ໃນຕອນບ່າຍຂອງວັນທີ 5 ພຶດສະພາ 2023, ຫ້ອງການກະຊວງການຕ່າງປະເທດ ໄດ້ຈັດພິທີມອບຮັບໃບຢັ້ງຢຶນຝຶກງານໃຫ້ແກ່ບັນດານັກສຶກສາຈາກພາກວິຊາພົວພັນສາກົນ, ຄະນະນິຕິສາດ ແລະ ລັດຖະສາດ, ມະຫາວິທະຍາ ໄລແຫ່ງຊາດ ຈໍານວນ 53 ທ່ານ ທີ່ໄດ້ສຳເລັດການມາຝຶກງານຢູ່ກະຊວງການຕ່າງປະເທດ ປະຈໍາປີ 2023, ເຊິ່ງໄດ້ເລີ່ມມາຝຶກງານຢູ່ບັນດາກົມຕ່າງໆຂອງກະຊວງການຕ່າງປະເທດ ເປັນເວລາ 2 ເດືອນ ແຕ່ ວັນທີ 20 ກຸມພາ ເຖິງວັນທີ 28 ເມສາ 2023.

   ໃນໂອກາດສະເຫລີມ ສະຫລອງ ປີໃໝ່ລາວ ພສ 2566, ເພື່ອສານສຳພັນເພີ່ມຄວາມຮັກແພງສາມັກຄີສອງຊາດ ລາວ - ຮົງກາຣີ, ທັງເປັນການຮັກສາຮີດຄອງປະເພນີ ເຜີຍແຜ່ວັດທະນະທຳ ອັນດີງາມຂອງຊາດໃຫ້ຕ່າງປະເທດໄດ້ຮັບຮູ້, ສະນັ້ນ, ສະຖານທູດລາວ ຮ່ວມກັບ ສະມາຄົມມິດຕະພາບ ຮົງກາຣີ - ລາວ ໄດ້ພ້ອມພຽງສາມັກຄີກັນຈັດພິທີສະເຫລີມສະຫລອງ ປີໃໝ່ລາວ ພສ 2566, ໃນວັນທີ 30 ເມສາ 2023 ທີ່ ນະຄອນຫລວງ ບູດາແປສ, ໂດຍມີທ່ານ ນາງ ບົົວແກ້ວ ສຸນນະລາດ, ອຸປະທູດ ສປປ ລາວ ປະຈຳສະຖານທູດລາວ ທີ່ ບູດາແປສ ໃຫ້ກຽດກ່າວເປີດງານ, ໃນໂອກາດດັ່ງກ່າວທ່ານຍັງໄດ້ຍົກໃຫ້ເຫັນເຖິງສາຍພົວພັນ ມິດຕະພາບ ຂອງສອງປະເທດລາວ - ຮົງກາຣີ ທີ່ມີມາແຕ່ດົົນນານ, ລວມໄປເຖິງການຮ່ວມມືໂຄງການຕ່າງໆ, ການສຶກສາ ຂອງສອງປະເທດ ແລະ ຖືເອົາໂອກາດດັ່ງກ່າວ ເຜີຍແຜ່, ເຊື້ອເຊີນ ທັງເຊີນຊວນ ບັນດາແຂກທັງພາຍໃນ ແລະ ຕ່າງປະເທດໃຫ້ເຫັນເຖິງວັດທະນະທຳອັນດີງາມຂອງຊາດລາວ,ໄປທ່ອງທ່ຽວ ແລະ ດຳເນີນທຸລະກິດໃນ ສປປລາວໃນຕໍ່ໜ້າ.

    ການສະເຫລີມ ສະຫລອງໃນຄັ້ງນີ້ ໄດ້ດຳເນີນໄປດ້ວຍບັນຍາກາດ ແຫ່ງຄວາມສາມັກຄີີມ່ວນຊື່ນຮັກແພງ, ມີແຂກຜູ້ຖືກເຊີີນ ທັງຄົນເຊື້້ອຊາດລາວທີ່ດຳລົງຊີວິດໃນຮົງກາຣີ ແລະ ແຂກຕ່າງປະເທດກໍຄືຄົນຮົງກາຣີ ຊຶ່ງໃຫ້ຄວາມສົນໃຈເປັນພິເສດ ສະແດງອອກໃນການສອບຖາມຮຽນຮູ້ວັດທະນະທຳການນຸ່ງຖື, ບາສີປີໃໝ່ລາວ, ການຟ້ອນລຳວົງລາວ ແລະ ສົນໃຈຢາກໄປທ່ຽວລາວ, ລວມທັງນັກສຶກສາລາວເຂົ້າຮ່ວມໃນການສະແດງສິນລະປະວັດທະນະທຳລາວຢ່າງພ້ອມພຽງ.

ໃນວັນທີ 28 ເມສາ 2023, ສະຖາບັນການຕ່າງປະເທດ, ກະຊວງການຕ່າງປະເທດ ຮ່ວມກັບ ສະຖານເອກອັກຄະລັດຖະທູດແຫ່ງ ສ. ເກົາຫຼີ ປະຈຳ ສປປ ລາວ ໄດ້ຈັດກອງປະຊຸມສຳມະນາ ພາຍໃຕ້ຫົວຂໍ້: “ ຍຸດທະສາດອິນໂດປາຊີຟິກ ຂອງ ສ. ເກົາຫຼີ ແລະ ຂໍ້ລິເລີ່ມຄວາມສາມັກຄີ ລະຫວ່າງ ສ. ເກົາຫຼີ - ອາຊຽນ ’’ (Korea’s Indo-Pacific Strategy and Korea-ASEAN Solidarity Initiative) ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC), ໂດຍການເປັນປະທານຮ່ວມຂອງ ທ່ານ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດແລະ ທ່ານ  Jung Yung Soo , ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ. ເກົາຫຼີ ປະຈຳ ສປປ ລາວ ພ້ອມທັງ ມີຜູ້ເຂົ້າຮ່ວມຈາກບັນດາກົມພາຍໃນ ກະຊວງການຕ່າງປະເທດ, ບັນດາກະຊວງຂະແໜງການອ້ອມຂ້າງສູນກາງ, ຄູ-ອາຈານ ແລະ ນັກສຶກສາຈາກ ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ ລວມທັງພະນັກງານສະຖານທູດ ສ. ເກົາຫຼີ ປະຈຳ ສປປ ລາວ ທັງໝົດຈຳນວນ 150 ທ່ານ.