ໃນຕອນເຊົ້າຂອງວັນທີ 13 ມິຖຸນາ 2023, ສະຖາບັນການຕ່າງປະເທດ ໄດ້ເປັນເຈົ້າພາບຈັດກອງປະຊຸມໜ່ວຍງານວິຊາການ ພາຍໃຕ້ເຄືອຂ່າຍຄັງປັນຍາອາຊີຕາເວັນອອກ (NEAT), ໃນຫົວຂໍ້: ຂໍ້ລິເລີ່ມ“ໜຶ່ງແລວ, ໜຶ່ງເສັ້ນທາງ” : ການເປັນຄູ່ຮ່ວມເພື່ອສົ່ງເສີມການເຊື່ອມຈອດພາກພື້ນ (Belt and Road Initiative: Partnership for Enhancing Regional Connectivity) ໂດຍການເປັນປະທານກ່າວເປີດກອງປະຊຸມຂອງ ທ່ານທູດ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ, ເຊິ່ງມີຜູ້ເຂົ້າຮ່ວມຈາກສະຖາບັນການຕ່າງປະເທດ; ຜູ້ຕາງໜ້າຈາກກະຊວງໂຍທາທິການ ແລະ ຂົນສົ່ງ; ນັກຄົ້ນຄວ້າຈາກບັນດາເຄືອຂ່າຍຄັງປັນຍາອາຊີຕາເວັນອອກ (NEAT) ອາຊຽນ+3 ເຂົ້າຮ່ວມລວມທັງໝົດ 20 ທ່ານ.

ກອງປະຊຸມດັ່ງກ່າວ, ໄດ້ດຳເນີນໄປເປັນເວລາເຄິ່ງວັນໃນຮູບແບບກອງປະຊູມທາງໄກ (Zoom Platform). ຈຸດປະສົງຂອງກອງປະຊຸມຄັ້ງນີ້ແມ່ນເພື່ອຮັບຟັງຄໍາຄິດຄໍາເຫັນ ແລະ ແລກປ່ຽນບົດຮຽນ ຂອງແຕ່ລະປະເທດ ໃນຂອບຂອງອາຊຽນ+3 ກ່ຽວກັບການຈັດຕັ້ງປະຕິບັດຂໍ້ລິເລີ່ມ “ໜຶ່ງແລວ, ໜຶ່ງເສັ້ນທາງ” ຜົນສຳເລັດໃນການຈັດຕັ້ງປະຕິບັດຜ່ານມາ ໂດຍສະເພາະຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ສະເໜີແນະເພື່ອສົ່ງເສີມການເຊື່ອມໂຍງ ແລະ ເຊື່ອມຈອດພາກພື້ນ.

ໃນໂອກາດນີ້, ທ່ານທູດ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ ໄດ້ຊີ້ໃຫ້ເຫັນຜົນສໍາເລັດຂອງການຮ່ວມມືໃນຂອບຂໍ້ລິເລີ່ມ“ໜຶ່ງແລວ, ໜຶ່ງເສັ້ນທາງ” ທີ່ຍົກຂຶ້ນໂດຍທ່ານ ປະທານ ສີ ຈິ້ນຜິງ ໃນປີ 2013, ເຊີ່ງໃນໄລຍະ 10 ປີຜ່ານມາຂໍ້ລິເລີ່ມດັ່ງກ່າວ ໄດ້ປະກອບສ່ວນອັນສໍາຄັນເຂົ້າໃນການປັບປຸງພື້ນຖານໂຄງລ່າງ, ສ້າງວຽກເຮັດງານທໍາ, ສົ່ງເສີມການເຊື່ອມໂຍງ ແລະ ເຊື່ອມຈອດໃນພາກພື້ນ ແລະ ສາກົນ, ເຮັດໃຫ້ການໄປມາຫາສູ່ກັນຂອງປະຊາຊົນ ແລະ ການຂົນສົ່ງສິນຄ້າມີຄວາມສະດວກສະບາຍ ແລະ ວ່ອງໄວຫລາຍຂຶ້ນ, ສຳລັບ ສປປ ລາວ ແມ່ນໜຶ່ງໃນບັນດາປະເທດທີ່ໃຫ້ການສະໜັບສະໜູນຂໍ້ລິເລີ່ມດັ່ງກ່າວຕັ້ງແຕ່ຫົວທີ, ເສັ້ນທາງລົດໄຟລາວ-ຈີນແມ່ນໂຄງການທີ່ມີລັກສະນະປະຫວັດສາດ ແລະ ຍຸດທະສາດ ທີ່ເກີດຂຶ້ນພາຍໃຕ້ຂໍ້ລິເລີ່ມ“ໜຶ່ງແລວ, ໜຶ່ງເສັ້ນທາງ” ໄດ້ເຮັດໃຫ້ ສປປ ລາວ ຫັນປ່ຽນຈາກປະເທດທີ່ບໍ່ມີຊາຍແດນຕິດຈອດກັບທະເລ, ກາຍເປັນປະເທດເຊື່ອມຈອດພາກພື້ນ ແລະ ສາກົນ.

