ສະຖານກົງສຸນໃຫ່ຍ ສປປລາວ ທີ່ ນະຄອນດານັງ  ໄດ້ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ຂຶ້ນ ໃນວັນທີ 04 ກໍລະກົດ 2023 ຜ່ານມາ, ພາຍໃຕ້ການເປັນປະທານ  ແລະ ມອບໃບຢັ້ງຢືນຂອງ ສະຫາຍ ແສງເພັດ  ຮຸ່ງບຸນຍວງ, ເລຂາຄະນະພັກຮາກຖານສະຖານເອກອັກຄະລັດຖະທູດ ສປປລາວ ປະຈຳ ຮ່າໂນ້ຍ ສສ ຫວຽດນາມ, ເອກອັກຄະລັດຖະທູດ ສປປລາວ ປະຈຳ ສສ ຫວຽດນາມ,  ມີສະຫາຍ ສຸພັນ ຫາດາວເຮືອງ,  ກຳມະການຄະນະພັກຮາກຖານສະຖານເອກອັກຄະລັດຖະທູດ ສປປລາວ ປະຈຳ ຮ່າໂນ້ຍ, ເລຂາໜ່ວຍພັກ, ກົງສຸນໃຫ່ຍ ສປປລາວ ທີ່ ນະຄອນດານັງ,ມີຄະນະໜ່ວຍພັກ, ຄະນະຈຸພັກນັກສຶກສາລາວ, ບັນດາສະມາຊິກພັກ, ຕາງໜ້າອົງການຈັດຕັ້ງມະຫາຊົນ,ແມ່ຍິງ,ຊາວໜຸ່ມ,ກຳມະບານເຂົ້າຮ່ວມຢ່າງພ້ອມພຽງ.

ໃນພິທີ, ສະຫາຍ ສຸພັນ ຫາດາວເຮືອງ, ເລຂາໜ່ວຍພັກ, ກົງສຸນໃຫ່ຍ  ໄດ້ຜ່ານບົດສະຫຼຸບຕີລາຄາການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ແລະ ທິດທາງແຜນການປີ 2023 ໂດຍໄດ້ຍົກໃຫ້ເຫັນຄວາມພະຍາຍາມ ແລະ ຄວາມເອົາໃຈໃສ່ນໍາພາ-ຊີ້ນຳຂອງຄະນະໜ່ວຍພັກ-ຄະນະນຳສະຖານກົງສຸນໃຫ່ຍ ໃນການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມ ແຂງ, ໜັກແໜ້ນ ຂອງຄະນະໜ່ວຍພັກ ໂດຍສະເພາະແມ່ນໄດ້ເອົາໃຈໃສ່ຕໍ່ການສຶກສາອົບຮົມດ້ານການເມືອງ-ນຳພາແນວຄິດ ອັນເຮັດໃຫ້ສະມາຊິກພັກ, ພະນັກງານມີຄຸນທາດການເມືອງ, ຄຸນສົມບັດສິນທຳປະຕິວັດ, ຢຶດໝັ້ນຕໍ່ອຸດົມການຂອງພັກ, ມີລະບຽບວິໄນ, ເຄົາລົບນັບຖືການຈັດຕັ້ງ ແລະ ມີຄວາມຫ້າວຫັນໃນການປະຕິບັດໜ້າທີ່ວຽກງານທີ່ໄດ້ຮັບມອບໝາຍ. ພ້ອມນີ້, ຍັງໄດ້ຍົກໃຫ້ເຫັນດ້ານອ່ອນ-ຂໍ້ຄົງຄ້າງທີ່ໜ່ວຍພັກຈະຕ້ອງໄດ້ສືບຕໍ່ແກ້ໄຂ ເພື່ອເຮັດໃຫ້ການປະຕິບັດແຜນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023 ກໍຄື ການເຄື່ອນໄຫວນໍາພາ-ຊີ້ນຳວຽກງານຕ່າງໆຂອງສະຖານກົງສຸນໃຫ່ຍສປປລາວ ທີ່ ນະຄອນດານນັງ ສສ ຫວຽດນາມ ມີການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ.

