ໃນວັນທີ 29-30 ພະຈິກ 2018, ຄະນະຜູ້ແທນ ສປປ ລາວ ນຳໂດຍ ທ່ານ ສົງການ ຫລວງມຸນິນທອນ, ຫົວຫນ້າກົມເສດຖະກິດ, ກະຊວງການຕ່າງປະເທດ, ທັງເປັນຫົວໜ້າເຈົ້າໜ້າທີ່ອາວຸໂສ ແອັກແມັກ (ACMECS) ຂອງ ສປປ ລາວ ພ້ອມດ້ວຍຄະນະຜູ້ແທນ ຈາກ ກະຊວງການເງິນ, ກະຊວງອຸດສາຫະກໍາ ແລະ ການຄ້າ, ກະຊວງໂຍທາທິການ ແລະ ຂົນສົ່ງ, ທະນາຄານ ແຫ່ງ ສປປ ລາວ ແລະ ສຳນັກງານຄະນະກຳມະການຄຸ້ມຄອງຫຼັກຊັບ ລວມທັງ ຜູ້ຕາງໜ້າຈາກ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ຣາຊະອານາຈັກ ໄທ ໄດ້ເຂົ້າຮ່ວມກອງປະຊຸມເຈົ້າຫນ້າທີ່ອາວຸໂສ ແອັກແມັກ ສະໄຫມພິເສດ ທີ່ ບາງກອກ, ປະເທດໄທ. ໃນໂອກາດດຽວກັນ, ໄດ້ມີກອງປະຊຸມເຈົ້າຫນ້າທີ່ອາວຸໂສ ການເງິນແອັກແມັກ ຄັ້ງທຳອິດ ເພື່ອປຶກສາຫາລື ກ່ຽວກັບ ກົນໄກການລະດົມທຶນ ໃນຂອບການຮ່ວມມືດັ່ງກ່າວ ເພື່ອຮອງຮັບການຈັດຕັ້ງປະຕິບັດ ບັນດາໂຄງການບຸລິມະສິດ ແລະ ໂຄງການຕ່າງໆ ຢູ່ໃນແຜນປະຕິບັດງານ ຂອງ ແຜນແມ່ບົດແອັກແມັກ 2019-2023 ທີ່ບັນດາຜູ້ນຳ ໄດ້ຮັບຮອງເອົາຢູ່ໃນກອງປະຊຸມສຸດຍອດ ແອັກແມັກ ຄັ້ງທີ 8 ໃນເດືອນມິຖຸນາ 2018 ທີ່ ບາງກອກ ຜ່ານມາ.
ໃນວັນທີ 28 ພະຈິກ 2018, ສະຖານທູດເອກອັກຄະລັດຖະທູດ ແຫ່ງ ສປປ ລາວ ທີ່ໂຕກຽວ ໄດ້ຈັດຕັ້ງກິດຈະກໍາ ແລະ ສ້າງຂະບວນການຂໍ່ານັບຮັບຕ້ອນ ວັນຊາດ ທີ 2 ທັນວາ ທີ່ໃກ້ຈະມາເຖິງນີ້ ໂດຍການຈັດຕັ້ງພິທີເຜີຍແຜ່ ແລະ ເຊື່ອມຊືມເອກະສານກ່ຽວກັບວັນສະຖາປະນາ ສປປ ລາວ ຄົບຮອບ 43 ປີ, ເອກະສານວັນຄ້າຍວັນເກີດຂອງປະທານ ໄກສອນ ພົມວິຫານ ແລະ ເອກະສານວັນສ້າງຕັ້ງເມືອງວຽງໄຊ ຖານທີ່ໝັ້ນຂອງການປະຕິວັດລາວ ຄົບຮອບ 50 ປີ ໂດຍການເປັນປະທານ ແລະ ໃຫ້ກຽດຂຶ້ນບັນຍາຍຂອງສະຫາຍ ວິໂຣດ ສຸນດາຣາ, ເລຂາໜ່ວຍພັກສະຖານທູດ, ເອກອັກຄະລັດຖະທູດ ແຫ່ງ ສປປ ລາວ ປະຈໍາປະເທດຍີ່ປຸ່ນ ທີ່ມີການເຂົ້າຮ່ວມຂອງສະມາຊິກພັກ-ພະນັກງານສະຖານທູດ ແລະ ຄອບຄົວຄະນະນໍາສະຖານທູດ. ພາຍຫຼັງສໍາເລັດການຮໍ່າຮຽນເອກະສານດັ່ງກ່າວ, ສະມາຊິກພັກ-ພະນັກງານສະຖານທູດ ແລະ ຄອບຄົວທຸກໆສະຫາຍ ກໍ່ໄດ້ພ້ອມພາກັນອອກແຮງງານອະນາໄມລວມຢູ່ສະຖານທູດ ແລະ ຈັດຕັ້ງການແຂ່ງຂັນກິລາສາມັກຄີຮ່ວມກັນ ທີ່ມີບັນຍາກາດອັນຟົດຟື້ນ ແລະ ມ່ວນຊື່ນ.
ໃນຕອນເຊົ້າຂອງວັນທີ 21 ພະຈິກ 2018, ທີ່ ສູນຝຶກອົບຮົມແລະ ຮ່ວມມືສາກົນ (ICTC), ນະຄອນຫຼວງວຽງຈັນ, ສະຖາບັນການຕ່າງປະເທດ, ກະຊວງການຕ່າງປະເທດ, ໄດ້ຈັດກອງປະຊຸມສຳມະນາວິຊາການຂຶ້ນ ພາຍໃຕ້ຫົວຂໍ້ “ໜຶ່ງແລວໜຶ່ງເສັ້ນທາງ: ກາລະໂອກາດ ແລະ ສິ່ງທ້າທາຍ ຕໍ່ ສປປ ລາວ”. ກ່າວເປີດກອງປະຊຸມສຳມະນາໃນຄັ້ງນີ້ແມ່ນ ທ່ານ ນາງ ໄກມະນີ ອໍລະບູນ, ຮອງຫົວໜ້າສະຖາບັນການຕ່າງປະເທດ ແລະ ທ່ານ ຊິນ ເສິນ, ເລຂາເອກ ສະຖານເອກອັກຄະລັດຖະທູດ ສປ ຈີນ, ທີ່ ນະຄອນຫຼວງວຽງຈັນ. ພ້ອມດ້ວຍບັນດາຜູ້ເຂົ້າຮ່ວມທີ່ເປັນນັກຄົ້ນຄວ້າ ແລະ ນັກວິຊາການ ຈາກບັນດາສະຖາບັນ ແລະ ຂະແໜງການຕ່າງໆຂອງພາກລັດ ເຂົ້າຮ່ວມຫຼາຍກວ່າ 40 ທ່ານ.