ທ່ານ ນາງ ຄໍາເພົາ ເອີນທະວັນ, ເອກອັກຄະລັດຖະທູດ ສປປ ລາວ ປະຈໍາ ສປ ຈີນ ໄດ້ນໍາພາຄະນະສະຖານທູດລາວ ທີ່ນະຄອນຫຼວງປັກກິ່ງ ແລະ ສະຖານກົງສຸນໃຫຍ່ລາວ ທີ່ນະຄອນຊາງຊາ, ແຂວງຮູນານ ຕາງໜ້າລັດຖະບານເຂົ້າຮ່ວມງານສັບປະດາການແລກປ່ຽນການສຶກສາ ຈີນ-ອາຊຽນ ປະຈໍາປີ2021 ລະຫວ່າງ ວັນທີ 23 ຫາ 26 ກັນຍາ 2021ທີ່ນະຄອນກຸ້ຍຢາງ, ແຂວງກຸ້ຍໂຈວ. ພາຍໃຕ້ຫົວຂໍ້ ‘‘ຄວາມຮູ້ ແລະ ການປະຕິບັດຮ່ວມເປັນອັນດຽວ, ວິໄສທັດດ້ານການສຶກສາທີ່ຮ່ວມກັນກໍ່ສ້າງການຮ່ວມມື ເພື່ອການພັດທະນາແບບຍືນຍົງ’’, ຊຶ່ງພິທີເປີດງານທາງການໄດ້ຈັດຂຶ້ນ ໃນຕອນເຊົ້າຂອງວັນທີ 24 ກັນຍາ 2021, ໂດຍມີການນໍາຂັ້ນສູງຝ່າຍຈີນ ແລະ ການນຳຂັ້ນສູງຂອງບາງປະເທດອາຊຽນໄດ້ມີຄໍາເຫັນໃນພິທີເປີດທາງການ ແບບທັງອອນລາຍ ແລະ ອ໊ອບລາຍ. ໃນນີ້, ພະນະທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ຮອງສາດສະດາຈານ, ປະລິນຍາເອກ ພຸດ ສີມມະລາວົງ, ລັດຖະມົນຕີກະຊວງສຶກສາທິການ ແລະ ກິລາ ກໍໄດ້ຕາງໜ້າລັດຖະບານ ສປປ ລາວ ມີຄໍາເຫັນໃນພິທີເປີດເຊັ່ນດຽວກັນ.

ຕອນ​ບ່າຍວັນທີ 05 ຕຸລາ 2021, ທ່ານ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ທີ່ ຮ່າໂນ້ຍ ໄດ້ຕ້ອນຮັບການເຂົ້າຍື່ນສານຕາຕັ້ງຂອງທ່ານ ເກອີໂຈ ໂນແວນໂຕ (H.E. Mr. KeijoNorvanto) ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ແຟງລັງ ປະຈໍາ ສາທາລະນະລັດ ປະຊາທິປະໄຕ ປະຊາຊົນລາວ, ໂດຍມີສຳນັກງານຕັ້ງຢູ່ ຮ່າໂນ້ຍ, ສສ ຫວຽດນາມ.

ໃນຕອນເຊົ້າຂອງ​ວັນ​ທີ 5 ຕຸລາ 2021, ທ່ານ​ ແສງ​ ສຸຂະທິວົງ,​ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳຣາຊະອານາຈັກໄທ ທີ່ ບາງກອກ ​ ​ໄດ້​​ຕ້ອນຮັບ​ການ​ເຂົ້າ​ຢ້ຽມ​ອຳ​ລາຂອງ​ ທ່ານ ນາງ ມາເລຍ ອາລິເຊຍ ຄັດໂສນີ ເດ ສັນຊຽນ (Maria AliciaCuzzoni de Sonschein) ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ອາກຊັງຕິນ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ ທີ່ມີສຳນັກງານຕັ້ງຢູ່ບາງກອກ, ຣາຊະອານາຈັກໄທ ​ໃນ​ໂອກາດ​ທີ່​ສຳ​ເລັດໜ້າ​ທີ່ການ​ທູດຂອງທ່ານ.