ໂດຍຕອບສະໜອງຕາມການເຊື້ອເຊີນຂອງ ພະນະທ່ານ ຊິນໂຊະ ອາເບະ, ນາຍົກລັດຖະມົນຕີ ແຫ່ງ ຍີ່ປຸ່ນ, ໃນຖານະປະເທດເຈົ້າພາບ ແລະ ປະທານກອງປະຊຸມສຸດຍອດ ກຸ່ມ ຈີ7. ໃນວັນທີ 26-27 ພຶດສະພາ 2016, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ໃນຖານະປະທານໝູນວຽນອາຊຽນ, ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມພົບປະກັບພາຍນອກຂອງ ກຸ່ມ ຈີ7, ທີ່ ແຂວງມິເອະ, ປະເທດ ຍີ່ປຸ່ນ.
ໃນວັນທີ 27 ພຶດສະພາ 2016, ພະນະທ່ານ ນາຍົກລັດຖະມົນຕີ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມພົບປະກັບພາຍນອກຂອງກຸ່ມ ຈີ7 ຊຶ່ງຈັດຂຶ້ນຢູ່ທີ່ ເມືອງອິເຊະ-ຊິມະ, ແຂວງມິເອະ. ເຂົ້າຮ່ວມກອງປະຊຸມຄັ້ງນີ້ ມີຜູ້ນຳຂອງບັນດາປະເທດສະມາຊິກ ກຸ່ມ ຈີ7 ຄື: ຍີ່ປຸ່ນ, ການາດາ, ຝຣັ່ງ, ເຢຍລະມັນ, ອີຕາລີ, ອັງກິດ, ສະຫະລັດ ອາເມລິກາ ແລະ ສະຫະພາບ ເອີຣົບ. ສ່ວນບັນດາປະເທດທີ່ໄດ້ຮັບການເຊື້ອເຊີນໃຫ້ເຂົ້າຮ່ວມໃນການພົບປະມີ: ສປປ ລາວ ( ໃນຖານະປະທານໝູນວຽນອາຊຽນ ), ຫວຽດນາມ, ອິນໂດເນເຊຍ, ບັງກລາເທດ, ສີລັງກາ, ປາປົວ-ນິວກີນີ, ສາທາລະນະລັດ ຊາດ (ໃນຖານະປະທານ ສະຫະພາບ ອາຟຣິກາ). ນອກນັ້ນ, ກໍຍັງມີອົງການຈັດຕັ້ງພາກພື້ນ ແລະ ສາກົນຕ່າງໆ ກໍໄດ້ຖືກເຊີນເຂົ້າຮ່ວມ ເຊັ່ນ: ອົງການ ສະຫະປະຊາຊາດ, ທະນາຄານ ພັດທະນາອາຊີ, ທະນາຄານໂລກ, ກອງທຶນການເງິນສາກົນ ແລະ ອົງການເພື່ອການຮ່ວມມືທາງດ້ານເສດຖະກິດ ແລະ ການພັດທະນາ.
ກອງປະຊຸມ ໄດ້ປຶກສາຫາລື ແລະ ແລກປ່ຽນບົດຮຽນ ກ່ຽວກັບ ການພັດທະນາພາຍໃນປະເທດ ແລະ ພາກພື້ນຕ່າງໆ ເພື່ອຊອກຫາຊ່ອງທາງ ແລະ ມາດຕະການໃນການຊຸກຍູ້ການເຕີບໂຕທາງດ້ານເສດຖະກິດຂອງພາກພື້ນອາຊີ ກໍຄືການຮ່ວມມືເພື່ອບັນລຸວາລະ 2030 ເພື່ອການພັດທະນາທີ່ຍືນຍົງ ໂດຍຜ່ານການຊຸກຍູ້ການພັດທະນາພື້ນຖານໂຄງລ່າງທີ່ທັນສະໄໝ ແລະ ການສົ່ງເສີມການເຊື່ອມຈອດ ໃນຮູບແບບທີ່ປະກອບສ່ວນເຂົ້າໃນການຂະຫຍາຍຕົວທີ່ຍືນຍົງ ແລະ ການສ້າງພື້ນຖານທາງສັງຄົມ ເພື່ອຮັບມືກັບໄພພິບັດທາງທຳມະຊາດ ໄດ້ທັນການຢູ່ອາຊີ. ນອກນັ້ນ, ກໍຍັງໄດ້ປຶກສາຫາລືບັນຫາການຮັບປະກັນການເປີດກວ້າງ ແລະ ຄວາມໝັ້ນຄົງໃນທະເລ, ການຮ່ວມມືດ້ານສາທາລະນະສຸກ ແລະ ວຽກງານແມ່ຍິງ.
