ໂດຍ​ຕອບ​ສະ​ໜອງ​​ຕາມ​ການ​ເຊື້ອ​ເຊີນ​ ຂອງ​ ສູນ​ກາງ​ພັກ​ກອມ​ມູ​ນິດ​ຍີ່​ປຸ່ນ, ຄະ​ນະ​ຜູ້​ແທນ ​​ພັກປະ​ຊາ​ຊົນ ປະ​ຕິ​ວັດ​ລາວ ນຳ​ໂດຍ ​ສະ​ຫາຍ ປອ ນາງ ສູນ​ທອນ ໄຊ​ຍ​ະ​ຈັກ, ກຳ​ມະ​ການ​ສູນ​ກາງ​ພັກ, ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ​ ປ​ປ ລາວ ພ້ອມ​ດ້ວຍ​ຄະ​ນະ ໄດ້​​ໄປຢ້ຽມ​ຢາມ ແລະ ​ເຮັດ​ວຽກ​ກັບ​ ພັກ​ກອມ​ມູ​ນິດ​ຍີ່​ປຸ່ນ ແຕ່​ວັນ​ທີ 01-04 ມິ​ຖຸ​ນາ 2016.

ໃນ​ຕອນ​ບ່າຍຂອງ ​ວັນ​ທີ 02 ມິ​ຖຸ​ນາ 2016, ​ສະ​ຫາຍ ນາງ ສູນ​ທອນ ໄຊ​ຍະ​ຈັກ ​ພ້ອມ​ຄະ​ນະ ໄດ້​​ເຂົ້າ​ຢ້ຽມ​ຂໍ່ານັບ ສະ​ຫາຍ ຊິ​ອິກາ​ຊູ​ໂອະ, ປະ​ທານ​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ​ກອມ​ມູ​ນິດ​ຍີ່​ປຸ່ນ. ໃນ​ການ​ພົບ​ປະ, ສະ​ຫາຍ ຫົວ​ໜ້າ​ຄ​ະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້​ນຳ​ເອົາ​ຄວາມ​ຢື້​ຢາມ​ຖາມ​ຂ່າວ ຂອງ ສະ​ຫາຍ ບຸນ​ຍັງ ວໍ​ລະ​ຈິດ, ເລ​ຂາ​ທິ​ການ​ໃຫຍ່ ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ ປ​ປ ລາວ ເຖິງ ​ສະ​ຫ​າຍຊິ​ອິກາ​ຊູ​ໂອະ, ປະ​ທານ​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ​ກອມ​ມູ​ນິດ​ຍີ່​ປຸ່ນ ແລະ ສະ​ຫາຍ ຊິ​ອິກາ​ຊູ​ໂອະ ກໍ່​ໄດ້​ຝາກ​ຄວາມ​ຢື້​ຢາມ​ຖາມ​ຂ່າວມາ​ຍັງ ສະ​ຫາຍ​ເລ​ຂາ​ທິ​ການ​ໃຫຍ່ ບຸນ​ຍັງ ວໍ​ລະ​ຈິດ; ສ​ອງ​ຝ່າຍ ໄດ້ຕີ​ລາ​ຄາສູງ​ຕໍ່​ສາຍ​​ພົວ​ພັນ​ມິດ​ຕະ​ພາບອັນ​ເປັນ​ມູນ​ເຊື້ອ ລະ​ຫວ່າງ ພັກ ປ​ປ ລາວ ແລະ ພັກ​ກອມ​ມູ​ນິດ​ຍີ່​ປຸ່ນ ໃນ​ໄລ​ຍ​ະ​ທີ່​ຜ່ານ​ມາ ກໍ່​ຄື​ ປະ​ຈຸ​ບັນ; ເຫັນ​ດີ​ ສືບ​ຕໍ່​ຮັກ​ສາ​ການ​ໄປ​ມາ​ຫາ​ສູ່​ກັນ ລະ​ຫວ່າງ ​ການ​ນຳ​ຂັ້ນ​ຕ່າງໆ​ຂອງ​ສອງ​ພັກ​ ນຳ​ກັ​ນ ຢ່າງ​ເປັນ​ປົກ​ກະ​ຕິ.

