ໃນວັນທີ 10 ມັງກອນ 2019, ທີ່ທຳນຽບປະທານາທິບໍດີ ຣາສະຕຼາປະຕີ ບາວັນ (Rashtrapati Bhavan), ນິວ ເດນລີ, ທ່ານ ບຸນແນມ ຈວງຫອມ ໄດ້ຍື່ນສານແຕ່ງຕັ້ງຕໍ່ ພະນະທ່ານ ຣາມ ນາດ ໂກວິນ (Ram Nath Kovind), ປະທານາທິບໍດີ ແຫ່ງ ສາທາລະນະລັດ ອິນເດຍ, ເພື່ອດຳລົງຕຳແໜ່ງເປັນ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະ ນະລັດ ອິນເດຍ.
ໃນຕອນເຊົ້າຂອງວັນທີ 7 ມັງກອນ 2019, ທີ່ທຳນຽບປະທານາທິບໍດີ, ນະຄອນຫລວງວຽນ, ສາທາລະນະລັດ ໂອຕຣິດ, ທ່ານ ສີທົງ ຈິດໂຍທິນ ໄດ້ຍື່ນສານຕາຕັ້ງຕໍ່ ທ່ານ ອາເລັສຊັນເດີ ເເວນເດີ ເບວເເລນ (Alexander Vander Bellen), ປະທານາທິບໍດີ ແຫ່ງ ສາທາລະນະລັດ ໂອຕຣິດ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສາທາລະນະລັດ ໂອຕຣິດ.
ໃນຕອນເຊົ້າຂອງວັນທີ 23 ທັນວາ 2018, ທ່ານ ອໍາໄພ ກິນດາວົງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ຣາຊະອານາຈັກ ກໍາປູເຈຍ, ທີ່ມີສໍານັກງານຕັ້ງຢູ່ນະຄອນຫຼວງພະນົມເປັນ ພ້ອມດ້ວຍພະນັກງານນັກການທູດ ໄດ້ໄປພົບປະໂອ້ລົມກັບບັນດານ້ອງໆນັກສຶກສາລາວ ທີ່ກໍາລັງສຶກສາຄົ້ນຄ້ວາຮໍ່າຮຽນຢູ່ນະຄອນຫຼວງພະນົມເປັນ, ຈໍານວນນັກສຶກສາທັງໝົດມີ 64 ຄົນ. ໃນນັ້ນ, ມີນັກສຶກສາຝ່າຍປົກຄອງ ຈໍານວນ 49 ຄົນ ແລະ ຝ່າຍກອງທັບ 15 ຄົນ, ຊຶ່ງເປັນທຶນແລກປ່ຽນ ລະຫວ່າງ ລັດຖະບານຂອງສອງປະເທດ ລາວ ແລະ ກໍາປູເຈຍ ປີລະ 10 ທຶນ ແລະ ເລີ້ມແຕ່ປີ 2019 ຈະເພີ້ມເປັນປີລະ 15 ທຶນ. ພິທີດັ່ງກ່າວໄດ້ຈັດຂື້ນຢູ່ຫ້ອງປະຊຸມ ທີ່ ຫໍພັກຂອງນັກສຶກສາຕ່າງປະເທດ. ໃນພິທີດັ່ງກ່າວ ໄດ້ມີຕາງໜ້າໃຫ້ຄະນະນັກສຶກສາຂື້ນສະຫຼຸບລາຍງານຫຍໍ້ສະພາບການຮຽນ ແລະ ການດໍາລົງຊີວິດປະຈໍາສົກປີ 2017-2018 ໃຫ້ທ່ານທູດ ແລະ ຄະນະນໍາສະຖານທູດໄດ້ຮັບຊາບ ໂດຍໄດ້ຍົກໃຫ້ເຫັນເຖິງຜົນສໍາເລັດໃນການສຶກສາຄົ້ນຄ້ວາຮໍ່າຮຽນໃນໄລຍະຜ່ານມາ. ໃນນັ້ນ, ກໍ່ໄດ້ສະແດງໃຫ້ເຫັນທາງດ້ານການເມືອງ-ແນວຄິດ, ດ້ານວິຊາສະເພາະ, ການເຄື່ອນໄຫວນອກຫຼັກສູດ ແລະ ຜົນງານຕ່າງໆ ທີ່ໄດ້ປະກອບສ່ວນເຄື່ອນໄຫວໃນໄລຍະຜ່ານມາ ເວົ້າເຖິງຈຸດດີ, ຈຸດອ່ອນ, ຂໍ້ສະດວກ, ຂໍ້ຫຍຸ້ງຍາກໃນການດໍາລົງຊີວິດໃນຫໍພັກ ແລະ ຂໍ້ສະເໜີອື່ນໆ ຜ່ານມາສະຖານທູດລາວ ກໍ່ໄດ້ເອົາໃຈໃສ່ສຶກສາອົບຮົມທາງດ້ານການເມືອງ-ແນວຄິດ ໃຫ້ຄໍາຕັກເຕືອນ ແລະ ຊ່ວຍເຫຼືອແກ້ໄຂຄວາມຫຍຸ້ງຍາກ ໃຫ້ແກ່ນັກສຶກສາໄດ້ຫຼາຍດ້ານ ເປັນຕົ້ນແມ່ນ ໄດ້ປະສານກັບກະຊວງສຶກສາຊາວໝຸ່ມ ແລະ ກິລາ ຂອງກໍາປູເຈຍ ເພື່ອເປັນການຊຸກຍູ້ສົ່ງເສີມດ້ານການສຶກສາຮໍ່າຮຽນ ໃຫ້ໄດ້ຮັບຜົນດີ.