ໃນຕອນບ່າຍຂອງວັນທີ 23 ສິງຫາ 2022, ທີ່ ກະຊວງການຕ່າງປະເທດ ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ ນາງ ອຸຣິຣັດ ຈະເລີນໂຕ, ຫົວໜ້າກົມຮ່ວມມືລະຫວ່າງປະເທດ (TICA), ກະຊວງການຕ່າງປະເທດໄທ ເນື່ອງໃນໂອກາດທີ່ໄດ້ເດີນທາງມາຢ້ຽມຢາມ ແລະ ເຂົ້າຮ່ວມກອງປະຊຸມການຮ່ວມມືທາງດ້ານວິຊາການລາວ-ໄທ ຄັ້ງທີ 24 ທີ່ ແຂວງຫຼວງພະບາງ.
ໃນລະຫວ່າງວັນທີ 16-18 ສິງຫາ 2022 ທີ່ຜ່ານມາ ທ່ານ ຕິ່ງ ສຸກສັນ, ຮອງເລຂາຄະນະພັກກະຊວງ, ຮອງລັດຖະມົນຕີກະຊວງການຕ່າງປະເທດ ພ້ອມຄະນະ ໄດ້ເຄື່ອນໄຫວວຽກງານ ຢູ່ ແຂວງຈໍາປາສັກ, ຈຸດປະສົງ ແມ່ນເພື່ອຊຸກຍູ້, ຕິດຕາມ, ກວດກາ ວຽກງານກໍ່ສ້າງພັກ-ວຽກງານຄຸ້ມຄອງພະນັກງານ ຢູ່ ກອງສໍາຫຼວດ ແລະ ປັກຫຼັກໝາຍຊາຍແດນ: ເພື່ອໃຫ້ພະນັກງານ-ສະມາຊິກພັກ ກໍາແໜ້ນ 5 ຫຼັກການ, 3 ທິດນໍາຂອງພັກ ແລະ ໃຫ້ເຂົ້າໃຈຢ່າງເລິກເຊິ່ງກ່ຽວກັບວຽກງານຄຸ້ມຄອງພະນັກງານ, ເພື່ອເຮັດໃຫ້ພະນັກງານກໍາໄດ້ສະພາບການຕ່າງໆ ທັງພາກພື້ນ ແລະ ສາກົນ, ຈໍາແນກໄດ້ການຫັນປ່ຽນໂດຍສັນຕິຂອງພວກອິດທິກໍາລັງປໍລະປັກ, ມີຄວາມເຊື່ອໜັ້ນຕໍ່ການນໍາພາຂອງພັກ ໃນການປະຕິບັດໜ້າທີ່ວຽກງານສໍາຫຼວດ ແລະ ປັກຫຼັກໝາຍຊາຍແດນ ກັບປະເທດໃກ້ຄຽງທີ່ຍັງບໍ່ທັນສໍາເລັດ ໂດຍສະເພາະຊາຍແດນ ລາວ-ໄທ ແລະ ລາວ-ກໍາປູເຈຍ.
ໃນວັນທີ 17 ສິງຫາ 2022, ເພື່ອສືບຕໍ່ຊຸກຍູ້ຜັນຂະຫຍາຍ ແລະ ຮ່ວມກັນຕີລາຄາຄືນການຈັດຕັ້ງປະຕິບັດແຜນປະຕິບັດງານການຮ່ວມມືດ້ານວຽກງານການທູດເສດຖະກິດ 2020-2025 ຂອງສອງກະຊວງການຕ່າງປະເທດ ລາວ-ຫວຽດນາມ ແລະ ທັງເປັນການປະກອບສ່ວນໃນການສະເຫຼີມສະຫຼອງສອງວັນປະຫວັດສາດ ຄື ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທີສັນຍາມິດຕະພາບ ແລະ ການຮ່ວມມື ລະຫວ່າງ ລັດຖະບານ ສປປ ລາວ ແລະ ລັດຖະບານ ສສ.ຫວຽດນາມ ກົມເສດຖະກິດ, ກະຊວງການຕ່າງປະເທດ ແຫ່ງ ສປປ ລາວ ໄດ້ຮ່ວມກັບ ກົມສັງລວມເສດຖະກິດ, ກະຊວງການຕ່າງປະເທດ ແຫ່ງ ສສ.ຫວຽດນາມ ຈັດກອງປະຊຸມແລກປ່ຽນ ແລະ ຖອດຖອນບົດຮຽນ ພາຍໃຕ້ຫົວຂໍ້ ‘ການເພີ່ມທະວີການຮ່ວມມືວຽກງານການທູດເສດຖະກິດ ລະຫວ່າງ ສປປ ລາວ ແລະ ສສ.ຫວຽດນາມ’ ຂຶ້ນ ທີ່ກະຊວງການຕ່າງປະເທດ, ໃນຮູບແບບເຊິ່ງໜ້າ ແລະ ທາງໄກ; ກອງປະຊຸມດັ່ງກ່າວໃຫ້ກຽດກ່າວເປີດໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ຫງວຽນ ບາ ຮຸ່ງ, ເອກອັກຄະລັດຖະທູດແຫ່ງ ສສ.ຫວຽດນາມ ປະຈໍາ ສປປ ລາວ, ແລະ ກອງປະຊຸມໄດ້ດໍາເນີນພາຍໃຕ້ການເປັນປະທານຮ່ວມຂອງ ທ່ານ ກິ່ງໂພແກ້ວ ພົມມະຫາໄຊ, ຫົວໜ້າກົມເສດຖະກິດ, ກະຊວງການຕ່າງປະເທດ ສປປ ລາວ ແລະ ທ່ານ ນາງ ຫງວຽນ ມິງ ຮັ່ງ, ຜູ້ຊ່ວຍລັດຖະມົນຕີ, ຫົວໜ້າກົມສັງລວມເສດຖະກິດ, ກະຊວງການຕ່າງປະເທດ ສສ.ຫວຽດນາມ, ໂດຍມີຜູ້ຕາງໜ້າຈາກກະຊວງຂະແໜງການທີ່ກ່ຽວຂ້ອງຂອງສູນກາງ, ບັນດາກົມຕ່າງໆຂອງກະຊວງການຕ່າງປະເທດ ແລະ ພະແນກການຕ່າງປະເທດຂອງແຂວງຕ່າງໆ ໃນທົ່ວປະເທດ ເຂົ້າຮ່ວມຢ່າງພ້ອມພຽງ.