ໃນບາງຕອນບົດຄຳເຫັນຂອງ ທ່ານນາຍົກ ທອງລຸນ ສີສຸລິດ, ຊຶ່ງໄດ້ກ່າວຕໍ່ກອງປະຊຸມວ່າ “ປະຊາຄົມເສດຖະກິດອາຊຽນ ໄດ້ຮັບການສ້າງຕັ້ງຂຶ້ນຢ່າງເປັນທາງການ ໃນທ້າຍປີ 2015, ເຊິ່ງເປັນເວລາດຽວກັນທີ່ບັນດາປະເທດໃນທົ່ວໂລກ ພວມສຸມໃສ່ການຈັດຕັ້ງປະຕິບັດວາລະ 2030 ຂອງສະຫະປະຊາຊາດ ເພື່ອການພັດທະນາທີ່ຍືນຍົງ. ຕະຫຼອດໄລຍະເກືອບ 5 ທົດສະວັດ ແຫ່ງ ການເຕີບໃຫຍ່ຂະຫຍາຍຕົວຂອງອາຊຽນ, ໄດ້ມີຄວາມພະຍາຍາມໃນການກະກຽມຄວາມພ້ອມພື້ນຖານ ໃນການສ້າງປະຊາຄົມເສດຖະກິດອາຊຽນ, ໂດຍສະເພາະແມ່ນຄວາມພະຍາຍາມໃນການເຊື່ອມໂຍງພາກພື້ນ ແລະ ສາກົນ. ຢ່າງໃດກໍ່ຕາມ, ບັນຫາທ້າທາຍຕົ້ນຕໍສຳລັບອາຊຽນໃນການບັນລຸເປົ້າໝາຍດັ່ງກ່າວນັ້ນແມ່ນພາຍໃນອາຊຽນ ຍັງມີຄວາມແຕກໂຕນກັນດ້ານການພັດທະນາ ແລະ ໂຄງລ່າງເສດຖະກິດ ແລະ ອີກປັດໃຈໜຶ່ງສຳຄັນຕົ້ນຕໍແມ່ນຍ້ອນໂຄງລ່າງພື້ນຖານທີ່ບໍ່ພຽງພໍ ແລະ ບໍ່ໄດ້ມາດຕະຖານ ອັນເປັນສິ່ງກີດຂວາງຫຼັກໃຫ້ແກ່ການຂະຫຍາຍຕົວທາງດ້ານເສດຖະກິດ, ການຈໍລະຈອນສິນຄ້າ, ການບໍລິການ ແລະ ການລົງທຶນ ຢູ່ໃນອາຊຽນ.”
