ໃນຕອນເຊົ້າຂອງວັນທີ 14 ມີຖຸນາ 2016, ທີ່ ສະຖານເອກອັກຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາຣາຊະອານາຈັກໄທ ທີ່ ບາງກອກ, ໄດ້​​ເປີດ​ບັ້ນ ​ເຊື່ອມ​ຊຶມມະຕິ​ ກອງ​ປະຊຸມ​ໃຫຍ່​ ຄັ້ງ​ທີ X ຂອງ​ພັກ ໃຫ້​ສະມາຊິກ​ພັກ, ພະນັກງານ​ສະຖານທູດ ​ໂດຍ​ການບັນຍາຍຂອງ ສະຫາຍ ຫລີ ບຸນຄ້ຳ, ເລຂາໜ່ວຍພັກ ທັງເປັນເອກອັກຄະລັດຖະທູດ ແຫ່ງ ສປປ ລາວ ປະຈຳຣາຊາອານາຈັກໄທ.

ການຈັດຕັ້ງເຊື່ອມຊຶມເອກະສານຄັ້ງນີ້ ປະກອບມີເອກະສານຜົນສຳເລັດການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກ, ເອກະສານບັນດາຄາດໝາຍໃຫຍ່ທີ່ ກອງປະຊຸມໃຫຍ່ ຄັ້ງທີ X ຂອງພັກວາງອອກສຳລັບໄລຍະແຕ່ນີ້ຮອດປີ 2030, 2025, 2020, ເອກະສານທິດທາງວຽກງານຈຸດສຸມໃນແຕ່ລະຂົງເຂດທີ່ຕ້ອງຈັດຕັ້ງປະຕິບັດ ໃນຊຸມປີຕໍ່ໜ້າ 2016 - 2020 ຂອງແຜນພັດທະນາເສດຖະກິດສັງຄົມ 5 ປີ ຄັ້ງທີ 8 ເພື່ອນຳພາປະເທດຊາດຫຼຸຸດພົ້ນອອກຈາກສະຖານະພາບດ້ອຍພັດທະນາ.

ພ້ອມນີ້, ໄດ້ມີຜູ້ເຂົ້າຮ່ວມປະກອບຄຳຄິດຄຳເຫັນປະກອບໃສ່ບັນດາເນື້ອໃນເອກະສານຕ່າງໆ ເພື່ອເຮັດໃຫ້ລັດຖະບານກໍຄືອົງການປົກຄອງທ້ອງຖິ່ນ ໄດ້ເອົາໃຈໃສ່ປະຕິບັດພາລະບົດບາດຄຸ້ມຄອງມະຫາພາກ, ຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຕາມກົດໝາຍ, ເອົາໃຈໃສ່ແກ້ໄຂຂອດຂອງການບໍລິຫານວຽກງານໃຫ້ກະທັດຮັດກວ່າເກົ່າ, ຮັບປະກັນໃຫ້ປະຊາຊົນສາມາດຊົມໃຊ້ການບໍລິການຂອງລັດດີຂຶ້ນເທື່ອລະກ້າວ, ສຸມໃສ່ແບ່ງຂັ້ນຄຸ້ມຄອງ ແລະ ດັດແປງກົນໄກການ ປະສານງານ ລະຫວ່າງຂະແໜງການສູນກາງດ້ວຍກັນ ແລະ ລະຫວ່າງສູນກາງກັບທ້ອງຖິ່ນໃຫ້ຈະແຈ້ງ ແລະ ກົມກຽວ, ອົງການປົກຄອງທ້ອງຖິ່ນລວມທັງຢູ່ຂັ້ນບ້ານຢູ່ຫຼາຍບ່ອນ ໄດ້ຈັດຕັ້ງປະຕິບັດບັ້ນທົດລອງວຽກງານ 3 ສ້າງ ຊຶ່ງໄດ້ຮັບຜົນສຳເລັດໃນເບື້ອງຕົ້ນເຮັດໃຫ້ຮາກຖານບ້ານ, ເມືອງໄດ້ຮັບການປັບປຸງ ແລະ ພັດທະນາໃຫ້ມີຄວາມໜັກແໜ້ນເຂັ້ມແຂງຂຶ້ນເລື້ອຍໆ.

ໃນໂອກາດກ່າວປິດບັ້ນເຊື່ອມຊຶມຄັ້ງນີ້, ທ່ານ ຫລີ ບຸນຄ້ຳ ໄດ້ກ່າວສະແດງຄວາມຂອບໃຈ ມາຍັງບັນດາພະນັກງານສະຖານທູດທັງໝົດ ທີ່ໄດ້ພ້ອມກັນຕັ້ງໜ້າ ແລະ ເອົາໃຈໃສ່ເຂົ້າຮັບຟັງດ້ວຍຄວາມຕັ້ງໃຈ ພ້ອມທັງໄດ້ຮຽກຮ້ອງໃຫ້ຜູ້ທີ່ເຂົ້າຮ່ວມຈົ່ງເຊີດຊູຄວາມສາມາຄີໃຫ້ເປັນປືກແຜ່ນ ແລະ ປະຕິບັດວຽກງານທີ່ໄດ້ຮັບມອບໝາຍ ໃຫ້ປະສົບຜົນສຳເລັດຢ່າງຈົບງາມ.

ໃນຕອນຄ່ຳຂອງວັນທີ 03 ມີຖຸນາ ທີ່ຜ່ານມາ, ທາງສະຖານທູດ ຍັງໄດ້ຈັດກອງປະຊຸມເພື່ອສະຫລຸບຜົນງານ 6 ເດືອນຕົ້ນປີ ແລະ ຜ່ານທິດທາງແຜນການສຳລັບ 6 ເດືອນທ້າຍປີຂອງຕົນຂຶ້ນ ທີ່ສະໂມສອນຂອງສະຖານທູດ ໂດຍການເຂົ້າຮ່ວມຂອງ ທ່ານ ຫລີ ບຸນຄ້ຳ ພ້ອມດ້ວຍພະນັກງານອ້າຍເອື້ອຍນ້ອງໝົດທຸກຄົນ ພາຍໃນສະຖານທູດ. ໃນໂອກາດດັ່ງກ່າວ ຍັງມີການເຜີຍແຜ່ມະຕິຄຳສັ່ງຕ່າງຂອງຂັ້ນເທິງອີກດ້ວຍ.