ໃນວັນທີ 28 ກັນຍາ 2018, ທີ່ສຳນັກງານໃຫຍ່ຂອງອົງການສະຫະປະຊາຊາດ (ສປຊ) ທີ່ ນິວຢອກ, ສະຫະລັດອາເມລິກາ, ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ທ່ານ ນິໂກລາ ເຣັນຊີ, ລັດຖະມົນຕີກະຊວງການຕ່າງປະເທດ ແລະ ການເມືອງ ແຫ່ງ ສາທາລະນະລັດ ຊັງມາຣິໂນ ໄດ້ຮ່ວມກັນລົງນາມສັນຍາວ່າດ້ວຍ ການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ຊັງມາຣິໂນ ໂດຍມີນັກການທູດ ຂອງທັງສອງຝ່າຍ ເຂົ້າຮ່ວມເປັນສັກຄີພິຍານ. ຈຸດປະສົງຂອງການສ້າງຕັ້ງສາຍພົວພັນການທູດດັ່ງກ່າວແມ່ນເພື່ອພັດທະນາ ແລະ ເພີ້ມທະວີມິດຕະພາບ ແລະ ການຮ່ວມມືດ້ານການເມືອງ, ເສດຖະກິດ-ສັງຄົມ ແລະ ວັດທະນາທຳ ລະຫວ່າງສອງປະເທດ ແລະ ປະຊາຊົນສອງຊາດ. ສັນຍາດັ່ງກ່າວ ຈະມີຜົນບັງຄັບໃຊ້ນັບແຕ່ວັນທີທີ່ໄດ້ຮັບແຈ້ງເປັນລາຍລັກອັກສອນສະບັບສຸດທ້າຍຂອງຄູ່ສັນຍາ ກ່ຽວກັບການສຳເລັດຂັ້ນຕອນພາຍໃນຂອງຕົນທີ່ຈຳເປັນໃນການມີຜົນບັງຄັບໃຊ້, ເຊິ່ງຈະເຮັດໃຫ້ສປປລາວມີສາຍພົວພັນການທູດກັບ141 ປະເທດ ຈາກຈຳນວນປະເທດສະມາຊິກອົງການສະຫະປະຊາຊາດທັງຫມົດ 193 ປະເທດໃນທົ່ວໂລກ.

ໃນວັນທີ04 ຕຸລາ 2018, ທີ່ ກະຊວງການຕ່າງປະເທດ, ສະຫາຍ ສະເຫຼີມ ໄຊກົມມະສິດ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມອຳລາ ຂອງ ສະຫາຍ ວາງ ເວີນທຽນ, ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາຊົນຈີນ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ. ໃນ​ໂອ​ກາດ​ດັ່ງ​ກ່າວ, ສະຫາຍ ສະເຫຼີມໄຊ ກົມມະສິດ ໄດ້​ສະ​ແດງ​ຄວາມ​ຍິນ​ດີ​ຕ້ອນຮັບ​ ​ແລະຊົມ​ເຊີຍ ​ສະຫາຍ ວາງ ເວີນທຽນ ທີ່​ໄດ້​ສຳເລັດໜ້າ​ທີ່​ການ​ທູດຢູ່ສ​ປ​ປ​ ລາວ ​ແລະ ສະ​ແດງ​ຄວາມ​ຂອບ​ໃຈ​ຢ່າ​ງຈິງ​ໃຈ​ ຕໍ່​ການ​ສະໜັບ​ສະ​ໜຸນ ​ແລະ​ ການ​ຊ່ວຍ​ເຫຼືອທາງດ້ານວັດຖຸ ແລະ ຈິດໃຈຂອງ ສະຫາຍ ວາງ ເວີນທຽນ ກໍຄືຈາກລັດຖະບານຂອງ​ ສປ ຈີນ ທີ່ມີ​ຕໍ່ ສ​ປ​ປ ລາວ ໃນໄລຍະທີ່ທ່ານດຳລົງດຳແໜ່ງຢູ່ ສປປ ລາວ ອັນໄດ້​ປະ​ກອບ​ສ່ວນ​ຢ່າງໃຫຍ່ຫຼວງ​ໃນ​ການພັດ​ທະ​ນາ​ ເສດຖະກິດ-ສັງຄົມ ຂອງ ສປປ ລາວ. ພິເສດ ສະຫາຍ ສະເຫຼີມໄຊ ກົມມະສິດ ຍັງໄດ້ສະແດງຄວາມຂອບໃຈເປັນຢ່າງສູງທີ່ ລັດຖະບານຈີນໄດ້ໃຫ້ການຊ່ວຍເຫຼືອແກ່ ສປປ ລາວ ດ້ານມະນຸດສະທຳ ທີ່ເປັນວັດຖຸ ແລະ ປັດໄຈຕ່າງໆ ລວມທັງເງິນ ແລະ ທີມງານກູ້ໄພ ເພື່ອໄປຊ່ວຍປະຊາຊົນຜູ້ທີ່ໄດ້ຖືກເຄາະຮ້າຍ ແລະ ໄດ້ຮັບຜົນກະທົບຈາກໄພພິບັດທຳມະຊາດຢູ່ເມືອງສະໜາມໄຊ, ແຂວງອັດຕະປື ແລະ ຢູ່ຫຼາຍແຂວງຂອງ ສປປ ລາວ ໃນທ້າຍ​​ເດືອນກໍລະກົດຜ່ານ​ມາ.

