ໃນວັນທີ 24 ກຸມພາ 2016, ຄະນະຜູ້ແທນ ສປປ ລາວ ນໍາໂດຍ ທ່ານ ສົງການ ຫລວງມຸນິນທອນ, ຫົວຫນ້າກົມເສດຖະກິດ, ກະຊວງການຕ່າງປະເທດ ໄດ້ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3 ທີ່ ເມືອງສັນຢາ, ແຂວງໄຫຫນານ, ສປ ຈີນ, ພາຍໃຕ້ການເປັນປະທານຮ່ວມ ຂອງ ທ່ານ ຫລິວ ເຈິນໝິງ (Liu Zhenmin), ລັດຖະມົນຕີຊ່ວຍວ່າການກະຊວງການຕ່າງປະເທດ ສປ ຈີນ ແລະ ທ່ານ ວິທະວັດ ສີວິຫົກ, ຮອງຫົວໜ້າຫ້ອງການກະຊວງການຕ່າງປະເທດໄທ ແລະ ມີເຈົ້າໜ້າທີ່ອາວຸໂສ ຈາກ ກະຊວງການຕ່າງປະເທດ ຂອງ 6 ປະເທດ: ກຳປູ​ເຈຍ, ສປ ຈີນ, ສປປ ລາວ, ມຽນມາ, ໄທ ແລະ ສສ ຫວຽດນາມ ເຂົ້າຮ່ວມຢ່າງພ້ອມພຽງ.

​ ຈຸດປະສົງ ຂອງກອງປະຊຸມແມ່ນເພື່ອ ກະກຽມຄວາມພ້ອມດ້ານຕ່າງໆ ໃຫ້ແກ່ກອງປະຊຸມຜູ້ນໍາ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 1. ໃນນັ້ນ ກອງປະຊຸມໄດ້ປຶກສາຫາລື ແລະ ປະກອບຄຳເຫັນ ຕໍ່ຮ່າງຖະແຫລງການສັນຢາ ຂອງກອງປະຊຸມຜູ້ນໍາຄັ້ງທີ 1 (Sanya Declaration of the 1^st Leaders’ Meeting), ຖະແຫລງການຮ່ວມວ່າດ້ວຍ ການຮ່ວມມືດ້ານການສ້າງຄວາມອາດສາມາດໃນການຜະລິດ (Joint Statement on Production Capacity among Lancang Mekong Countries) ແລະ ບັນຊີຮ່ວມໂຄງການເຫັນຜົນໄດ້ໄວ. ກອງປະຊຸມໄດ້ເຫັນດີໃນດ້ານຫລັກການ ຕໍ່ບັນດາຮ່າງເອກະສານ ຂອງ ຂອບການຮ່ວມມືດັ່ງກ່າວ ເພື່ອນໍາສະເຫນີ ຕໍ່ ກອງປະຊຸມຜູ້ນໍາ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 1 ພິຈາລະນາຮັບຮອງເອົາ.

ໃນໂອກາດດຽວກັນ ຄະນະຜູ້ແທນກອງປະຊຸມ ໄດ້ເຂົ້າພົບປະ ທ່ານ ຫລິວ ສຶກຸ້ຍ (Liu Cigui), ເຈົ້າແຂວງໆໄຫຫນານ ແລະ ໄດ້ໄປຢ້ຽມຢາມສະຖານທີ່ຈັດກອງປະຊຸມຜູ້ນໍາ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 1, ເຊິ່ງຈະຈັດຂຶ້ນໃນວັນທີ 22-23 ມີນາ 2016 ທີ່ ສັນຢາ, ໄຫຫນານ, ສປ ຈີນ.

ສປປ ລາວ ເຫັນວ່າ ຂອບ​ການ​ຮ່ວມ​ມື ​ແມ່​ນໍ້າຂອງ-​ແມ່​ນໍ້າລ້ານ​ຊ້າງ ຊຶ່ງແມ່ນຂອບການຮ່ວມມື ທີ່ຫາກໍ່ສ້າງຕັ້ງໃນປີ 2015 ທີ່ຜ່ານມາ ຈະນໍາເອົາຜົນປະໂຫຍດ ມາສູ່ 6 ປະເທດອະນຸພາກພື້ນແມ່ນໍ້າຂອງ ໃນການພັດທະນາເສດຖະກິດ-ສັງຄົມ ແລະ ປະກອບສ່ວນເຂົ້າໃນການເສີມຂະຫຍາຍສັນຕິພາບ ແລະ ຮັດແຫນ້ນ ການພົວພັນຮ່ວມມື ລະຫວ່າງ 6 ປະເທດແມ່ນໍ້າຂອງໃຫ້ຫລາຍຍິ່ງຂຶ້ນ.