ໃນວັນທີ 21 ກັນຍາ 2022, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ທັງເປັນຄະນະກໍາມະການຊີ້ນໍາລວມ ພິທີວາງສີລາລຶກເປີດການກໍ່ສ້າງໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ V (ບໍລິຄໍາໄຊ-ບຶງການ) ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມຄວາມຄືບໜ້າໂຄງການກໍ່ສ້າງຂົວມິດຕະພາບ ດັ່ງກ່າວ ທີ່ ແຂວງບໍລິຄໍາໄຊ ເພື່ອກະກຽມໃຫ້ແກ່ພິທີວາງສີລາລຶກໂຄງການດັ່ງກ່າວ ທີ່ຈະມີຂຶ້ນໃນມໍ່ໆນີ້.

ໃນວັນທີ 21 ກັນຍາ 2022, ທີ່ ນະຄອນປາກເຊ, ແຂວງ ຈໍາປາສັກ, ກົມພົວພັນຄົນເຊື້ອຊາດລາວຢູ່ຕ່າງປະເທດ, ກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່, ການຈັດຕັ້ງປະຕິບັດວຽກງານພົວພັນຄົນເຊື້ອຊາດລາວຢູ່ຕ່າງປະເທດ ແລະ ບັນດານິຕິກໍາທີ່ກ່ຽວຂ້ອງ ສຳລັບ 04 ແຂວງພາກໃຕ້ ຈໍາປາສັກ, ສາລະວັນ, ເຊກອງ ແລະ ອັດຕະປື ຢູ່ທີ່ ຫ້ອງວ່າການປົກຄອງແຂວງຈໍາປາສັກ. ໂດຍພາຍໃຕ້ການເປັນປະທານຮ່ວມຂອງ ທ່ານ ຕິ່ງ ສຸກສັນ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ໂສມ ບຸດຕະກຸນ, ຮອງເຈົ້າແຂວງຈໍາປາສັກ. ຜູ້ເຂົ້າຮ່ວມກອງປະຊຸມດັ່ງກ່າວມີບັນດາຫົວໜ້າຫ້ອງວ່າການປົກຄອງແຂວງ, ຫົວໜ້າພະແນກ, ຮອງຫົວໜ້າພະແນກການຕ່າງປະເທດ, ກອງບັນຊາການ ປກສ, ພະແນກຖະແຫຼງຂ່າວ-ວັດທະນະທໍາ ແລະ ທ່ອງທ່ຽວ, ພະແນກອຸດສາຫະກໍາ ແລະ ການຄ້າ, ພະແນກແຜນການ ແລະ ການລົງທຶນ, ແນວລາວສ້າງຊາດ, ບັນດາອົງການຈັດຕັ້ງມະຫາຊົນ ແລະ ພາກສ່ວນອື່ນໆ ທີ່ກ່ຽວຂ້ອງລວມທັງໝົດ 85 ທ່ານ.

ໃນຕອນບ່າຍຂອງ ວັນທີ 15 ກັນຍາ 2022, ສະຖາບັັນການຕ່າງປະເທດ, ກະຊວງການຕ່າງປະ ເທດ ໄດ້ຈັດພິທີເປີດຕົວປຶ້ມ “70 ປີ ການພົວພັນການທູດ ລາວ-ອົດສະຕຣາລີ” ຢ່າງເປັນທາງການ, ເພື່ອເປັນການລະນຶກເຖິງ ຄົບຮອບ 70 ປີ ການສ້າງຕັ້ງສາຍພົວພັນການທູດ ລາວ-ອົດສະຕຣາລີ, ໂດຍການເປັນປະທານ ແລະ ກ່າວເປີດພິທີ ຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ ກະຊວງການຕ່າງປະເທດ, ເຊິ່ງມີ ທ່ານທູດ ໄມ ໄຊຍະວົງສ໌, ຫົວໜ້າສະຖາບັນຫານຕ່າງປະເທດ, ທ່ານ Daniel Heldon, ຮອງທູດອົດສະຕຣາລີ ປະຈໍາ ສປປ ລາວ, ບັນດາທ່ານອະດີດທູດອາວຸໂສຂອງລາວ, ຜູ້ຕາງໜ້າຈາກສະຖາບັນ ລາວ-ອົດສະຕຣາລີ, ຄະນະພົວພັນຕ່າງປະເທດສູນກາງພັກ ແລະ ຄະນະກົມພາຍໃນກະຊວງການຕ່າງປະເທດ ເຂົ້າຮ່ວມໃນພິທີ ຫຼາຍກວ່າ 50 ທ່ານ.

