ໃນວັນທີ 30 ພະຈິກ 2023,  ສະຖານເອກອັກຄະລັດຖະທູດ ແຫ່ງ ສປປ ລາວ ທີ່ ແບກແລງ ໄດ້ຈັດພິທີປາຖະກະຖາ ແລະ ເຜີຍແຜ່ເອກະສານສຳຄັນຈຳນວນໜຶ່ງ ເພື່ອຄຳນັບຮັບຕ້ອນ ແລະ ສະເຫລີມສະຫລອງວັນຊາດ ແຫ່ງ ສປປ ລາວ ຄົບຮອບ 48 ປີ (2 ທັນວາ 1975 – 2 ທັນວາ 2023) ໂດຍການເປັນປະທານ ແລະ ໃຫ້ກຽດບັນລະຍາຍໂດຍ ທ່ານ ໄມບົວ ໄຊຍະວົງ, ເອກອັກຄະລັດຖະທູດລາວ ປະຈຳ ເຢຍລະມັນ ແລະ ມີພະນັກງານສະຖານທູດ, ສະມາຊິກຄອບຄົວ, ຄະນະສະມາຄົມຄົນເຊື້ອຊາດລາວ ແລະ ພີ່ນ້ອງຊາວລາວ ທີ່ ແບກແລງ ເຂົ້າຮ່ວມໃນພິທີຫລາຍກ່າວ 30 ທ່ານ. ເອກກະສານທີ່ນຳມາບັນຍາຍໃນຄັ້ງນີ້ ປະກອບມີ 3 ເອກະສານ ຄື: (1) ວັນເກີດປະທານສຸພານຸວົງ, (2) ວັນຜ່າວົງປິດລ້ອມຂອງກອງພັນທີ 2 ວິລະຊົນ ທີ່ ທົ່ງໄຫຫີນ ຊຽງຂວງ, ວິລະກຳໂຕນຄຸກມະຫັດສະຈັນ ຂອງ ບັນດາຜູ້ນຳພັກແນວລາວສ້າງຊາດ, ແລະ (3) ຍຸດທະສາດແຫ່ງຊາດ ວ່າດ້ວຍ  ການບໍລິຫານຂອງລັດຜ່ານປະຕູດຽວ ຮອດປີ 2030.

ໃນໂອກາດດັ່ງກ່າວ, ທ່ານ ເອກອັກຄະລັດຖະທູດ ໄດ້ສັງລວມເອົາເນືຶ້ອໃນສຳຄັນຂອງທັງ 3 ເອກະສານ ມາທົບທວນຄືນ ແລະ ລະນຶກເຖິງເຫດການທາງປະຫວັດສາດຂອງຊາດລາວ, ການຕໍ່ສູ້ອັນພິລາດອາດຫານ ຂອງ ບັນດາຜູ້ນຳວິລະຊົນລາວ ເປັນຕົ້ນ ປະຫວັດຄວາມເປັນມາ ແລະ ການເຄື່ອນໄຫວທີ່ສຳຄັນ ຂອງ ປະທານສຸພານຸວົງ ໃນຂະບວນການປະຕິວັດ ຕໍ່ສູ້ປົດປ່ອຍປະເທດຊາດ ຈົນນຳມາເຖິງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975.

ພ້ອມດຽວກັນນີ້, ທ່ານທູດ ຍັງໄດ້ຍົກໃຫ້ເຫັນຄວາມຕັ້ງໜ້າ ແລະ ເອົາໃຈໃສ່ ຂອງ ລັດຖະບານ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ຕະຫລອດໄລຍະ 48 ປີ ຜ່ານມາ ໂດຍຜ່ານການສ້າງ ແລະ ປັບປຸງບັັນດາກົດໝາຍ ແລະ ນິຕິກຳຕ່າງໆ ໃຫ້ສອດຄ່ອງກັບສະພາບຂອງຍຸກສະໄໝໃນແຕ່ລະໄລຍະ ເປັນຕົ້ນ ການວາງຍຸດທະສາດແຫ່ງຊາດ ວ່າດ້ວຍ ການບໍລິຫານຂອງລັດຜ່ານປະຕູດຽວ ຮອດປີ 2030 ພ້ອມທັງ ໄດ້ຍົກໃຫ້ເຫັນຜົນສຳເລັດໃນການຈັດຕັ້ງປະຕິບັດຍຸດທະສາດດັ່ງກ່າວ ແລະ ສິ່ງທ້າທາຍທີ່ຈະຕ້ອງໄດ້ສືບຕໍ່ແກ້ໄຂ ເພື່ອເປັນຂໍ້ມູນໃຫ້ສະມາຊິກພັກ-ພະນັກງານ ແລະ ພີ່ນ້ອງຊາວລາວທີ່ດຳລົງຊີວິດຢູ່ຕ່າງປະເທດ ເຂົ້າໃຈແຈ້ງ ຕໍ່ກັບແນວທາງນະໂຍບາຍຂອງ ພັກ ແລະ ລັດ ໃນການພັດທະນາເສດຖະກິດ-ສັງຄົມ ໃຫ້ມີປະສິດທິພາບ, ປະສິດທິຜົນ ແລະ ຜົນສຳເລັດເປັນກ້າວໆໃນປັດຈຸບັນ ແລະ ຕໍ່ໜ້າ.

ເພື່ອເປັນການສ້າງຂະບວນການຂ່ຳນັບຮັບຕ້ອນ ແລະ ຊົມເຊີຍວັນທີ່ມີຄວາມໝາຍສຳຄັນດັ່ງກ່າວ, 3 ອົງການຈັດຕັ້ງມະຫາຊົນ (ກຳມະບານ, ແມ່ຍິງ ແລະ ຊາວໜຸ່ມ) ປະຈຳ ສະຖານທູດລາວ ທີ່ ແບກແລງ ຍັງໄດ້ພ້ອມກັນຈັດການອອກແຮງງານອານາໄມລວມ ເຂດພາຍໃນ ແລະ ພາຍນອກ ອາຄານຕຶກສະຖານທູດ ຕື່ມອີກ.