ໃນວັນທີ 03 ກັນຍາ 2023 ທີ່ ຈາກາກຕາ, ອິນໂດເນເຊຍ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນໍາພາຄະນະຜູ້ແທນເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ໂດຍການເປັນປະທານຂອງ ອິນໂດເນເຊຍ ພາຍໃຕ້ຄໍາຂວັນ “ ອາຊຽນມີຄວາມສໍາຄັນ: ສູນກາງແຫ່ງການຈະເລີນເຕີບໂຕ”  ໂດຍມີບັນດາຫົວໜ້າເຈົ້າໜ້າທີ່ອາວຸໂສອາຊຽນ ແລະ ຮອງເລຂາທິການໃຫຍ່ອາຊຽນ ເຂົ້າຮ່ວມ. ກອງປະຊຸມຄັ້ງນີ້ ແມ່ນເພື່ອກະກຽມໃຫ້ແກ່ກອງປະຊຸມສຸດຍອດອາຊຽນຄັ້ງທີ 43 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງທີ່ຈະຈັດຂຶ້ນໃນວັນທີ 5-7 ກັນຍາ 2023 ທີ່ ຈາກາກຕາ, ອິນໂດເນເຊຍ.

ກອງປະຊຸມ ໄດ້ຮັບຊາບຄວາມຄືບໜ້າການຜັນຂະຫຍາຍບັນດາບູລິມະສິດພາຍໃຕ້ການເປັນປະທານອາຊຽນຂອງອິນໂດເນເຊຍ ໃນປີ 2023 ໂດຍສະເພາະແມ່ນ ບັນດາຂໍ້ສະເໜີແນະຂອງຄະນະສະເພາະກິດລະດັບສູງວ່າດ້ວຍວິໄສທັດປະຊາຄົມອາຊຽນ ຫຼັງປີ 2025 ກ່ຽວກັບ ການສົ່ງເສີມຄວາມອາດສາມາດ ແລະ ປະສິດທິພາບດ້ານສະຖາບັນອາຊຽນ ແລະ ການຮັດແໜ້ນພາລະບົດບາດຂອງຄະນະກໍາມະການຜູ້ຕາງໜ້າຖາວອນປະຈໍາອາຊຽນ, ແລະ ປຶກສາຫາລືກ່ຽວກັບເອກະສານທີ່ຈະຮັບຮອງຢູ່ກອງປະຊຸມລັດຖະມົນຕີຕ່າງປະເທດອາຊຽນ ແລະ ກອງປະຊຸມສຸດຍອດອາຊຽນ ຄັ້ງທີ 43 ແລະ ກອງປະຊຸມສຸດຍອດອື່ນໆ.

ນອກນີ້, ກອງປະຊຸມ ກໍໄດ້ປຶກສາຫາລືກ່ຽວກັບ ການພົວພັນຮ່ວມມືກັບຄູ່ຮ່ວມມືພາຍນອກ. ສປປ ລາວ ໃນຖານະປະເທດປະສານງານໃຫ້ແກ່ການພົວພັນຮ່ວມມື ອາຊຽນ-ອົດສະຕຣາລີ ແລະ ອາຊຽນ-ອົງການຮ່ວມມືເສດຖະກິດ (ECO) ໄດ້ລາຍງານຄວາມຄືບໜ້າກ່ຽວກັບການຮ່ວມມືອາຊຽນ-ອົດສະຕຣາລີ ແລະ ການກະກຽມຈັດກອງປະຊຸມລັດຖະມົນຕີຕ່າງປະເທດອາຊຽນ-ECO ຊຶ່ງຈະຈັດຂຶ້ນໃນກາງເດືອນກັນຍາ 2023 ທີ່ ນິວຢອກ, ສ.ອາເມລິກາ.

