ໃນວັນທີ 17 ກໍລະກົດ 2023, ໜ່ວຍສະຫະພັນແມ່ຍິງສະຖານທູດ ແຫ່ງ ສປປ ລາວ ປະຈຳ ຮົງກາຣີ ທີ່ ບູດາແປສ ໄດ້ຈັດພິທີປາຖະກະຖາ ເພື່ອເຜີຍແຜ່ເອກະສານມູນເຊື້ອການກຳເນີດ ແລະ ເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປີ (20 ກໍລະກົດ 1955 - 20 ກໍລະກົດ 2023). ພາຍໃຕ້ການເປັນປະທານຂອງ ສະຫາຍ ນາງ ບົວແກ້ວ ສູນນະລາດ, ອຸປະທູດຊົ່ວຄາວ, ຕາງໜ້າໜ່ວຍແມ່ຍິງສະຖານທູດໃຫ້ກຽດຂຶ້ນບັນຍາຍ, ໂດຍມີຕົວແທນບັນດາຈຸແມ່ຍິງນັກສຶກສາລາວ ທີ່ສຶກສາຢູ່ ຮົງກາຣີ ເຂົ້າຮ່ວມຢ່າງພ້ອມພຽງ.
ໃນໂອກາດດັ່ງກ່າວ, ສະຫາຍ ນາງ ບົວແກ້ວ ສູນນະລາດ ໄດ້ຍົກໃຫ້ເຫັນເຖິງມູນເຊື້ອການກຳເນີດ ແລະ ເຕີບໃຫຍ່ຂະຫຍາຍຕົວຂອງອົງການຈັດຕັ້ງຂອງສະຫະພັນແມ່ຍິງລາວໃນໄລຍະຜ່ານມາ, ບົດບາດຂອງແມ່ຍິງລາວໃນການຕໍ່ສູ້ກູ້ຊາດຕ້ານພວກລ່າເມືອງຂຶ້ນ, ຄວາມສຳຄັນ ແລະ ພາລະບົດບາດຂອງແມ່ຍິງໃນຂະບວນການສ້າງສາພັດທະນາປະເທດຊາດໃນລະບົບໂຄງສ້າງກົງຈັກທາງສັງຄົມ ແລະ ສະຖາບັນຄອບຄົວ ທັງອາດີດຮອດປະຈຸບັນ, ລວມໄປເຖິງບົດບາດຂອງແມ່ຍິງລາວໃນເວທີພາກພື້ນ ແລະ ສາກົນ.
ພ້ອມດຽວກັນນັ້ນ, ສະຫາຍ ນາງ ບົວແກ້ວ ສູນນະລາດ ຍັງໄດ້ຊີ້ນຳ ທັງເຊີນຊວນໃຫ້ພ້ອມກັນປະຕິບັດຄຳຂວັນ ຂອງສະຫະພັນແມ່ຍິງລາວຕາມທິດຊີ້ນຳຄື: "ພັດທະນາຄວາມສະເໝີພາບຍິງ-ຊາຍ ຕິດພັນກັບການພັດທະນາປະເທດຊາດ" ຕັ້ງໜ້າປະຕິບັດຂະບວນການແຂ່ງຂັນ 3 ດີ ຂອງສະຫະພັນແມ່ຍິງລາວ ໃຫ້ປະສົບຜົນສໍາເລັດ ພ້ອມກັນນຳເອົາເນື້ອໃນເອກະສານມູນເຊື້ອແມ່ຍິງລາວໄປເຜີຍແຜ່ໃນຈຸແມ່ຍິງນັກສຶກສາໃຫ້ຮັບຊາບທົ່ວເຖິງ.