ສະ​ຫາຍຊິ​ອິກາ​ຊູ​ໂອະໄດ້​ສະ​ແດງ​ຄວາມ​ຊົມ​ເຊີຍຕໍ່ກອງ​ປະ​ຊຸມ​ໃຫຍ່​ຜູ້​ແທນ​ທົ່ວ​ປະ​ເທດຄັ້ງ​ທີ X ຂອງພັກປ​ປລາວແລະກອງ​ປະ​ຊຸມ​ສະ​ພາ​ແຫ່ງ​ຊາດສະ​ໄໝ​ທີ VIII ທີ່​ໄດ້​ໄຂ​ຂຶ້ນໃນ​ຕົ້ນ​ປີ 2016 ຜ່ານ​ມາດ້ວຍ​ຜົນ​ສ​ຳ​ເລັດ​ອັນ​ຈົບ​ງາມ ແລະ ເຊື່ອ​ໜັ້ນ​ວ່າພາຍ​ໃຕ້​ການ​ຊີ້​ນຳ​ນຳ​ພາ​ຂອງ​ພັກ ປ​ປ ລາວ ອັ​ນ​ມີ​ ສະ​ຫາຍ ບຸນຍັງ ວໍ​ລະ​ຈິດ, ເລ​ຂາ​ທິ​ການ​ໃຫຍ່ ພັກ ປ​ປ ລາວ ເປັນ​ແກນ​ນຳ​ນັ້ນຈະ​ສາ​ມາດ​ຍາດ​ໄດ້ຜົນສຳເລັດ​ອັນ​ໃຫ​ຍ່​ຫລວງໃນ​ການ​ຈັດ​ຕັ້ງ​ຜັນ​ຂະ​ຫຍາຍ​ມະ​ຕິ​ກອງ​ປະ​ຊຸມ​ໃຫຍ່ຄັ້ງ​ທີ X ຂອງພັກ ແລະ ແຜນ​ການ​ພັດ​ທະ​ນາເສ​ດ​ຖະ​ກິດ-ສັງ​ຄົມ 5 ປີຄັ້ງ​ທີ VIII ແລະ ​ນຳ​ພາ​ປະ​ເທດ​ຊາດຫລຸດ​ພົ້ນ​ອອກ​ຈາກ​ສະ​ຖາ​ນະ​ພາບ​ດ້ອຍ​ພັດ​ທະ​ນາ​ຕາມ​ເປົ້າ​ໝາຍ​ທ​ີ່ກອງ​ປະ​ຊຸມໃຫຍ່ຄັ້ງ​ທີ X ຂອງ ພັກ ປ​ປ ລາວ​ ໄດ້​ວາງ​ອອກ.

ສະ​ຫາຍຊິ​ອິກາ​ຊູ​ໂອະໄດ້​ສະ​ແດງ​ຄວາມຂອບ​ໃຈ​ ຕໍ່ ​ພັກ ປ​ປ ລາວ ທີ່​ໄດ້​ສົ່ງ​ຄະ​ນະ​​ຜູ້​ແທນມາຢ້ຽ​ມ​ຢາມ ແລະ ແລກ​ປ່ຽນ​ສະ​ພາບ​ການ​ຕ່າງໆ ລະ​ຫວ່າງ 2 ພັກ ໃນ​ຄັ້ງ​ນີ້, ເຊິ່ງ​ເປັນ​ການ​ປະ​ກອ​ບ​ສ່ວນ​ອັ​ນ​ສຳ​ຄັນ​ເຂົ້າ​ໃນ​ການ​ເພີ່ມ​ທະ​ວີສາຍ​ພົ​ວ​ພັນ​ມິດ​ຕະ​ພາບ​ອັນ​ເປັນ​ມູ​ນ​ເຊື້ອ​ ລະ​ຫວ່າງ ສອງ​ພັກພວກ​ເຮົາ ແລະ ທັງເປັນ​ການ​ຊຸກ​ຍູ້​ການ​ພົວ​ພັນ​ດ້ານ​ລັດ​ຂອງ​ສອງ​ປະ​ເທດ ໃຫ້​ນັບ​ມື້​ນັບ​ຂະ​ຫຍາຍ​ຕົວ​​ຍິ່ງໆ​ຂຶ້ນ.

