ໃນຕອນເຊົ້າຂອງວັນທີ 15 ຕຸລາ 2021 ທີ່ ພະຣາຊະວັງເຈົ້າຊີວິດ ແຫ່ງ ຣາຊະອະນາຈັກ ນ໋ອກແວ, ທີ່ນະຄອນຫຼວງໂອສະໂຣ,ທ່ານບຸນລຽບ ຮຸ່ງວົງສອນໄດ້ຍື່ນສານຕາຕັ້ງ ຕໍ່ເຈົ້າຊີວິດ Harald Vແຫ່ງ ຣາຊະອະນາຈັກ ນ໋ອກແວ, ເພື່ອດຳລົງຕຳແໜ່ງເປັນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳຣາຊະອະນາຈັກ ນ໋ອກແວ, ເຊິ່ງມີສະຖານເອກອັກຄະລັດຖະທູດ ຢູ່ນະຄອນຫຼວງສະຕ໋ອກໂຮມ ຣາຊະອະນາຈັກ ຊູແອດ.

ໃນຕອນບ່າຍຂອງວັນທີ 15 ຕຸລາ 2021, ທີ່ ກະຊວງການຕ່າງປະເທດ ໄດ້ມີພິທີມອບເຄື່ອງຊ່ວຍເຫຼືອທາງການແພດ ໃຫ້ແກ່ ມູນລະນິທິຊ່ວຍເຫຼືອຄົນທຸກຍາກ ແຫ່ງ ສປປ ລາວ (ກູ້ໄພ 1623), ຊຶ່ງຕາງໜ້າໃຫ້ກະຊວງການຕ່າງປະເທດເທດ ມອບເຄື່ອງຊ່ວຍເຫຼືອໃນຄັ້ງນີ້ໂດຍ ທ່ານ ບຸນທັນ ກຸສົນສະໜອງ, ຮັກສາການຫົວໜ້າຫ້ອງການກະຊວງການຕ່າງປະເທດ.

ໂດຍຕອບສະໜອງຕາມຄໍາເຊີນຂອງ ທ່ານ ຄຳພັນ ອັ່ນລາວັນ, ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປປ ລາວ ປະຈໍາ ສ.ອາເມລິກາ ແລະ ການາດາ ໃນລະຫວ່າງວັນທີ 08-11 ຕຸລາ 2021,  ທ່ານ ນາງ ສຸພາ ໄຊປຣະສິດ-ເມ, ຄົນເຊື້ອຊາດລາວທີ່ສັງກັດພັກ Democrat, ທັງເປັນຜູ້ສະໝັກຊິງຕໍາແໜ່ງຜູ້ວ່າການລັດ ອາຄານຊໍ ໃນປີ 2022 ແລະ ຄະນະໄດ້ເດີນທາງມາຢ້ຽມຢາມສະຖານເອກອັກຄະລັດຖະທູດ ແຫ່ງ ສປປ ລາວ ທີ່ ວໍຊີງຕັນ ດີຊີ ເພື່ອພົບປະກັບຄະນະນັກທຸລະກິດຈາກບໍລິສັດWilaikul International Gold Mine Co., LTD ແນ່ໃສ່ສຶກສາຄວາມເປັນໄປໄດ້ໃນການລົງທຶນຢູ່ ສປປ ລາວ; ແລະ ພົບປະກັບຊຸມຊົນຄົນເຊື້ອຊາດລາວຢູ່ ນະຄອນຫຼວງວໍຊີງຕັນ ດີຊີ, ລັດເວີຈີເນຍ, ແມລີແລນ ແລະ ລັດອື່ນໆໃກ້ຄຽງ ເພື່ອແນະນໍາໂຕ ແລະ ຮັດແໜ້ນຄວາມສາມັກຄີ. ໃນງານຄັ້ງນີ້ ຍັງມີຜູ້ຕາງໜ້າຈາກສໍານັກງານຜູ້ຕາງໜ້າຖາວອນ ແຫ່ງ ສປປ ລາວ ປະຈໍາອົງການສະຫະປະຊາຊາດ ທີ່ ນີວຢອກ ເຂົ້າຮ່ວມ.