ໃນຕອນເຊົ້າຂອງວັນທີ 01 ທັນວາ 2023, ທີ່ ສະຖານກົງສຸນໃຫ່ຍ ​ແຫ່ງ ສປປລາວ ທີ່ ນະຄອນດານັງ  ໄດ້ຕ້ອນຮັບສະຫາຍ ເລືອງ ຫງວຽນ ມິງ ຈຽດ, ກຳມະການສູນກາງພັກ, ປະທານສະພາປະຊາຊົນ ນະຄອນດານັງ ພ້ອມດ້ວຍຄະນະພັກ, ຄະນະນຳ, ອໍານາດການປົກຄອງ ບັນດາແຂວງພາກກາງ-ໄຕຫງວຽນ ສສ ຫວຽດນາມ ເຂົ້າອວຍພອນ  ເນື່ອງໃນໂອກາດວັນຊາດ ແຫ່ງ ສປປລາວ ທີ 2 ທັນວາ ຄົບ ຮອບ 48 ປີ.

ໃນໂອກາດອັນສະຫງ່າລາສີ ແລະ ມີຄວາມໝາຍສຳຄັນນີ້, ສະຫາຍ ເລືອງ ຫງວຽນ ມິງ ຈຽດ ໄດ້ຕາງໜ້າຄະນະພັກ, ຄະນະນຳ ອຳນາດການປົກຄອງ ນະຄອນດານັງ ແລະ ບັນດາແຂວງພາກກາງ-ໄຕຫງວຽນ  ອວຍພອນໄຊອັນປະເສີດໃຫ້ສະຫາຍ ສຸພັນ ຫາດາວເຮືືອງ  ແລະ ພະນັກງານສະຖານກົງສຸນໃຫ່ຍ ສປປລາວ ປະຈໍາ ນະຄອນດານັງ  ແລະ ຜ່ານສະຖານກົງສຸນໃຫ່ຍ ໄປຍັງພັກ,ລັດ ແລະ ປະຊາຊົນລາວ ມີສຸຂະພາບແຂງແຮງ ມີຄວາມຜາສຸກ  ແລະ ມີຜົນສຳເລັດໃນໜ້າທີ່ວຽກງານ ໃຫ່ຍຫຼວງກວ່າເກົ່າ. ເນື່ອງໃນວັນສຳຄັນດັ່ງກ່າວ, ສະຫາຍ ເລືອງ ຫງວຽນ ມິງ ຈຽດ ໄດ້ຕີລາຄາສູງ ແລະ ສະແດງຄວາມຊົມເຊີຍ ຕໍ່ບັນດາໝາກຜົນທີ່ ປະຊາຊົນລາວບັນດາເຜົ່າສາມາດຍາດມາໄດ້ ໃນພາລະກິດປົກປັກຮັກສາ ແລະ ສ້າງສາປະເທດຊາດ ຕະຫລອດໄລຍະ 48 ປີ ຜ່ານມາ  ພາຍໃຕ້ການນຳພາຂອງພັກປະຊາຊົນປະຕິວັດລາວ, ສປປລາວ ໄດ້ມີບາດກ້າວພັດທະນາທີ່ສຳຄັນ ແລະ ນັບມື້ນັບສູງເດັ່ນຂຶ້ນໃນເວທີສາກົນຢ່າງບໍ່ຢຸດຢັ້ງ ແລະ ເຊື່ອໝັ້ນວ່າ ພາຍໃຕ້ການຊີ້ນຳ-ນຳພາອັນຖຶກຕ້ອງຂອງພັກປະຊາຊົນປະຕິວັດລາວ, ສປປລາວ ຈະສາມາດຜ່ານຜ່າຄວາມຫຍຸ້ງຍາກຕ່າງໆໄດ້ຢ່າງແນ່ນອນ. ບົນພື້ນຖານການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນຫຍິ່ງໃຫ່ຍ ຄວາມສາມັກຄີພິເສດ ການຮ່ວມມືຮອບດ້ານລະຫວ່າງສອງພັກ, ສອງລັດເວົ້າລວມ, ເວົ້າສະເພາະ ການພົວພັນຮ່ວມມືລະຫວ່າງບັນດາແຂວງພາກໃຕ້-ກາງ ສປປລາວ ກັບ ນະຄອນດານັງ ແລະ ບັນດາແຂວງພາກກາງ-ໄຕຫງວຽນ ສສ ຫວຽດນາມ ກໍ່ນັບມື້ນັບໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ແລະ ໄດ້ຮັບຜົນດີ. ມາຮອດປະຈຸບັນ ສະເພາະນະຄອນດານັງ ໄດ້ເຊັນສັນຍາ 37 ສະບັບ ແລະ ບົດບັນທຶກຄວາມເຂົ້າໃຈ ຮ່ວມກັບ 07 ທ້ອງຖິ່ນຂອງລາວ , ໃນນັ້ນມີແຂວງສະຫວັນນະເຂດ, ແຂວງຈຳປາສັກ, ແຂວງເຊກອງ, ແຂວງສາລະ ວັນ, ແຂວງ ອັດຕະປື, ແຂວງຄຳມ່ວນ, ແຂວງບໍລິຄຳໄຊ ແລະ ນອກນັ້ນ ຍັງມີນະຄອນຫຼວງວຽງຈັນ, ແຂວງໄຊຍະບູລີ. ແຜນການພົວພັນຮ່ວມມືລະຫວ່າງ ນະຄອນດານັງ ກັບ 05 ແຂວງພາກໃຕ້ ແລະ ພາກກາງ ສປປລາວ ກໍ່ແມ່ນໄດ້ຮັບການຜັນຂະຫຍາຍຢ່າງມີປະສິດທິຜົນ ໂດຍຜ່ານແຜນງານການຮ່ວມມື 5 ປີ ໄລຍະ 2023-2027 ໃນນັ້ນ ກໍ່ແມ່ນການຮ່ວມມືດ້ານການຄ້າ, ການລົງທຶນ, ສຶກສາ, ສາທາລະນະສຸກ, ທ່ອງທ່ຽວ, ບໍ່ແຮ່, ຄົມມະນາຄົມ ຂົນສົ່ງ (ໂລຈິສະຕິກ), ກະສິກໍາ, ປ້ອງກັນຊາດປ້ອງກັນຄວາມສະຫງົບຕາມບໍລິເວນຊາຍແດນ, ການເຂົ້າ-ອອກດ່ານຊາຍແດນ;  ສຳລັບດ້ານການຄ້າ ແລະ ການລົງທຶນ, ໃນປີ 2023 ນະຄອນດານັງ ໄດ້ສົ່ງອອກສິນຄ້າປະເພດຕ່າງໆ ແລະ ລົງທຶນຢູ່ບັນດາແຂວງພາກໃຕ້-ກາງ ສປປລ ມີມູນຄ່າເຖິງ 10 ລ້ານໂດລາ, ສ່ວນດ້ານການສຶກສາແຕ່ລະປີ ແມ່ນສຸ່ມໃສ່ໂຄງການຊ່ວຍເຫຼືອແກ່ບັນດາແຂວງທ້ອງຖິ່ນ ສປປລາວ ໃນການກໍ່ສ້າງຊັບພະຍາກອນມະນຸດ ແລະ ຍົກລະດັບພື້ນຖານໂຄງລ່າງໂຮງຮຽນ, ຕຶກອາຄານຮຽນ, ສະໂມສອນຫຼີ້ນກິລາ ໃນມູນຄ່າຈຳນວນເງິນ 115,924 ຕື້ດົງ. ນັບແຕ່ປີ 2022 ມາປີ 2023, ນະຄອນດານັງ ແລະ ບັນດາແຂວງພາກກາງ-ໄຕຫງວຽນ ໄດ້ໃຫ້ທຶນການສຶກສາປະມານ 100-120 ທຶນ/ປີ; ມາຮອດປະຈຸບັນ ມີນັກສຶກສາລາວ ກໍາລັງສຶກສາ ແລະ ຄົ້ນຄວ້າຢູ່ສະຖາບັນ ແລະ ມະຫາວິທະຍາໄລ ນະຄອນດານັງ-ບັນດາແຂວງພາກກາງ-ໄຕຫງວຽນ ສສ ຫວຽດນາມ ທັງໝົດ 3,456 ຄົນ,ສຶກສາຢູ່ 41 ສະຖາບັນໃນ 01 ນະຄອນ ແລະ 11 ແຂວງ.

ໃນຂະນະດຽວກັນ, ສະຫາຍ ສຸພັນ ຫາດາວເຮືອງ, ກົງສຸນໃຫ່ຍ ສປປລາວ ປະຈຳ ນະຄອນດານັງ ສສ ຫວຽດນາມ  ກໍ່ໄດ້ຕາງໜ້າຄະນະພັກ, ຄະນະນຳ ບັນດາແຂວງພາກໃຕ້-ພາກກາງ ສປປລາວ ສະແດງຄວາມຂອບໃຈຕໍ່ສະຫາຍ ເລືອງ ຫງວຽນ ມິງຈຽດ  ພ້ອມດ້ວຍຄະນະພັກ, ຄະນະນຳຂອງບັນດາແຂວງພາກກາງ-ໄຕຫງວຽນ ສສ ຫວຽດນາມ  ທີ່ມາອວຍພອນວັນຊາດລາວ ໃນຄັ້ງນີ້, ພ້ອມທັງໄດ້ສະແດງຄວາມຂອບໃຈໄປຍັງຄະນະພັກ, ຄະນະນຳອຳນາດການປົກຄອງ ແລະ ປະຊາຊົນຫວຽດນາມ ນະຄອນດານັງ ແລະ ພາກກາງ-ໄຕຫງວຽນ  ທີ່ໄດ້ສະໜັບສະໜູນອັນໃຫ່ຍຫຼວງ,ການຊ່ວຍເຫຼືອອັນລໍ້າຄ່າ ແລະ ທັນການ ທີ່ມີຕໍ່ບັນດາແຂວງພາກໃຕ້-ກາງ ສປປລາວ.