ໃນວັນທີ 9 ມີນາ 2017, ທີ່ ກະຊວງການຕ່າງປະເທດ, ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຍື່ນສານຕາຕັ້ງ ແລະ ຢ້ຽມຂຳ່ນັບຂອງ ທ່ານ ຢາຊູຊິ ເນງິຊິ, ເພື່ອດຳລົງຕຳແໜ່ງເປັນຜູ້ອຳນວຍການທະນາຄານພັດທະນາອາຊີ ປະຈຳ ສປປ ລາວ ຜູ້ໃໝ່ ພ້ອມດ້ວຍຄະນະ, ເນື່ອງໃນໂອກາດທີ່ມາປະຕິບັດວຽກງານ ຢູ່ ສປປ ລາວ.

ໃນໂອກາດນີ້, ທ່ານຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍການເຂົ້າຮັບຕຳແໜ່ງໃໝ່ຂອງ ທ່ານ ຢາຊູຊິ ເນງິຊິ ໃນຄັ້ງນີ້. ພ້ອມດຽວກັນນີ້, ກໍ່ໄດ້ສະແດງຄວາມຊົມເຊີຍ ແລະ ຂອບໃຈຕໍ່ ເອດີບີ ທີ່ໄດ້ປະກອບສ່ວນອັນສຳຄັນ ເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ໃນຫຼາຍຂະແໜງການຕະຫຼອດໄລຍະ 50 ປີ ຜ່ານມາ ແລະ ສະແດງຄວາມເຊື່ອໝັ້ນ ແລະ ຂອບໃຈຕໍ່ ເອດີບີ ທີ່ຈະສືບຕໍ່ປະກອບສ່ວນຊ່ວຍເຫຼືອ ສປປ ລາວ ເພື່ອໃຫ້ສາມາດບັນລຸເປົ້າໝາຍທີ່ວາງໄວ້ໃນແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VIII (2016-2020), ເປົ້າໝາຍການພັດທະນາແບບຍືນຍົງ (SDG) ແລະ ເປົ້າໝາຍເພື່ອໃຫ້ປະເທດຫຼຸດພົ້ນອອກຈາກສະພາວະປະເທດດ້ອຍພັດທະນາ ໃນປີ 2020.

ໃນຕ້ອນທ້າຍ, ທ່ານ ນາງ ຄຳເພົາ ເອີນທະວັນ ໄດ້ກ່າວອວຍພອນໃຫ້ ທ່ານ ຢາຊູຊິ ເນງິຊິ ຈົ່ງປະສົບຜົນສຳເລັດໃນການປະຕິບັດໜ້າທີ່ວຽກງານໃໝ່ນີ້ ແລະ ຫວັງຢ່າງຍິ່ງວ່າ ສະຖາບັນການເງິນສາກົນ ກໍ່ຄື ທະນາຄານພັດທະນາອາຊີ ຈະສືບຕໍ່ໃຫ້ການຮ່ວມມື ແລະ ສະໜັບສະໜູນ ສປປ ລາວ.

ໃນລະຫວ່າງວັນທີ 1-2 ມີນາ 2017 ຜ່ານມາ, ທ່ານ ທອງ​ຜ່ານ ​ສະ​ຫວັນ​ເພັດ, ຮອງ​ລັດ​ຖະ​ມົນ​ຕີ​ຕ່າງ​ປະ​ເທດ, ທັງ​ເປັນ​ຫົວ​ໜ້າ​ເຈົ້າ​ໜ້າ​ທີ່​ອາ​ວຸ​ໂສ​ອາ​ຊຽນ​ຂອງ ສ​ປ​ປ ລາວໄດ້​ນໍາ​ພາ​ຄະ​ນະ​ຜູ້​ແທນ​ລາວ ​ເ​ຂົ້າ​ຮ່ວມ​ເວ​ທີ​ປຶກ​ສາ​ຫາ​ລື​ ອາ​ຊຽນ-ຍີ່​ປຸ່ນ ຄັ້ງ​ທີ 32, ເຊິ່ງ​ໄດ້​ຈັດ​ຂຶ້ນ​ຢູ່ ບັນ​ດາສີ​ຣິ ເບ​ກາ​ວັນ, ປະເທດ ບ​ຣູ​ໄນ ດ​າ​ຣູ​ສະ​ລ​າມ.

ໃນຕອນບ່າຍຂອງວັນທີ 23 ກຸມພາ 2017, ກະຊວງການຕ່າງປະເທດ ໄດ້ຈັດກອງປະຊຸມປຶກສາຫາລື ເພື່ອກະກຽມໃຫ້ແກ່ການສ້າງຮ່າງກົດໝາຍວ່າດ້ວຍສຳນັກງານຜູ້ຕາງໜ້າ ແຫ່ງ ສປປ ລາວ ຢູ່ຕ່າງປະເທດ ໂດຍການເຂົ້າຮ່ວມຂອງ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ, ມີຜູ້ຕາງໜ້າບັນດາກົມໃນກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ, ບັນດາກະຊວງ, ອົງການທີ່ກ່ຽວຂ້ອງ ເຂົ້າຮ່ວມທັງໝົດ 60 ທ່ານ.