ໃນວັນທີ 30 ພະຈິກ 2021, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ໄດ້ນໍາພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມປະຈໍາປີລະດັບລັດຖະມົນຕີ ຄັ້ງທີ 45 ຂອງກຸ່ມ 77 (the 45th Annual Meeting of Minister for Foreign Affairs of the Group of 77)ຜ່ານລະບົບທາງໄກ. ກອງປະຊຸມດັ່ງກ່າວ ແມ່ນຈັດຂື້ນທຸກໆປີ ທີ່ ສໍານັກງານໃຫຍ່ອົງການ ສປຊ, ນິວຢອກ, ສະຫະລັດອາເມລິກາ. ຈຸດປະສົງແມ່ນເພື່ອປຶກຫາສາລື ການສົ່ງເສີມຂອບການຮ່ວມມືຂອງກຸ່ມປະເທດກໍາລັງພັດທະນາ ໂດຍສະເພາະແມ່ນ ການຮັບມື ແລະ ການຟຶ້ນຟູຜົນກະທົບທາງດ້ານເສດຖະກິດ ຈາກການແຜ່ລະບາດຂອງພະຍາດໂຄວິດ-19 ແນໄສ່ຊຸກຍູ້ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງໃຫ້ໄດ້ຮັບຜົນສໍາເລັດ.
ໃນຕອນເຊົ້າຂອງວັນທີ 29 ພະຈິກ 2021, ທີ່ ກະຊວງການຕ່າງປະເທດ, ທ່ານ ລີ ຢົງ ຊົນ, ເອກອັກຄະລັດຖະທູດ ແຫ່ງ ສປປ ເກົາຫຼີ ປະຈໍາ ສປປ ລາວ ໄດ້ເຂົ້າອວຍພອນຄະນະນໍາກະຊວງການຕ່າງປະເທດ ເນື່ອງໃນໂອກາດວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 46 ປີ, ຕາງໜ້າກະຊວງການຕ່າງປະເທດຕ້ອນຮັບໂດຍ ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ.
ໃນວັນທີ 17 ພະຈິກ 2021, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ເວທີປຶກສາຫາລືການຮ່ວມມືແຫ່ງອາຊີ (ACD) ໃນຮູບແບບທາງໄກ,ໂດຍການເປັນປະທານຮ່ວມຂອງ ລັດຖະມົນຕີຕ່າງປະເທດ ສາທາລະນະລັດ ຕວັກກີ ແລະ ລັດຖະມົນຕີຕ່າງປະເທດ ຣາຊະອານາຈັກ ບາເຣນ, ເຊິ່ງມີບັນດາລັດຖະມົນຕີ, ຮອງລັດຖະມົນຕີ, ຜູ້ຕາງໜ້າຈາກບັນດາປະເທດສະມາຊິກ ເອຊີດີ, ເລຂາທິການ ACD ແລະ ອົງການຈັດຕັ້ງສາກົນຕ່າງໆ ເຂົ້າຮ່ວມ.