ໃນວັນທີ 11 ກັນຍາ 2018, ທ່ານ ທອງລຸນ ສີສຸລິດ,ນາຍົກລັດຖະມົນຕີ ແຫ່ງ ສປປ ລາວ, ຈະນຳພາຄະນະຜູ້ແທນ ສປປ ລາວ ເດີນທາງໄປເຂົ້າຮ່ວມກອງປະຊຸມເວທີປຶກສາຫາລືເສດຖະກິດໂລກ ກ່ຽວກັບ ອາຊຽນ ຄັ້ງທີ 27 (27th World Economic Forum on ASEAN), ພາຍໃຕ້ຫົວຂໍ້: “ອາຊຽນ 4.0: ການປະກອບການທຸລະກິດ ແລະ ການປະຕິວັດດ້ານອຸດສາຫະກຳ ຄັ້ງທີ 4(ASEAN 4.0: Entrepreneurship and the Fourth Industrial Revolution)”ຕາມການເຊື້ອເຊີນຂອງນາຍົກ ລັດຖະມົນຕີ ແຫ່ງ ສສ.ຫວຽດນາມ ແລະ ປະທານອົງການເວທີປຶກສາຫາລືເສດຖະກິດໂລກ ທີ່ຈະຈັດຂຶ້ນໃນວັນທີ 11-13 ກັນຍາ 2018 ທີ່ ຮ່າໂນຍ, ສສ.ຫວຽດນາມ.
ແຈ້ງການຂອງກະຊວງການຕ່າງປະເທດ
ເລື່ອງ: ການຂະຫຍາຍເວລາພັກເຊົາໃຫ້ແກ່ພົນລະເມືອງ ສ.ເກົາຫລີ ທີ່ເດີນທາງເຂົ້າມາ ສປປ ລາວ.
ລັດຖະບານ ແຫ່ງ ສປປ ລາວ ເຫັນດີອະນຸມັດໃຫ້ຂະຫຍາຍເວລາພັກເຊົາໃຫ້ແກ່ພົນລະເມືອງ ສ.ເກົາຫລີ ທີ່ຖືຫນັງສືຜ່ານແດນທໍາມະດາ ທີ່ເດີນທາງມາ ສປປ ລາວ ໃນຖານະຢ້ຽມຢາມ ແລະ ທ່ອງທ່ຽວ ຈາກ 15 ວັນ ມາເປັນ 30 ວັນ ຕາມການຕົກລົງຍົກເວັ້ນວີຊາຝ່າຍດຽວ ແລະ ເລີ່ມຈັດຕັ້ງປະຕິບັດ ແຕ່ວັນທີ 01 ກັນຍາ 2018 ເປັນຕົ້ນໄປ.
--------------------------------------
ວັນທີ 21 ສິງຫາ 2018, ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ພ້ອມດ້ວຍຄະນະ ເດີນທາງໄປເຂົ້າຮ່ວມງານວາງສະແດງເຕັກໂນໂລຊີທັນສະໄຫມນາໆຊາດ ທີ່ ສປ ຈີນ ເປັນເຈົ້າພາບ (The Smart China Expo)ພາຍໃຕ້ຫົວຂໍ້ “Smart Technology Empowering Economy, Enriching Life” ຕາມການເຊື້ອເຊີນຂອງລັດຖະບານ ສປ ຈີນ ທີ່ຈະຈັດຂຶ້ນໃນວັນທີ 21-24 ສິງຫາ 2018 ທີ່ ນະຄອນ ສົງຊິງ, ສປ ຈີນ.