ໃນວັນທີ 03 ເມສາ 2015, ທີ່ ສູນກາງສະຫະພັນກຳມະບານລາວ, ສະຫະພັນກຳມະບານກະ ຊວງການຕ່າງ ປະເທດ ແລະ ຄະນະພົວພັນຕ່າງປະເທດສູນກາງພັກ ເຊິ່ງນຳໂດຍ ສະຫາຍ ຄຳອິນ ຄິດຈະເດດ ໄດ້ເຂົ້າອວຍພອນ ສະຫາຍ ຄຳຫຼ້າ ລໍລອນສີ, ກຳມະການສູນກາງພັກ, ປະທານສູນກາງກຳມະບານລາວ ເນື່ອງໃນໂອກາດຜົນສຳເລັດກອງປະຊຸມໃຫຍ່ ຄັ້ງທີ X ຂອງສະຫະພັນກຳມະ ບານກະຊວງການຕ່າງ ປະເທດ ແລະ ຄະນະພົວພັນຕ່າງປະເທດສູນກາງພັກ. ໃນໂອກາດດັ່ງກ່າວ, ສະຫາຍ ຄຳຫຼ້າ ລໍລອນສີ ກໍ່ໄດ້ໂອ້ລົມ ແລະ ຍ້ອງຍໍຊົມເຊີຍຜົນງານທີ່ສະຫະພັນກຳມະບານກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ທີ່ຍາດມາໄດ້ໃນໄລຍະຜ່ານມາ ແລະ ໄດ້ເນັ້ນໃຫ້ກຳມະບານທຸກຂັ້ນຈົ່ງຊ່ວຍກັນແກ້ໄຂບັນດາຂໍ້ຄົງຄ້າງ, ປະຕິບັດສິດພາລະບົດບາດກຳມະບານຕິດພັນກັບວຽກງານຂອງຕົນໃຫ້ແທດເໝາະ ແນໃສ່ເຮັດໃຫ້ສະມາຊິກກຳມະບານ ມີຄວາມເຂົ້າໃຈແຈ້ງຕໍ່ແນວທາງຂອງພັກ ແລະ ກົດລະບຽບຂອງລັດ ກໍຄືແນວທາງນະໂຍບາຍການຕ່າງປະເທດຂອງພັກເຮົາ ເພື່ອປົກປ້ອງສິດຜົນປະໂຫຍດຂອງເຂົາເຈົ້າຢ່າງແທ້ຈິງ.
ໃນວັນທີ 24 ມີນາ 2015, ທີ່ກະຊວງການຕ່າງປະເທດ, ສາມອົງການຈັດຕັ້ງມະຫາຊົນ ປະກອບມີ: ສະຫະພັນກຳມະມານ, ຄະນະບໍລິຫານງານຊາວໜຸ່ມ ແລະ ສະຫະພັນແມ່ຍິງຂອງກະຊວງການ ຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ໄດ້ເຂົ້າອວຍພອນຄະນະພັກ, ຄະນະນຳ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ເນື່ອງໃນໂອກາດວັນ ສ້າງຕັ້ງພັກປະຊາຊົນ ປະຕິວັດລາວ ຄົບຮອບ 60 ປີ (22 ມີນາ 1955 ຫາ 22 ມີນາ 2015).
ຄະນະບໍລິຫານງານຊາວຫນຸ່ມ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ໄດ້ດຳເນີນກອງປະຊຸມໃຫຍ່ ຄັ້ງທີ X ຂອງຕົນຂຶ້ນ ໃນຕອນເຊົ້າຂອງວັນທີ 20 ມີນາ 2015, ທີ່ຫ້ອງປະຊຸມໃຫຍ່ ກະຊວງການຕ່າງປະເທດ, ພາຍໃຕ້ການເປັນປະທານຂອງ ສະຫາຍ ແສງແກ້ວ ປວງປະດິດ, ກຳມະການສູນກາງຊາວຫນຸ່ມປະຊາຊົນ ປະຕິວັດລາວ, ເລຂາຄະນະບໍລິຫານງານຊາວຫນຸ່ມ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ, ໂດຍການໃຫ້ກຽດເຂົ້າຮ່ວມຂອງ ສະຫາຍ ນາງ ສູນທອນ ໄຊຍະຈັກ, ກຳມະການສູນກາງພັກ, ຮອງເລຂາຄະນະພັກກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ, ລັດຖະມົນຕີຊວຍວ່າການກະຊວງການຕ່າງປະເທດ; ສະຫາຍ ດຣ. ວິໄລວົງ ບຸດດາຄຳ, ເລຂາຄະນະພັກ, ເລຂາຄະນະບໍລິຫານງານຊາວຫນຸ່ມ ປະຊາຊົນ ປະຕິວັດລາວ ; ມີບັນດາອົງການຈັດຕັ້ງມະຫາຊົນຂອງກະຊວງ, ຄະນະບໍລິຫານງານຊາວຫນຸ່ມ, ສະມາຊິກຊາວຫນຸ່ມ ແລະ ແຂກຖືກເຊີນ ເຂົ້າຮ່ວມຢ່າງພ້ອມພຽງ.