ໃນຕອນເຊົ້າ ຂອງວັນທີ 28 ສິງຫາ 2023, ທີ່ ກະຊວງການຕ່າງປະເທດ ໄດ້ມີພິທີເປີດຊຸດຝຶກອົບຮົມວຽກງານກວດກາພັກ-ລັດ ຄັ້ງທີ IV ໃຫ້ແກ່ພະນັກງານຜູ້ຮັບຜິດຊອບວຽກງານກວດກາອ້ອມຂ້າງກະຊວງການຕ່າງປະເທດຂຶ້ນ, ໂດຍການເປັນປະທານຮ່ວມຂອງ ທ່ານ ປອ ດາວບົວລະພາ ບາວົງເພັດ, ຄະນະປະຈໍາພັກ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ, ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ແລະ ທ່ານ ບຸນເຫຼືອ ພັນດານຸວົງ, ຄະນະປະຈໍາພັກ, ປະທານຄະນະກວດກາພັກ, ຮອງລັດຖະມົນຕີກະຊວງການຕ່າງປະເທດ, ມີຜູ້ຕາງໜ້າຈາກອົງການໄອຍະການປະຊາຊົນສູງສຸດ, ອົງການກວດກາແຫ່ງລັດ, ຫົວໜ້າກົມ, ຮອງກົມ ແລະ ຜູ້ຕາງໜ້າຈາກບັນດາກົມ ແລະ ນັກສໍາມະນາກອນຜູ້ຮັບຜິດຊອບວຽກງານກວດກາພາຍໃນກະຊວງການຕ່າງປະເທດ ເຂົ້າຮ່ວມ ທັງໝົດ 65 ທ່ານ.

ໃນພິທີເປີດຊຸດຝຶກອົບຮົມຄັ້ງນີ້, ທ່ານ ບຸນເຫຼືອ ພັນດານຸວົງ, ຄະນະປະຈໍາພັກ, ປະທານຄະນະກວດກາພັກ, ຮອງລັດຖະມົນຕີກະຊວງການຕ່າງປະເທດ ໄດ້ເນັ້ນໃຫ້ຮູ້ວ່າ: ວຽກງານກວດກາ ແມ່ນໜຶ່ງໃນພາລະບົດບາດທີ່ສໍາຄັນຕົ້ນຕໍ ຂອງການນຳພາຂອງພັກ, ການນໍາພາຕ້ອງຕິດພັນກັບການກວດກາ, ບໍ່ມີການກວດກາ ກໍ່ໝາຍຄວາມວ່າ ບໍ່ມີການນຳພາ, ໂດຍເອົາວຽກງານກວດກາສອດຫ້ອຍເຂົ້າຢູ່ໃນທຸກຂົງເຂດວຽກງານ, ຕ້ອງເຮັດເປັນປົກກະຕິ ແລະ ຂາດບໍ່ໄດ້ສໍາລັບການນຳພາຂອງພັກ ແລະ ການຄຸ້ມຄອງຂອງລັດ; ທຸກການຈັດຕັ້ງ ແລະ ສະມາຊິກພັກ, ພະນັກງານ-ລັດຖະກອນທຸກຄົນ ລ້ວນຢູ່ພາຍໃຕ້ການຕິດຕາມ-ກວດກາຂອງພັກ; ຄະນະພັກແຕ່ລະຂັ້ນ ເປັນຜູ້ຮັບຜິດຊອບຊີ້ນໍາໂດຍກົງ. ພ້ອມນີ້, ຍັງຮຽກຮ້ອງມາຍັງນັກສໍາມະນາກອນທຸກທ່ານໃຫ້ຍົກສູງຄວາມຮັບຜິດຊອບ ແລະ ສຸມທຸກສະຕິປັນຍາ ເຂົ້າໃນການຄົ້ນຄວ້າຮ່ຳຮຽນ ທັງພາກທິດສະດີ ແລະ ປະສົບການຕົວຈິງນໍາຄູອາຈານທີ່ມາຈາກຄະນະກວດກາສູນກາງພັກ ແລະ ອົງການກວດກາແຫ່ງລັດ, ອົງການໄອຍະການປະຊາຊົນສູງສຸດ, ອົງການກວດສອບແຫ່ງລັດ ແລະ ນັກສໍາມະນາກອນດ້ວຍກັນ ເພື່ອໃຫ້ສໍາເລັດຕາມຈຸດປະສົງ ແລະ ຄາດໝາຍທີ່ວາງໄວ້.

ໃນຕອນເຊົ້າຂອງວັນທີ 28 ສິງຫາ 2023, ສະຫາຍ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນຳພາຄະນະ ໄປອວຍພອນ ສະຫາຍ ຫງວຽນ ບ໋າ ຮຸ່ງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈໍາ ສປປ ລາວ, ເນື່ອງໃນໂອກາດວັນຊາດ ສາທາລະນະລັດ ສັງຄົມນິຍົມ ຫວຽດນາມ ຄົບຮອບ 78 ປີ (02/09/1945-02/09/2023)  ແລະ ວັນການທູດຫວຽດນາມ ຄົບຮອບ 78 ປີ (28/08/1945-28/08/2023), ທີ່ ສະຖານເອກອັກຄະລັດຖະທູດ ແຫ່ງ ສສ ຫວຽດນາມ ປະຈຳ ສປປ ລາວ.