ໃນວັນທີ 17 ພຶດສະພາ 2019, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ໂອໄບ ຊາອີດ ໂອໄບ ບິນຕາເຣັຊ ອາລດາເຮຣີ(Obaid Saeed Obaid Bintaresh AlDhaheri) ໃນໂອກາດເດີນທາງມາຍື່ນສານຕາຕັ້ງ ຕໍ່ ພະນະທ່ານ ປະທານປະເທດ ແຫ່ງ ສປປ ລາວ, ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສະຫະ ອາຣັບ ເອມີເຣດ ປະຈໍາ ສປປ ລາວ, ຊຶ່ງມີສໍານັກງານສະຖານທູດ ຕັ້ງຢູ່ ຮ່າໂນ້ຍ, ສສ ຫວຽດນາມ.
ພະນະທ່ານບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ມອບສານແຕ່ງຕັ້ງໃຫ້ ທ່ານ ພູໂຂງ ສີສຸລາດ ເພື່ອໄປດຳລົງຕຳແໜ່ງເປັນ ເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ຣາຊະອານາຈັກ ແບນຊິກ, ໃນວັນທີ 17 ພຶດສະພາ 2019, ທີ່ ສຳນັກງານປະທານປະເທດ.
ໃນລະຫວ່າງວັນທີ 15-16 ພຶດສະພາ 2019, ທ່ານ ໂຮເຊ ກຣາເຊຍໂນ ດາ ຊິວວາ, ຜູ້ອຳນວຍການໃຫ່ຍອົງການອາຫານ ແລະ ການກະເສດ (FAO) ແລະ ທ່ານ ເດວິດ ບີສລີ, ເລຂາບໍລິຫານງານ ອົງການອາຫານໂລກ (WFP) ຈາກຫ້ອງການສຳນັກງານໃຫຍ່ ທີ່ ປະເທດ ອິຕາລີ; ແລະ ທ່ານ ໂທມັດ ຣັດ, ຫົວໜ້າອົງການ ກອງທຶນສາກົນເພື່ອການພັດທະນາກະສິກຳ (IFAD) ປະຈຳ ສສ ຫວຽດນາມ, ທັງເປັນຜູ້ຮັບຜິດຊອບວຽກງານດັ່ງກ່າວ ປະຈຳ ສປປ ລາວ, ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ຊຶ່ງເປັນຄັ້ງທຳອິດສຳລັບເຈົ້າໜ້າທີ່ຂັ້ນສູງ ຂອງ ອົງການເຄືອຂ່າຍ ສປຊ ທີ່ມີຫ້ອງການໃຫຍ່ຕັ້ງຢູ່ ນະຄອນຫຼວງໂຣມ ປະເທດ ອິຕາລີ ແລະ ຫົວໜ້າອົງການ IFAD ປະຈຳ ສສ ຫວຽດນາມ.