ໂດຍຕອບສະໜອງຕາມຄຳເຊື້ອເຊີນຂອງ ພັກກອມມູນິດຝຣັ່ງ, ຄະນະຜູ້ແທນພັກ ປະຊາຊົນ ປະຕິວັດລາວ ນຳໂດຍ ສະຫາຍ ສົມພອນ ສີຈະເລີນ, ຮອງຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ໄດ້ເຂົ້າຮ່ວມກອງປະຊຸມໃຫຍ່ ຄັ້ງທີ 37 ຂອງພັກກອມມູນິດຝຣັ່ງ, ຊຶ່ງໄດ້ຈັດຂຶ້ນແຕ່ວັນທີ 2-5 ມິຖຸນາ 2016, ທີ່ ນະຄອນຫຼວງປາຣີ, ສາທາລະນະລັດ ຝຣັ່ງ.

ກອງປະຊຸມໃຫຍ່ ຄັ້ງທີ 37 ຂອງພັກກອມມູນິດຝຣັ່ງ ເປັນເຫດການການເມືອງທີ່ມີຄວາມໝາຍສຳຄັນໃນຊີວິດການເມືອງຂອງພັກກອມມູນິດ ແລະ ຊາວຜູ້ອອກແຮງງານຝຣັ່ງ, ກອງປະຊຸມໃຫຍ່ໄດ້ໄຂຂຶ້ນໃນທ່າມກາງສະພາບແວດລ້ອມສາກົນ ແລະ ພາກພື້ນທີ່ຜັນແປໄປຢ່າງສັບສົນ. ກອງປະຊຸມໃຫຍ່ ໄດ້ສະຫຼຸບຕີລາຄາການຜັນແປຂອງສະພາບການສາກົນ ແລະ ພາຍໃນປະເທດ, ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 36 ຂອງພັກວາງອອກ, ຄົ້ນຄວ້າ ແລະ ຮັບຮອງເອົາມະຕິກອງປະຊຸມໃຫຍ່ ຄັ້ງທີ 37 ເປັນຕົ້ນແມ່ນການກຳນົດທິດທາງໃນການສືບຕໍ່ເພີ່ມທະວີປັບປຸງບົດບາດການນຳພາ ແລະ ການຈັດຕັ້ງຂອງພັກໃຫ້ໜັກແໜ້ນເຂັ້ມແຂງ, ພ້ອມກຳນົດເປົ້າໝາຍສູ້ຊົນແນໃສ່ສ້າງສັງຄົມຝຣັ່ງ ເພື່ອສ່ວນລວມ, ເພີ່ມການພົວພັນຮ່ວມມືກັບພັກຝ່າຍ ແລະ ກຳລັງທີ່ກ້າວໜ້າໃນໂລກ. ກອງປະຊຸມໃຫຍ່ ໄດ້ເລືອກຕັ້ງຄະນະບໍລິຫານງານສູນກາງພັກສະໄໝທີ 37.

ກອງປະຊຸມໃຫຍ່ຄັ້ງນີ້ມີຜູ້ແທນສົມບູນເຂົ້າຮ່ວມ 600 ກວ່າສະຫາຍ ແລະ ແຂກທີ່ຖືກເຊີນຈາກພັກການເມືອງ ແລະ ອົງການຈັດຕັ້ງຕ່າງໆໃນໂລກເຂົ້າຮ່ວມຮ້ອຍກວ່າຄະນະຈາກ 60 ກວ່າປະເທດ, ຄະນະຜູ້ແທນພັກເຮົາໄດ້ພົບປະແລກປ່ຽນຄຳຄິດຄຳເຫັນກັບພັກກອມມູນິດຝຣັ່ງ ແລະ ພັກອ້າຍນ້ອງຈຳນວນໜຶ່ງ ກ່ຽວກັບ ການຮ່ວມມືສອງຝ່າຍ, ສະພາບການພາກພື້ນ ແລະ ສາກົນ ທີ່ຕ່າງຝ່າຍມີຄວາມສົນໃຈ.