ໃນໂອກາດນີ້, ສະຫາຍແສງເພັດ ຮຸ່ງບຸນຍວງ ໄດ້ຍ້ອງຍໍຊົມເຊີຍຕໍ່ຄະນະໜ່ວຍພັກ,ຄະນະຈຸພັກ ແລະ ບັນດາສະມາຊິກພັກ ທີ່ມີຄວາມບຸກບືນຫ້າວຫັນພະຍາຍາມປະຕິບັດໜ້າທີ່ ແລະ ແຜນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ດ້ວຍຜົນສຳເລັດ ແລະ ພ້ອມທັງໄດ້ຍົກໃຫ້ເຖິງຄວາມສຳຄັນຂອງວຽກງານປັບປຸງກໍ່ສ້າງພັກ-ພະນັກງານໃນໄລຍະໃໝ່ ແມ່ນເປັນໜ້າທີ່ ແລະ ຄວາມຮັບຜິດຊອບຂອງສະມາຊິກພັກ-ພະນັກງານທຸກຄົນ ໃນນັ້ນ, ໜ່ວຍພັກ ຈະຕ້ອງບໍ່ເນັ້ນທາງດ້ານປະລິມານ,ຈະຕ້ອງໄດ້ເນັ້ນຄຸນນະພາບ ແລະ ກໍ່ຕ້ອງດີແທ້ໃຫ້ສົມກັບເປັນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ, ຊຶ່ງໃນນັ້ນການກໍ່ສ້າງໜ່ວຍພັກຕ້ອງຮັບປະກັນໃຫ້ໄດ້ ຕາມ 5 ຫຼັກການ 3 ທິດນໍາ, ຖືເອົາຄຸນນະພາບເປັນກົກ, ຮັບເອົາຜູ້ດີເດັ່ນ, ມີມາດຕະຖານ ແລະ ເງື່ອນໄຂຄົບຖ້ວນເຂົ້າເປັນສະມາຊິກພັກ. ພ້ອມນີ້, ສະຫາຍເລຂາຄະນະພັກຮາກຖານສະຖານເອກອັກຄະລັດຖະທູດ ສປປລາວ ປະຈຳ ຮ່າໂນ້ຍ ສສ ຫວຽດນາມ  ຍັງໄດ້ເນັ້ນໜັກບາງຈຸດ ເພື່ອເປັນທິດທາງໃນການຈັດຕັ້ງປະຕິບັດ ແລະ ສູ້ຊົນສ້າງໜ່ວຍພັກ ປອດໃສ,ເຂັ້ມແຂງ,ໜັກ   ແໜ້ນໃນຕໍ່ໜ້າ,ໄປພ້ອມໆກັບ 5 ເນື້ອໃນຄື: - ດ້ານການເມືອງ; - ດ້ານແນວຄິດ;- ດ້ານການຈັດຕັ້ງ;- ດ້ານແບບແຜນການນຳພາ;     - ນຳພາປະຕິບັດໜ້າທີ່ການເມືອງ. ນອກຈາກນັ້ນ, ສະຫາຍ ເລຂາຄະນະພັກຮາກຖານ  ຍັງໄດ້ຊີ້ນຳຫຼາຍບັນຫາໃຫ້ຄະນະໜ່ວຍພັກ,ຄະນະຈຸພັກ, ສະມາຊິກພັກ-ພະນັກງານສະຖານກົງສຸນໃຫ່ຍ ນຳໄປຈັດຕັ້ງຜັນຂະຫຍາຍ ເພື່ອເຮັດໃຫ້ການປະຕິບັດແຜນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃນປີ 2023 ມີຜົນສໍາເລັດຕາມຈຸດປະສົງ ແລະ ເປົ້າໝາຍທີ່ວາງໄວ້.