​ສະ​ຫາຍ ປອ ນາງ ສູນ​ທອນ​ ໄຊ​ຍ​ະ​ຈັກ ໄດ້​ສະ​ແດງ​ຄວາມ​​ຂອບ​ໃຈ ຕໍ່​ ສູນ​ກາງ​ພັກກອມ​ມູ​ນິດ​ຍີ່​ປຸ່ນ ທີ່​ໄດ້​ສົ່ງ​ໂທ​ລະ​ເລກອວຍ​ພອນ​ຜົນ​ສ​ຳ​ເລັດ​ກອງ​ປະ​ຊຸມ​ໃຫຍ່ ຄັ້ງ​ທີ X ຂອງ​ພັກ ແລະ ສານ​ຊົມ​ເຊີຍມາ​ຍັງສະ​ຫາຍເລ​ຂາ​ທິ​ການ​ໃຫຍ່ບຸນ​ຍັງວໍ​ລະ​ຈິດເນື່ອງ​ໃນ​ໂອ​ກາດ​ທີ່​ໄດ້​ຮັບ​ເລືອກ​ຕັ້ງ​ເປັນ​ເລ​ຂາ​ທິ​ການ​ໃຫ​ຍ​່ ພັກ ປ​ປ ລາວ;ໄດ້​ຕີລາຄາສູງຕໍ່ການ​ແລກ​ປ່ຽນ​ຄະ​ນະ​ຜູ້​ແທນຂັ້​ນ​ຕ່າງໆ ແລະ ການ​ຮ່ວມ​ມືລະ​ຫວ່າງ ພັກ ປປ ລາວ ແລະ ພັກກອມມູນິດຍີ່ປຸ່ນ ໃນໄລຍະຜ່ານມາ ກໍ່ຄື ໃນປະຈຸບັນ​, ເຊິ່ງ​ເປັນ​ການ​ປະ​ກອບ​ສ່ວນ​ອັນ​ສຳ​ຄັນ​ເຂົ້າ​ໃນ​ການ​ເພີ່ມ​ພູນ​ຄູນ​ສ້າງ​ສາຍ​ພົວ​ພັນ​ມິດ​ຕະ​ພາບ​ອັນ​ເປັນ​ມູນ​ເຊື້ອ ແລະ ການ​ຮ່ວມ​ມື ລະ​ຫວ່າງ 2 ພັກ, ປະ​ຊາ​ຊົນ​ສອງ​ຊາດ ລາວ-ຍີ່​ປຸ່ນ ໃຫ້​ນັບ​ມື້​ນັບ​ຂະ​ຫຍາຍ​ຕົ​ວ​ຂຶ້ນ​ເລື້ອຍໆ.

ໃນ​ເວ​ລາ​ຢູ່ຢ້ຽມ​ຢາມ​ຍີ່​ປຸ່ນ, ຄະ​ນະໄດ້​ພົບ​ປະເຮັດ​ວຽກ​ກັບ ສະ​ຫາຍ ຢາ​ຊູ​ໂອະ ໂອ​ກາ​ຕະ, ຮອງ​ປະ​ທານ​ຄະ​ນະ​ກຳ​ມະ​ການບໍ​ລິ​ຫານ​ງານ​ສູນ​ກາງ​ພັກ, ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ​ກອມ​ມູ​ນິດ​ຍີ່​ປຸ່ນ,​ ເຊິ່ງການພົບ​ປະເຮັດ​ວຽກ​​ດັ່ງ​ກ່າວໄດ້​ດຳ​ເນີນ​ໄປ​ດ້​ວຍໄມ​ຕີ​ຈິດ​ມິດ​ຕະ​ພາບລະ​ຫວ່າງພັກປ​ປລາວແລະພັກ​ກອມ​ມູ​ນິດ​ຍີ່​ປຸ່ນ. ​ສ​ອງ​ຝ່າຍໄດ້​ແຈ້ງ​ໃຫ້​ກັນ​ຊາບ​ກ່ຽວ​ກັບ​ສ​ະ​ພາບ​ການ​ທີ່​ພົ້ນ​ເດັ່ນ​ຂອງ​ແຕ່​ລະ​ພັກ, ແຕ່​ລະ​ປະ​ເທດ, ພ້ອມ​ກັນ​ແລກ​ປ່ຽນ​ຄຳ​ຄິດ​​ເຫັນ​ນຳ​ກັ​ນ​ ກ່ຽວ​ກັບ​ການ​ພົວ​ພັນ​ຮ່ວມ​ມືລະ​ຫວ່າງ ສອງ​ພັກ ໃນ​ໄລ​ຍະ​ທີ່​ຜ່ານ​ມາກໍ່​ຄື​ ທິດທາງ​ກາ​ນ​ຮ່ວ​ມື​ໃນ​ຕໍ່​ໜ້າ ​ແລະ ​ໃຫ້​ທັດ​ສະ​ນະ​ຕໍ່ສະພາບ​ການ​ພາກ​ພື້ນ ​ແລະສາກົນ​ຈໍານວນ​ໜຶ່ງທີ່​ສອງ​ຝ່າຍ​ມີ​ຄວາມ​ສົນ​ໃຈ. ສອງ​ຝ່າຍ​ ໄດ້ມີ​ຄວາມ​ເປັນ​ເອ​ກະ​ພາບຈະ​ສືບ​ຕໍ່​ຮ່ວມກັນ​ ເສີມ​ຂະ​ຫຍາຍ​ສາ​ຍ​ພົວ​ພັນ​ມິ​ດ​ຕະ​ພາບ​ອັນ​ເປັນ​ມູນ​ເຊື້ອ ແລະ ການ​ຮ່ວມ​ມື ລະ​ຫວ່າງ ສອງພັກ​ໃຫ້​ນັບ​ມື້​ນັບ​ຂະຫຍາຍຕົວ​ຍິ່ງໆ​ຂື້ນ ​ເພື່ອ​ຜົນ​ປະ​ໂຫຍ​ດຂອງປະຊາຊົນ​ສອງ​ຊາດກໍ​ຄື ​ເພື່ອ​ພາ​ລະ​ກິດ​ສັນຕິພາບ, ​ເອກະລາດ, ມິດ​ຕະ​ພາບ ​ແລະການ​ຮ່ວມ​ມື​ໃນ​ພາກ​ພື້ນ ​ແລະ ​ໃນ​ໂລກ.

