ນະຄອນຫຼວງວຽງຈັນ, 12 ສິງຫາ 2021
ພະນະທ່ານ,
ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງ ສົ່ງຄຳຊົມເຊີຍອັນອົບອຸ່ນ ແລະ ພອນໄຊອັນປະເສີດ ມາຍັງພະນະທ່ານ ເນື່ອງໃນໂອກາດ ໄດ້ຮັບແຕ່ງຕັ້ງເປັນ ລັດຖະມົນຕີກະຊວງການຕ່າງປະເທດ ແລະ ສະມາຄົມຄົນອານເຊຣີຢູ່ຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນ ອານເຊຣີ.
ນະຄອນຫຼວງວຽງຈັນ, ວັນທີ 11 ສິງຫາ 2021
ສະຫາຍ ສີ ຈິ້ນຜິງ ທີ່ນັບຖື,
ຕາງໜ້າໃຫ້ປະຊາຊົນລາວບັນດາເຜົ່າ ແລະ ໃນນາມສ່ວນຕົວ, ຂ້າພະເຈົ້າຂໍສະແດງຄວາມ ຂອບໃຈ ຢ່າງຈິງໃຈ ມາຍັງ ສະຫາຍ ແລະ ຜ່ານສະຫາຍໄປຍັງ ປະຊາຊົນຈີນອ້າຍນ້ອງ ທີ່ຍາມໃດ ກໍ່ໄດ້ເອົາໃຈໃສ່ ໃຫ້ການສະໜັບສະໜູນ ແລະ ຊ່ວຍເຫຼືອ ແກ່ພວກຂ້າພະເຈົ້າ ຢ່າງຮອບດ້ານ ແລະ ສະເໝີຕົ້ນສະເໝີປາຍຕະຫລອດມາ, ເຊີ່ງການສະໜັບສະໜູນຊ່ວຍເຫລືອດັ່ງກ່າວ ໄດ້ປະກອບສ່ວນສຳຄັນເຂົ້າໃນການພັດທະນາ ເສດຖະກິດ-ສັງຄົມ ແຫ່ງຊາດ ກໍຄື ການຫຼຸດຜ່ອນຄວາມທຸກຍາກ ຂອງປະຊາຊົນລາວບັນດາເຜົ່າ ລວມທັງ ການຊ່ວຍເຫລືອໃນການສະກັດກັ້ນການແຜລະບາດພະຍາດ ໂຄວິດ 19 ຢູ່ ສປປ ລາວ, ເຊີ່ງນັບແຕ່ມີການລະບາດຮອບໃໝ່ ໃນກາງເດືອນເມສາ 2021 ເຖິງປັດຈຸບັນນີ້, ສະຫາຍຈີນ ກໍໄດ້ສືບຕໍ່ໃຫ້ການຊ່ວຍເຫລືອເປັນພິເສດ ຕະຫລອດມາ ໂດຍໄດ້ສົ່ງທິມແພດຊ່ຽວຊານ ເຂົ້າໄປເຮັດວຽກຮ່ວມກັບທິມແພດລາວ, ອຸປະກອນການແພດ, ຢາປິ່ນປົວ ແລະ ຢາວັກຊີນ ເປັນຈຳນວນຫລາຍລ້ານໂດສ.
ສານສະແດງຄວາມເຫັນໃຈ
ນະຄອນຫຼວງວຽງຈັນ, ວັນທີ11 ສິງຫາ 2021
ພະນະທ່ານ ດຣ. ສຸບຣາມານຳ ຈາຍຊານເກີ
ລັດຖະມົນຕີກະຊວງການຕ່າງປະເທດ
ແຫ່ງ ສາທາລະນະລັດ ອິນເດຍ
ທີ່ ນິວແດນລີ
ພະນະທ່ານ,
ຂ້າພະເຈົ້າ ໄດ້ຊາບຂ່າວເຫດການນ້ຳຖ້ວມ ຢູ່ລັດທາງພາກຕາເວັນຕົກຂອງປະເທດອິນເດຍ ອັນໄດ້ສ້າງຄວາມເສຍຫາຍ ໃຫ້ແກ່ຊີວິດ ແລະ ຊັບສິນຂອງປະຊາຊົນ ອິນເດຍ ເປັນຈຳນວນຫຼວງຫຼາຍ.
ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍຄື ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສຍໃຈ ແລະ ເຫັນໃຈ ມາຍັງ ພະນະທ່ານ, ລັດຖະບານ ແລະ ປະຊາຊົນ ອິນເດຍ ໂດຍສະເພາະຄອບຄົວຂອງຜູ້ໄດ້ຮັບເຄາະຮ້າຍຈາກໄພທຳມະຊາດໃນຄັ້ງນີ້.