊວງການຕ່າງປະເທດ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສປ ຈີນ ທີ່ ນະຄອນຫຼວງປັກກິ່ງ, ມີສະມາຊິກພັກສະຖານກົງໃຫຍ່ ແລະ ແຂກຖືກເຊີນເຂົ້າຮ່ວມທັງໝົດ 14 ສະຫາຍ.
ໃນກອງປະຊຸມ ສະຫາຍ ຄຳພອນ ວົງສັນຕິ, ເລຂາໜ່ວຍພັກ ໄດ້ຂື້ນຜ່ານບົດລາຍງານການເມືອງໂດຍໄດ້ຕີລາຄາຄືນຕໍ່ຜົນງານໃນຫຼາຍດ້ານທີໜ່ວຍພັກຍາດມາໄດ້ໃນໄລຍະຜ່ານມາ (2015 - 2020) ແລະ ໄດ້ສະເໜີທິດທາງແຜນການຈຸດສຸມທີ່ຈະໄດ້ປະຕິບັດໃນຕໍ່ໜ້າໃຫ້ໄດ້ຮັບປະສິດທິຜົນດີຂື້ນ. ພ້ອມນີ້ ກອງປະຊຸມຍັງໄດ້ມີການປ່ອນບັດຄັດເລືອກເອົາຄະນະພັກຊຸດໃໝ່ (2020 - 2025) ຈໍານວນ 03 ສະຫາຍ, ປະກອບດ້ວຍ ສະຫາຍ ຄຳພອນ ວົງສັນຕິ, ເປັນເລຂາໜ່ວຍພັກ, ສະຫາຍ ນ. ມະນີສຸກ ຈ່ຽມສີສຸລາດ, ເປັນຮອງເລຂາໜ່ວຍພັກ, ສະຫາຍ ນ. ສຸດາ ມິ່ງສີສຸພັນ, ເປັນກຳມະການໜ່ວຍພັກ ເພື່ອສືບຕໍ່ນຳພາໜວ່ຍພັກໃຫ້ມີຄວາມເຕີບໃຫ່ຍເຂັ້ມແຂງກ່ວາເກົ່າ.
ກອງປະຊຸມໄດ້ຮັບຟັງການໂອ້ລົມຂອງ ສະຫາຍ ຄຳເພົາ ເອີນທະວັນ, ຄະນະປະຈຳພັກ ກະຊວງການຕ່າງປະເທດ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສປຈີນ, ຊຶ່ງໄດ້ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມໃຫ່ຍ ໜ່ວຍພັກ ແລະ ໃຫ້ການຊີ້ນຳແກ່ຄະນະໜ່ວຍພັກຊຸດໃໝ່ຈົ່ງເອົາໃຈໃສ່ເສີມຂະຫຍາຍຈຸດດີ ແລະ ແກ້ໄຂຂໍ້ຄົງຄ້າງຕ່າງໆ ເພື່ອສືບຕໍ່ນຳພາໜ່ວຍພັກຂອງຕົນໃຫ້ນັບມື້ເຂັ້ມແຂງ, ອັນເປັນການປະກອບສ່ວນໃຫ້ການເຄື່ອນໄຫວວຽກງານລວມ ຂອງ ຂະ
ແໜງການຕ່າງປະເທດໃຫ້ນັບມື້ມີຜົນສຳເລັດຍີ່ງໆຂື້ນ ແລະ ຖືໂອກາດນີ້ຮຽກຮ້ອງມາຍັງສະມາຊິກພັກ ພະນັກງານທຸກ ສະຫາຍ ຈົ່ງສືບຕໍ່ເປັນແບບຢ່າງໃນທຸກຂະບວນການເພື່ອສ້າງຜົນງານຕ້ອນຮັບກອງປະຊຸມໃຫ່ຍ ຂອງ ອົງຄະນະພັກ ກະຊວງການຕ່າງປະເທດ ກໍ່ຄືກອງປະຊຸມໃຫ່ຍຂອງ ພັກປະຊາຊົນປະຕິວັດລາວໃນຕໍ່ໜ້າ.