ພ້ອມ​ດຽວ​ກັນ, ​ສະຫາຍ ສະເຫຼີມໄຊ ກົມມະສິດ ຍັງໄດ້ຕາງໜ້າລັດຖະບານ ແຫ່ງ ສປປ ລາວ ມອບຫຼຽນໄຊມິດຕະພາບໃຫ້ ສະຫາຍ ວາງ ເວີນທຽນ ເພື່ອສະແດງຄວາມຍ້ອງຍໍຊົມເຊີຍຜົນຕໍ່ສຳເລັດ ແລະ ຜົນງານອັນໃຫຍ່ຫຼວງຂອງ ສະຫາຍ ໃນໄລຍະການປະຕິບັດໜ້າທີ່ທາງການທູດ ຢູ່ ສປປ ລາວ. ພ້ອມທັງເປັນການສົ່ງເສີມສາຍ​ພົວ​ພັນ​ມິດ​ຕະ​ພາບ ອັນເປັນມູນເຊື້ອ ແລະ ການ​ພົວ​ພັນ​ຮ່ວມ​ມືຍຸດທະສາດຮອບດ້ານ, ໝັ້ນຄົງຍາວນານ ຕາມທິດ 4 ດີ ແລະ ການພົວພັນຖານເພື່ອນມິດສະຫາຍອ້າຍນ້ອງຮ່ວມຊະຕາກຳສັງຄົມນິຍົມ ລະ​ຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຈີນໃຫ້ແຕກດອກອອກຜົນຍິ່ງໆຂຶ້ນ ແລະ ກ້າວຂຶ້ນສູ່ລະດັບສູງອັນໃໝ່. 

ໃນໂອກາດດຽວກັນ, ສະຫາຍວາງ ເວີນທຽນ ກໍ່ໄດ້ສະແດງຄວາມຂອບໃຈ ຕໍ່ ລັດຖະບານ ສປປ ລາວ ທີ່ໄດ້ອຳນວຍຄວາມສະດວກແກ່ການເຄື່ອນໄຫວການທູດຂອງຕົນ ພິເສດແມ່ນການມອບຫຼຽນໄຊມິດຕະພາບອັນສົມກຽດໃຫ້ແກ່ທ່ານ, ພ້ອມທັງຢືນຢັນວ່າ ຈະສືບຕໍ່ເຮັດສຸດຄວາມສາມາດ ເພື່ອປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ສປປ ລາວ-ສປ ຈີນ ທີ່ມີມາແຕ່ດົນນານແລ້ວນັ້ນ ໃຫ້ຈະເລີນງອກງາມຍິ່ງໆຂຶ້ນ.

ກອງປະຊຸມປະຈຳປີຂອງສະມັດຊາໃຫຍ່ ສະຫະປະຊາຊາດ ສະໄໝທີ 73 ໄດ້ໄຂຂຶ້ນຢ່າງເປັນທາງການໃນວັນທີ 18 ກັນຍາ 2018 ທີ່ສຳນັກງານໃຫຍ່ອົງການ ສປຊ ທີ່ນະຄອນນິວຢອກ, ສ.ອາເມລິກາ ພາຍໃຕ້ຫົວຂໍ້ "ເຮັດໃຫ້ອົງການ ສປຊ ມີຄຸນຄ່າກັບໝົດທຸກຄົນ: ການນຳພາໃນຂອບເຂດທົ່ວໂລກ ແລະ ຄວາມຮັບຜິດຊອບຮ່ວມກັນ ເພື່ອໃຫ້ສັງຄົມມີສັນຕິພາບ, ມີຄວາມເທົ່າທຽມກັນ ແລະ ຍືນຍົງ (Making the United Nations relevant all people: Global leadership responsibilities for peace, equitable and sustainable societies). ໃນກອງປະຊຸມພາກອະພິປາຍທົ່ວໄປ ແຕ່ວັນທີ 25 ກັນຍາ ເຖິງ 1 ຕຸລາ 2018 ໄດ້ມີລະດັບປະມຸກລັດ/ຫົວໜ້າລັດຖະບານ ແລະ ຮອງປະທານປະເທດ 134 ທ່ານ, ລະດັບຮອງນາຍົກລັດຖະມົນຕີ ແລະ ລັດຖະມົນຕີ 55 ທ່ານ ແລະ ຮອງລັດຖະມົນຕີ 4 ທ່ານ ເຂົ້າຮ່ວມ ແລະ ຜັດປ່ຽນກັນຂຶ້ນກ່າວປາໄສ ແລະ ສະແດງທັດສະນະຂອງບັນດາປະເທດ ຕໍ່ສະພາບການພົ້ນເດັ່ນໃນພາກພື້ນ ແລະ ສາກົນ, ເປັນຕົ້ນການແກ້ໄຂບັນຫາຄວາມທຸກຍາກ, ບັນຫາຂໍ້ຂັດແຍ່ງຕ່າງໆ, ການລົບລ້າງອາວຸດນິວເຄຼຍ, ບັນຫາຊາວອົບພະຍົບ ແລະ ການຍົກຍ້າຍຖິ່ນຖານ, ການປ່ຽນແປງດີນຟ້າອາກາດ, ການຈັດຕັ້ງປະຕິບັດວາລະເພື່ອການພັດທະນາ 2030, ການເປີດກວ້າງການຮ່ວມມືໃນຂອບຫລາຍຝ່າຍ, ການປະຕິຮູບ ແລະ ປັບປຸງອົງການສະຫະປະຊາຊາດ.