ກອງປະຊຸມໃນຄັ້ງນີ້ ປະກອບດ້ວຍ 02 ວາລະໂດຍທ່ານຫົວໜ້າສະຖາບັນການຕ່າງປະເທດ ແລະ ຮອງຫົວໜ້າສະຖາບັນການຕ່າງປະເທດ ໄດ້ຜັດປ່ຽນກັນເປັນຜູ້ນໍາພາກອງປະຊຸມ, ເຊິ່ງມີຜູ້ຕາງໜ້າຈາກເຄືອຂ່າຍຄັງປັນຍາອາຊີຕາເວັນອອກ (NEAT) ອາຊຽນ+3 ເປັນຕົ້ນແມ່ນ ສປ ຈີນ, ຍີ່ປຸ່ນ, ສ.ເກົາຫຼີ, ສິງກະໂປ, ອິນໂດເນເຊຍ, ຟີລິບປິນ, ໄທ, ຫວຽດນາມ, ກໍາປູເຈຍ, ມຽນມາ ແລະ ສປປ ລາວ ຜັດປ່ຽນກັນນໍາສະເໜີບົດ, ສຳລັບ ສປປ ລາວ ແມ່ນ ທ່ານ ເພັດທັນວາ ລາດຊະວົງ, ຜູ້ຕາງໜ້າຈາກ ກະຊວງໂຍທາທິການ ແລະ ຂົນສົ່ງ ເປັນຜູ້ນສະເໜີບົດ. ຜູ້ນໍາສະເໜີບົດໄດ້ຍົກໃຫ້ເຫັນບົດຮຽນໃນການຈັດຕັ້ງປະຕິບັດ ຂໍ້ລິເລີ່ມ“ໜຶ່ງແລວ, ໜຶ່ງເສັ້ນທາງ” ໂດຍສະເພາະຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ສະເໜີແນະ, ສ່ວນໃຫຍ່ແມ່ນໄດ້ຕີລາຄາສູງຕໍ່ຜົນສຳເລັດຂອງການຈັດຕັ້ງປະຕິບັດຂໍ້ລິເລີ່ມ“ໜຶ່ງແລວ, ໜຶ່ງເສັ້ນທາງ”ທີ່ຍາດມາໄດ້ໃນໄລຍະ 10 ປີຜ່ານມາ, ເຊິ່ງໄດ້ປະກອບສ່ວນສໍາຄັນໃນການປັບປຸງພື້ນຖານໂຄງລ່າງຂອງບັນດາປະເທດໃນແລວທາງດັ່ງກ່າວ, ເຮັດໃຫ້ການໄປມາຫາສູ່ກັນ ແລະ ການຂົນສົ່ງສິນຄ້າຂອງບັນດາປະເທດໃນພາກພື້ນມີຄວາມສະດວກວ່ອງໄວ ເຊີ່ງຈະກາຍເປັນປັດໃຈອັນສໍາຄັນໃນການດຶງດູດການລົງທຶນຈາກພາຍນອກ, ເຖິງຢ່າງໃດກໍຕາມການປະຕິບັດຂໍ້ລິເລີ່ມ“ໜຶ່ງແລວ, ໜຶ່ງເສັ້ນທາງ”ຢູ່ບາງປະເທດຍັງພົບຄວາມຫຍຸ້ງຍາກຍ້ອນປັດໃຈພາຍໃນ ແລະ ສະພາບການພາຍນອກ ທີ່ສືບຕໍ່ຜັນແປໄປຢ່າງສັບສົນ.

ໃນຕອນທ້າຍຂອງກອງປະຊຸມ, ທ່ານ ນ. ວິທະຍາ ໄຊຍະວົງ, ຮອງຫົວໜ້າສະຖາບັນການຕ່າງປະເທດ, ໄດ້ສະແດງຄວາມຂອບໃຈຜູ້ຕາງໜ້າຈາກບັນດາເຄືອຂ່າຍຄັງປັນຍາອາຊີຕາເວັນອອກ (NEAT) ອາຊຽນ+3 ທີ່ໄດ້ສະຫລະເວລາເຂົ້າຮ່ວມ ແລະ ນໍາສະເໜີບົດທີ່ມີເນື້ອໃນເລີກເຊີ່ງ ໃນການແລກປ່ຽນຄຳຄິດຄຳເຫັນ ແລະ ຂໍ້ສະເໜີແນະທີ່ເປັນປະໂຫຍດ ເຊິ່ງຈະເປັນຂໍ້ມູນທີ່ສຳຄັນໃນການສົ່ງເສີມການຈັດຕັ້ງປະຕິບັດ ຂໍ້ລິເລີ່ມ“ໜຶ່ງແລວ, ໜຶ່ງເສັ້ນທາງ” ໃນຕໍ່ໜ້າ ເພື່ອໃຫ້ໄດ້ຮັບໝາກຜົນອັນໃຫມ່ທີ່ໃຫຍ່ຫລວງກວ່າເກົ່າ.