ພິທີເປີດຕົວປຶ້ມ “70 ປີ ການພົວພັນການທູດ ລາວ-ອົດສະຕຣາລີ” ແມ່ນໜຶ່ງໃນກິດຈະກໍາທີ່ສໍາຄັນ ເພື່ອປະກອບສ່ວນເຂົ້າໃນການສ້າງຂະບວນການສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລາວ-ອົດສະຕຣາລີ ຄົບຮອບ 70 ປີ (16/01/1952-16/01/2022). ປຶ້ມເຫຼັ້ມນີ້ ໄດ້ສັງລວມເອົາປະຫວັດ ແລະ ຄວາມເປັນມາການພົວພັນຮ່ວມມື ໃນຂະແໜງການຕ່າງໆ ລະຫວ່າງ ລາວ ແລະ ອົດສະຕຣາລີ ໂດຍໄດ້ລົງເລິກການພົວພັນຮ່ວມມືສອງຝ່າຍ ແລະ ຫຼາຍຝ່າຍ ຢູ່ໃນພາກພື້ນ ແລະ ສາກົນ, ແລະ ການພົວພັນ ນັບແຕ່ໄລຍະກ່ອນ ແລະ ຫຼັງການສະຖາປະນາ ສປປ ລາວ ຢ່າງເປັນທາງການ ໃນປີ 1975. ພ້ອມນີ້, ອົດສະຕຣາລີ ຍັງໄດ້ໃຫ້ການຊ່ວຍເຫຼືອ ສປປ ລາວ ໃນຂະແໜງການສຶກສາ ແລະ ພັດທະນາຢູ່ຫຼາຍຂະ       ແໜງການໃນທົ່ວປະເທດ.

ປຶ້ມ “70 ປີ ການພົວພັນການທູດ ລາວ-ອົດສະຕຣາລີ”, ສະຖາບັນການຕ່າງປະເທດ ໄດ້ມີການລິເລີ່ມແນວຄວາມຄິດ ແລະ ລົງມືຄົ້ນຄວ້າຮຽບຮຽງມາແຕ່ທ້າຍປີ 2021, ພາຍໃຕ້ຄວາມເອົາໃຈໃສ່ຊີ້ນໍາຢ່າງໃກ້ຊິດຈາກຄະນະນໍາກະຊວງການຕ່າງປະເທດທຸກຂັ້ນ, ຄະນະບັນນາທິການອາວຸໂສ ແລະ ຄະນະສະຖາບັນການຕ່າງປະເທດ ທີ່ມີປະສົບການ ແລະ ໄດ້ເຮັດວຽກຕົວຈິງ ໃນການຮຽບຮຽງ ແລະ ກວດແກ້ເນື້ອໃນ ໃຫ້ມີຄວາມຄົບຖ້ວນສົມບູນຍິ່ງຂຶ້ນ. ນອກຈາກນັ້ນ, ຍັງໄດ້ຮັບການຮ່ວມມື ແລະ ສະໜອງຂໍ້ມູນຕ່າງໆ ທີ່ເປັນປະໂຫຍດ ຈາກບັນດາກົມພາຍໃນກະຊວງການຕ່າງປະເທດ, ກະຊວງອ້ອມຂ້າງສູນກາງ ແລະ ອົງການ ຈັດຕັ້ງທີ່ກ່ຽວຂ້ອງ, ຈຶ່ງສາມາດສໍາເລັດລຸລ່ວງໄປໄດ້. ພ້ອມດຽວກັນນີ້, ສະຖານເອກອັກຄະລັດຖະທູດ ແຫ່ງ ອົດສະຕຣາລີ ປະຈໍາ ສປປ ລາວ ຍັງໄດ້ໃຫ້ການສະໜັບສະໜູນທາງດ້ານງົບປະມານໃນການຈັດພິມຈໍານວນໜຶ່ງ.

ຈາກຜົນສຳເລັດຢ່າງຈົບງາມຄັ້ງນີ້, ສະຖາບັນການຕ່າງປະເທດ ສາມາດຈັດພິມຄັ້ງທໍາອິດ ລວມເປັນຈໍານວນ 1.000 ຫົວ ອອກສູ່ສາຍຕາຜູ້ອ່ານ. ປຶ້ມຫົວດັ່ງກ່າວ ຈະເປັນແຫຼ່ງຂໍ້ມູນທີ່ເປັນປະໂຫຍດສໍາລັບນັກການທູດ, ນັກຄົ້ນຄວ້າ, ນັກຮຽນຮູ້ປັນຍາຊົນ ກໍຄື ຜູ້ອ່ານທົ່ວໄປທີ່ມີຄວາມສົນໃຈ ກ່ຽວກັບ ການພົວພັນຮ່ວມມື ລາວ-ອົດສະຕຣາລີ ໃນຂອບສອງຝ່າຍ ແລະ ຫຼາຍຝ່າຍ ທີ່ພົ້ນເດັ່ນ ແນໃສ່ເປັນບ່ອນອີງທີ່ສໍາຄັນໃນການສຶກສາ ແລະ ຄົ້ນຄວ້າວິໃຈ ເພື່ອສົ່ງເສີມການພົວພັນຮ່ວມມື ລາວ-ອົດສະຕຣາລີ ໃນຕໍ່ໜ້າ. ຂໍຖືໂອກາດນີ້, ຂໍຂອບໃຈມາຍັງທຸກພາກສ່ວນທີ່ກ່ຽວຂ້ອງ ທີ່ໃຫ້ການສະໜັບສະໜູນ ແລະ ທຸ້ມເທ ເພື່ອເຮັດໃຫ້ປຶ້ມເຫຼັ້ມດັ່ງກ່າວ ສາມາດເປີດຕົວຢ່າງເປັນທາງການ.