ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ພ້ອມດ້ວຍຄະນະຜູ້ແທນ ສປປ ລາວ ຈະເດີນທາງເຂົ້າຮ່ວມ ກອງປະຊຸມເວທີປຶກສາຫາລືເສດຖະກິດໂລກ ວ່າດ້ວຍ ອາຊຽນ ( World Economic Forum on ASEAN), ຊຶ່ງຈະຈັດຂຶ້ນແຕ່ວັນທີ 10-12 ພຶດສະພາ 2017, ທີ່ ນະຄອນຫຼວງ ພະນົມເປັນ, ຣາຊະອານາຈັກ ກໍາປູເຈຍ. ກອງປະຊຸມດັ່ງກ່າວ ເປັນເວທີປຶກສາຫາລື, ແລກປ່ຽນຄວາມຄິດເຫັນນຳກັນ ຂອງການນຳລະດັບສູງຈາກຫຼາຍພາກສ່ວນ ລວມທັງພາກລັດ ແລະ ພາກທຸລະກິດ, ຊຶ່ງໄດ້ຈັດຂຶ້ນທຸກໆປີ ເພື່ອແນໃສ່ຮ່ວມມືກັນໃນການພັດທະນາເສດຖະກິດສັງຄົມຂອງແຕ່ລະປະເທດ ກໍ່ຄືພາກພື້ນ ແລະ ທົ່ວໂລກ ໃນການສ້າງອະນາຄົດຂອງໄວໜຸ່ມ ເພື່ອພ້ອມກັນເປັນກຳລັງແຮງສຳຄັນຂອງຍຸກສະໄໝການສ້າງເສດຖະກິດ ແລະ ຊອກຫາຊ່ອງທາງໃນການຮັບມື ແລະ ແກ້ໄຂບັນຫາສິ່ງທ້າທາຍຕໍ່ການພັດທະນາເສດຖະກິດ ທີ່ພາກພື້ນ ແລະ ທົ່ວໂລກພວມປະເຊີນ.

ຕອບສະໜອງຕາມຄຳເຊີນຂອງ ພະນະທ່ານ ລີ ຊຽນ ລຸງ, ນາຍົກລັດຖະມົນຕີ ແຫ່ງ ສາທາລະນະລັດ ສິງກະໂປ, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພອມດ້ວຍພັນລະຍາ ແລະ ຄະນະຜູ້ແທນ ສປປ ລາວ, ຈະເດີນທາງໄປຢ້ຽມຢາມທາງການ ທີ່ ສາທາສາລະນະລັດ ສິງກະໂປ, ໃນລະຫວ່າງວັນທີ 02-03 ພຶດສະພາ 2017, ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ລາວ ແລະ ສິງກະໂປ.

ຕອບສະໜອງຕາມຄໍາເຊີນຂອງ ສະຫາຍ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສະຫາຍ ຫງວຽນ ຊວັນ ຟຸກ, ນາຍົກລັດຖະມົນຕີ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ຈະເດີນທາງມາຢ້ຽມຢາມຢ່າງເປັນທາງການ ທີ່ ສາທາລະນະລັດ ປະຊາທິປະໄຕ ປະຊາຊົນລາວ ແຕ່ວັນທີ 26-27 ເມສາ 2017 ເພື່ອເພີ່ມທະວີ ແລະ ເສີມຂະຫຍາຍສາຍພົວພັນມິດຕະພາບ ທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງປະເທດລາວ ແລະ ຫວຽດນາມ ໃຫ້ແຕກດອກອອກຜົນຍິ່ງໆຂຶ້ນ.