ໃນຕອນເຊົ້າ ຂອງວັນທີ 22 ທັນວາ 2023 ຢູ່ທີ່ກະຊວງການຕ່າງປະເທດ ໄດ້ຈັດເຜີຍແຜ່ຜົນສໍາເລັດກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI ແລະ ເຊື່ອມຊຶມບັນດາເອກະສານຕ່າງໆ ກ່ຽວກັບການກະກຽມກອງປະຊຸມ 3 ຂັ້ນ ຂອງພັກປະຊາຊົນປະຕິວັດລາວ, ໃຫ້ກຽດເປັນປະທານ ແລະ ເຜີຍແຜ່ ໂດຍ ສະຫາຍ ສະເຫຼີມໄຊ ກົມມະສິດ, ກໍາມະການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງການຕ່າງປະເທດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ມີ​ບັນດາສະຫາຍ ​ຄະນະ​ພັກ, ຄະນະ​ນຳ, ເລຂາ ແລະ ຮອງເລຂາໜ່ວຍພັກ, ສະມາຊິກ​ພັກ ພາຍ​ໃນ​ກະຊວງ​ການ​ຕ່າງປະ​ເທດ ​​ເຂົ້າ​ຮ່ວມທັງໝົດ​ ຈໍານວນ 300 ສະຫາຍ, ຍິງ 112 ສະຫາຍ. 

ໃນວັນທີ 14 ທັນວາ 2023, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອໍາລາຂອງ ທ່ານ ໂພລ ແຄລີ (Paul Kelly), ເອກອັກຄະລັກຖະທູດ ວິສາມັນຜູ້ມີອໍານາດເຕັມ ແຫ່ງ ອົດສະຕຣາລີ ປະຈໍາ ສປປ ລາວ, ໃນໂອກາດສໍາເລັດການປະຕິບັດໜ້າທີ່ການທູດຢູ່ລາວ, ພ້ອມທັງຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫຼຽນກາມິດຕະພາບ ໃຫ້ແກ່ ທ່ານເອກອັກຄະລັດຖະທູດ ເພື່ອເປັນການຊົມເຊີຍ ແລະ ສັນລະເສີນ ຕໍ່ຜົນງານໃນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ອົດສະຕຣາລີ ຢ່າງມີປະສິດທິຜົນ ຕະຫຼອດໄລຍະເວລາ 3 ປີຜ່ານມາ.

ກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ການເປັນປະທານອາຊຽນຂອງ ສປປ ລາວ ປີ 2024 ໃຫ້ແກ່ບັນດາພະນັກງານຫຼັກແຫຼ່ງ ແລະ ພະນັກງານກ່ຽວຂ້ອງ ຂອງບັນດາແຂວງພາກກາງ ແລະ ພາກໃຕ້ ຂອງ ສປປ ລາວ ໃນຕອນເຊົ້າຂອງວັນທີ 12 ທັນວາ 2023 ທີ່ ສຳນັກງານຫ້ອງວ່າການ ແຂວງ ຈໍາປາສັກ. ໃຫ້ກຽດກ່າວເປີດ ແລະ ເປັນປະທານບັນຍາຍ ໃນກອງປະຊຸມເຜີຍແຜ່ຄັ້ງນີ້ ແມ່ນ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ຮອງປະທານ, ຜູ້ປະຈໍາການຄະນະຊີ້ນໍາລະດັບຊາດ ເພື່ອກະກຽມ ແລະ ດຳເນີນການເປັນປະທານອາຊຽນ ຂອງ ສປປ ລາວ ໂດຍມີຜູ້ເຂົ້າຮ່ວມທີ່ເປັນພະນັກງານຫຼັກແຫຼ່ງຈາກບັນດາແຂວງພາກກາງ ແລະ ພາກໃຕ້ ແລະ ນັກສຶກສາ ມະຫາວິທະຍາໄລຈຳປາສັກ ຈໍານວນ 170 ກວ່າທ່ານ.