ອົງການ ສປຊ ໄດ້ຈັດກອງປະຊຸມສະໄໝພິເສດ ຂອງສະມັດຊາໃຫຍ່ ສປຊ ຄັ້ງທີ 31 ແບບທາງໄກ ຂຶ້ນໃນລະຫວ່າງວັນທີ 3-4 ທັນວາ 2020, ທີ່ ນິວຢອກ ເພື່ອປຶກສາຫາລື ກ່ຽວກັບ ການແກ້ໄຂການລະບາດຂອງເຊື້ອພະຍາດ COVID-19. ຍ້ອນວ່າປັດຈຸບັນການແຜ່ລະບາດຂອງເຊື້ອພະຍາດອັກເສບປອດສາຍພັນໃໝ່ ຫຼື COVID-19 ສືບຕໍ່ເປັນໄພຄຸກຄາມຕໍ່ສຸຂະພາບຊີວິດຂອງປະຊາຊົນຫຼາຍລ້ານຄົນໃນທົ່ວໂລກ, ຈໍານວນຜູ້ຕິດເຊື້ອແມ່ນນັບມື້ນັບເພີ່ມຂຶ້ນ ແລະ ບໍ່ມີທ່າທີຈະຫຼຸດລົງ.
ໃນຕອນບ່າຍ ຂອງ ວັນທີ 1 ທັນວາ 2020 ທີ່ກະຊວງການຕ່າງປະເທດ, ທ່ານສະເຫຼີມໄຊກົມມະສິດ, ລັດຖະມົນຕີຕ່າງປະເທດແຫ່ງສປປລາວໄດ້ນຳພາຄະນະເຂົ້າຮ່ວມກອງປະຊຸຸມລັດຖະມົນຕີຕ່າງປະເທດອາຊຽນ-ອີຢູຄັ້ງທີ 23 ແບບທາງໄກພາຍໃຕ້ການເປັນປະທານຮ່ວມຂອງທ່ານ Vivian Balakrishnan ລັດຖະມົນຕີຕ່າງປະເທດ ສິງກະໂປແລະ ທ່ານ Josep Borrell ຮອງປະທານຄະນະກຳມາທິການເອີຣົບ, ຜູ້ຕາງໜ້າລະດັບສູງດ້ານວຽກງານການຕ່າງປະເທດ ແລະ ນະໂຍບາຍຄວາມໝັ້ນຄົງ ອີຢູ. ເຂົ້າຮ່ວມໃນກອງປະຊຸມຄັ້ງນີ້ ຍັງມີ ບັນດາລັດຖະມົນຕີຕ່າງປະເທດອາຊຽນ ແລະ ອີຢູ, ທ່ານເລຂາທິການໃຫ່ຍອາຊຽນ ແລະ ວິຊາການທີ່ກ່ຽວຂ້ອງຈໍານວນນື່ງ.
ກອງປະຊຸມສາມັນປະຈຳປີ ຄັ້ງທີ XXX ລະຫວ່າງ ຄະນະຜູ້ແທນຊາຍແດນລາວ-ຫວຽດນາມ ໄດ້ຈັດຂຶ້ນ ໃນວັນທີ 30 ພະຈິກ2020 ທີ່ນະຄອນຫຼວງວຽງຈັນ. ຄະນະຜູ້ແທນຊາຍແດນຝ່າຍລາວ ນຳໂດຍ ທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດ, ຫົວໜ້າຄະນະຜູ້ແທນຊາຍແດນລາວ-ຫວຽດນາມ ແລະ ຝ່າຍຫວຽດນາມ ນຳໂດຍ ທ່ານ ເລ ຮວ່າຍ ຈຸງ, ກຳມະການສູນກາງພັກ, ຮອງລັດຖະມົນຕີກະຊວງການຕ່າງປະເທດ, ຫົວໜ້າຄະນະຜູ້ແທນຊາຍແດນຫວຽດນາມ-ລາວ. ຊຶ່ງມີບັນດາຮອງເຈົ້າແຂວງຜູ້ຊີ້ນຳວຽກງານຊາຍແດນຂັ້ນແຂວງ ຄູ່ແຂວງທີ່ມີຊາຍແດນຮ່ວມກັນ ແລະ ຜູ້ຕາງຫນ້າຈາກ ຂະແໜງການທີ່ກ່ຽວຂ້ອງອ້ອມຂ້າງສູນກາງ ແລະ ທ້ອງຖິ່ນຂອງສອງປະເທດເຂົ້າຮ່ວມ.