ໃນວັນທີ 23 ມີນາ ຂອງທຸກໆປີ ບັນດາປະເທດສະມາຊິກ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ     (ກໍາປູເຈຍ, ສປ ຈີນ, ສປປ ລາວ, ມຽນມາ, ໄທ ແລະ ສສ. ຫວຽດນາມ) ໄດ້ຈັດກິດຈະກໍາສັບປະດາແມ່ນໍ້າຂອງ-ແມ່ນໍ້າລ້ານຊ້າງ ຂຶ້ນໃນທ້າຍເດືອນມີນາ ຂອງທຸກໆປີ ເພື່ອເປັນການສະເຫຼີມສະຫຼອງການສ້າງຕັ້ງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ເຊິ່ງໃນປີ 2024,

ສປປ ລາວ ກໍໄດ້ຈັດກິດຈະກໍາສັບປະດາແມ່ນໍ້າຂອງ-ແມ່ນໍ້າລ້ານຊ້າງ ຂຶ້ນຮ່ວມກັບສໍານັກງານຜູ້ຕາງໜ້າຂອງບັນດາປະເທດແມ່ນໍ້າຂອງ-ແມ່ນໍ້າລ້ານຊ້າງ ປະຈຳ ສປປ ລາວ ໂດຍປະກອບມີ 2 ກິດຈະກຳຄື: ໄດ້ເຜີຍແຜ່ບົດຄວາມ ໂດຍ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ເພື່ອເປັນການສະແດງຄວາມຊົມເຊີຍ ແລະ ອວຍພອນຕໍ່ການສ້າງຕັ້ງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄົບຮອບ 8 ປີ, ພ້ອມດຽວກັນນັ້ນ,​ ກະຊວງການຕ່າງປະເທດ ກໍໄດ້ຈັດກອງປະຊຸມສໍາມະນາ ໃນຫົວຂໍ້: “ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ” ພາຍໃຕ້ການເປັນປະທານຮ່ວມ ຂອງ ທ່ານ ສົມບູນ ສີຫານາດ, ຫົວໜ້າກົມເສດຖະກິດ, ກະຊວງການຕ່າງປະເທດ ແລະ ທ່ານ ປອ. ສົມເດດ ແກ້ວວົງສັກ, ຮອງຄະນະບໍດີ ຄະນະນິຕິສາດ -ລັດຖະສາດ, ມະຫາວິທະຍາໄລແຫ່ງຊາດ ພ້ອມດ້ວຍ ທ່ານ DU Changqing, ຫົວໜ້າພະແນກການເມືອງ, ສະຖານເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ໃນວັນທີ 22 ມີນາ 2024 ທີ່ ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ. ໃນນີ້,​ ໄດ້ມີຜູ້ຕາງໜ້າຈາກສະຖານທູດ ສປ ຈີນ ປະຈຳ ສປປ ລາວ,​ ບັນດາຄູອາຈານ ແລະ ນັກສຶກສາ ຈາກຄະນະນິຕິສາດ ແລະ ລັດຖະສາດ ພ້ອມທັງພະນັກງານກົມເສດຖະກິດ, ກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ. ກອງປະຊຸມສຳມະນາໃນຄັ້ງນີ້ ໄດ້ເປັນໂອກາດອັນດີໃຫ້ແກ່ບັນດາຄູອາຈານ ແລະ ນັກສຶກສາ ໄດ້ແລກປ່ຽນຄວາມຮູ້ຄວາມເຂົ້າໃຈ ກ່ຽວກັບ ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ລວມທັງວຽກງານການຕ່າງປະເທດ ແລະ ນະໂຍບາຍການເຊື່ອມໂຍງພາກພື້ນ ແລະ ສາກົນຫຼາຍຂຶ້ນ ເພື່ອສາມາດນຳໄປເປັນຂໍ້ມູນໃນການເຮັດບົດຄົ້ນຄວ້າຕ່າງໆ ແລະ ສືບຕໍ່ປະກອບສ່ວນຈັດຕັ້ງຜັນຂະຫຍາຍການຮ່ວມມືດັ່ງກ່າວໃນຕໍ່ໜ້າ.

ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໄດ້ຖືກປະກາດສ້າງຕັ້ງຂຶ້ນຢ່າງເປັນທາງການໃນໂອກາດກອງປະຊຸມຜູ້ນໍາແມ່ນໍ້າຂອງ-ແມ່ນໍ້າລ້ານຊ້າງ ຄັ້ງປະຖົມມະເລິກ ໃນວັນທີ 23 ມີນາ 2016 ທີ່ ເມືອງ ຊານຢາ, ສປ ຈີນ. ໃນນີ້, ປະກອບມີປະເທດສະມາຊິກທັງໝົດ 6 ປະເທດ: ກໍາປູເຈຍ, ສປ ຈີນ, ສປປ ລາວ, ມຽນມາ, ໄທ ແລະ ຫວຽດນາມ. ຈຸດປະສົງຂອງການສ້າງຕັ້ງຂອບການຮ່ວມມືດັ່ງກ່າວແມ່ນເພື່ອສືບຕໍ່ຮັກສາສັນຕິພາບ ແລະ ສະຖຽນລະພາບ, ພັດທະນາການເປັນປະເທດເພື່ອນບ້ານທີ່ດີ, ດຳເນີນການຮ່ວມມືຢ່າງເປັນຮູບປະທຳ ແລະ ສົ່ງເສີມການພັດທະນາແບບຍືນຍົງ ໃຫ້ມີຜົນປະໂຫຍດຮ່ວມກັນ ແລະ ສ່ອງແສງໃຫ້ເຫັນຄວາມມຸ້ງຫວັງຂອງບັນດາປະເທດໃນອະນຸພາກພື້ນ ບົນພື້ນຖານ 3 ເສົາຄໍ້າຄື: ການເມືອງ-ຄວາມຫມັ້ນຄົງ, ເສດຖະກິດ-ການພັດທະນາແບບຍືນຍົງ, ແລະ ສັງຄົມ-ວັດທະນະທໍາ ແລະ ການແລກປ່ຽນລະຫວ່າງປະຊາຊົນ ແລະ ລົງເລິກ 5 ຂົງເຂດ ຄື: ການເຊື່ອມຈອດ, ຄວາມອາດສາມາດດ້ານການຜະລິດອຸດສາຫະກໍາ, ເສດຖະກິດຂ້າມຊາຍແດນ, ການຄຸ້ມຄອງແຫລ່ງຊັບພະຍາກອນນໍ້າ ແລະ ກະສິກໍາ ແລະ ການຫຼຸດຜ່ອນຄວາມທຸກຍາກ.