ພ້ອມກັນນີ້, ທ່ານນາຍົກ ທອງລຸນ ສີສຸລິດ ກໍໄດ້ຢໍ້າວ່າ “ລັດຖະບານ ແຫ່ງ ສປປ ລາວ ໄດ້ໃຫ້ຄວາມສຳຄັນຕໍ່ການຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອຍາວນານກັບທຸກປະເທດໃນທົ່ວໂລກ, ລວມທັງປະເທດສະມາຊິກ ກຸ່ມ ຈີ7 ແລະ ຕີລາຄາສູງຕໍ່ການຊ່ວຍເຫຼືອຂອງປະເທດສະມາຊິ ກຸ່ມ ຈີ7, ໃນຂອບສອງຝ່າຍ ແລະ ຫຼາຍຝ່າຍ, ໃຫ້ແກ່ ສປປ ລາວ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງລາວ ທີ່ອີງໃສ່ເປົ້າໝາຍສະຫັດສະວັດ ເພື່ອການພັດທະນາຂອງສະຫະປະຊາຊາດ, ໂດຍສະເພາະແມ່ນການພັດທະນາຊັບພະຍາກອນມະນຸດໃນດ້ານຕ່າງໆ ແລະ ການພັດທະນາເສດຖະກິດແບບຍຶນຍົງ ອັນໄດ້ປະກອບສ່ວນອັນສຳຄັນເຂົ້າໃນຄວາມພະຍາຍາມຂອງລາວ ໃນການລົບລ້າງຄວາມທຸກຍາກ ແລະ ນຳເອົາປະເທດຊາດຫຼຸດພົ້ນອອກຈາກສະຖານະພາບຄວາມດ້ອຍພັດທະນາໃນປີ 2020 ແລະ ສ້າງເງື່ອນໄຂເພື່ອກ້າວເຂົ້າສູ່ການຫັນເປັນອຸດສະຫະກຳ ແລະ ທັນສະໄໝເທື່ອລະກ້າວ. ໃນຖານະທີ່ເປັນປະເທດດ້ອຍພັດທະນາທີ່ບໍ່ມີຊາຍແດນຕິດທະເລ, ສປປ ລາວ ຍັງຕ້ອງການການສະໜັບສະໜູນເພີ່ມຂຶ້ນ ທັງທາງດ້ານວິຊາການ ແລະ ທາງດ້ານການເງິນ ຈາກບັນດາຜູ້ໃຫ້ທຶນສາກົນ ເພື່ອເຮັດໃຫ້ຄວາມໝາຍໝັ້ນ ໃນການຫັນປ່ຽນປະເທດຈາກທີ່ບໍມີຊາຍແດນຕິດທະເລ ໃຫ້ການເປັນປະເທດເຊື່ອມຕໍ່ ແລະ ເປັນສູນກາງແຫ່ງເຄືອຂ່າຍຄົມມະນາຄົມຂົນສົ່ງຂອງພາກພື້ນ, ໂດຍສະເພາະໃນການພັດທະນາພື້ນຖານໂຄງລ່າງເຊັ່ນ: ຖະໜົນຫົນທາງ, ທ່າເຮືອ, ເສັ້ນທາງລົດໄຟ, ການຂົນສົ່ງທາງອາກາດ ແລະ ອື່ນໆ.”
ນອກຈາກການເຂົ້າຮ່ວມກອງປະຊຸມດັ່ງກ່າວ, ທ່ານນາຍົກລັດຖະມົນຕີ ແຫ່ງ ສປປ ລາວ ຍັງໄດ້ພົບປະກັບ ທ່ານນາຍົກລັດຖະມົນຕີຍີ່ປຸ່ນ ເພື່ອປຶກສາຫາລື ກ່ຽວກັບ ການຮ່ວມມື ລາວ-ຍີ່ປຸ່ນ ເຊິ່ງສອງຝ່າຍໄດ້ຕີລາຄາສູງຕໍ່ໝາກຜົນການຮ່ວມມືໃນໄລຍະຜ່ານມາ ພ້ອມທັງສືບຕໍ່ເສີມຂະຫຍາຍສາຍພົວພັນທີ່ເປັນມູນເຊື້ອໃຫ້ໜັກແໜ້ນຂຶ້ນກວ່າເກົ່າ. ນອກຈາກນັ້ນ, ກໍໄດ້ພົບປະສອງຝ່າຍບໍ່ເປັນທາງການ ກັບທ່ານນາຍົກລັດຖະມົນຕີ ອີຕາລີ ແລະ ນາຍົກລັດຖະມົນຕີ ການາດາ ໃນຮູບແບບຢືນເອົາ ໃນໄລຍະກອງປະຊຸມ ເພື່ອທັກທາຍແນະນຳຕົວ ແລະ ສະແດງຄວາມຊົມເຊີຍຕໍ່ ພະນະທ່ານ ທອງລຸນ ສີສຸລິດ ທີ່ໄດ້ຮັບໜ້າທີ່ເປັນ ນາຍົກລັດຖະມົນຕີ ແຫ່ງ ສປປ ລາວ.