ນອກນັ້ນ, ໃນຕອນ​ເຊົ້າ ຂອງ ​ວ​ັນ​ທີ03 ມິ​ຖຸ​ນາ 2016, ສະ​ຫາຍປອນາງ ສູນ​ທອນ ໄຊ​ຍ​ະ​ຈັກ ພ້ອມ​ດ້​ວຍ​ຄະ​ນະຍັງ​ໄດ້​ພົບ​ປະ​ເຮັດ​ວຽກ​ ກັບພະ​ນ​ະ​ທ່ານ ຕາ​ເກ​ໂອະ ກາ​ວາ​ມູ​ລະ, ປະ​ທານ​ຄະ​ນະ​ກຳ​ມະ​ການ​ເລືອກ​ຕັ້ງ​ຂອງ​ພັກ​ເສ​ລີ​ປະຊາ​ທິ​ປະ​ໄຕ​ຍີ່​ປຸ່ນ (ທີ່​ເປັນ​ພັກ​ກຳ​ອຳ​ນາດ), ປະ​ທານສະ​ພາ​ສະ​ມາ​ຄົມ​ມິດ​ຕະ​ພາບ ລາວ​-ຍີ່​ປຸ່ນ ເຊິ່ງ​ເປັນ​ຄັ້ງ​ທຳ​ອິດ​ທີ່​ໄດ້​ພົບໃນ​ນາມ​ເປັນ​ຄະ​ນະ​ຜູ້​ແທນ​ສາຍ​ພັກ ເຊິ່ງ​ທັງ​ສອງ​ຝ່າຍ ໄດ້​ແຈ້ງ​ໃຫ້​ກັນ​ຊາ​ບ​ສະ​ພາບ​ການ​ອັນ​ພົ້ນ​ເດັ່ນ​ຂອງ​ແຕ່​ລະ​ພັກ, ແຕ່​ລະ​ປະ​ເທດ ແລະ ຕີລາ​ຄາ​ວ່າ ການ​ເລີ່ມ​ຕົ້ນ​ການ​ພົວ​ພັນ​ດ້ານ​ພັກ ນີ້ ຈະເປັນ​ການ​ຊຸກ​ຍູ້​ການ​ພົວ​ພັນມິດ​ຕະ​ພາບ ແລະ ການ​ຮ່ວມ​ມື ລະ​ຫວ່າງ 2 ປະ​ເທດ ລາວ-ຍີ່​ປຸ່ນ ໃຫ້​ນັບ​ມື​້​ນັບໄດ້​ຮັບ​ການ​ຂະ​ຫຍາຍ​ຕົວ​ຢ່າງບໍ່​ຢຸດຢັ້ງ.

ໃນໄລ​ຍ​ະຢູ່​ຢ້​ຽມ​ຢາມ, ສະ​ຫາຍປອ ນາງ ສູນ​ທອນ ໄຊ​ຍ​ະ​ຈັກ ພ້ອມ​ດ້​ວຍ​ຄະ​ນະ ຍັງໄດ້​ຢ້ຽມ​ຢາມ​ສະ​ຖານ​ທີ່​ສຳ​ຄັນທາງປະ​ຫວັດ​ສາດ, ວັດ​ທະ​ນະ​ທຳ​ຈຳ​ນວນ​ໜຶ່ງ ຢູ່ນະ​ຄອນ​ຫລວງ​ໂຕ​ກຽວ ຂອງຍີ່​ປຸ່ນ.