ໃນຕອນບ່າຍວັນທີ 7 ກໍລະກົດ 2018, ເວລາ 14:00 ໂມງ, ທີ່ພະລາດຊະວັງ ອິສະຕານານູຣູນອີມານ (Istana Nurul Iman), ທ່ານ ພອນທະວີ ບຸດດາລາ ໄດ້ດຳເນີນການຍື່ນສານຕາຕັ້ງຕໍ່ ອົງສົມເດັດ ຊຸນຕານ ຮາຈິ ຮາຊານານ ໂບນເກຍ ແຫ່ງ ບຣູໄນ ດາຣູຊາລາມ (His Majesty Sultan Haji Hassanal Bolkiah, the Sultan and Yang Di-Pertuan of Brunei Darussalam) ເພື່ອດຳລົງຕຳແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ປະເທດ ບຣູໄນ ດາຣູຊາລາມ ທີ່ມີສຳນັກງານສະຖານທູດຕັ້ງຢູ່ ນະຄອນຫຼວງບັນດາເສຣິເບກາວັນ, ປະເທດ ບຣູໄນ ດາຣູຊາລາມ.
ໃນວັນທີ 11 ກໍລະກົດ 2018, ທີ່ ທຳນຽບລັດຖະບານທີ່ນະຄອນຫລວງແຄນເບຣາ, ທ່ານ ສີສະຫວາດ ອິນພະຈັນ ໄດ້ຍື່ນສານຕາຕັ້ງຕໍ່ພະນະທ່ານ ປີເຕີ ໂກສກຣົບ, ຜູ້ສໍາເລັດລາຊະການແຫ່ງເຄືອຈັກກະພົບອົດສະຕຣາລີ ເພື່ອດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວປະຈໍາ ເຄືອຈັກກະພົບອົດສະຕຣາລີ, ໂດຍມີສຳນັກງານສະຖານທູດຕັ້ງຢູ່ນະຄອນຫຼວງແຄນເບີຣາ.
ໃນໂອກາດນີ້, ພະນະທ່ານຜູ້ສໍາເລັດລາຊະການປີເຕີໂກສກຣົບ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຊົມເຊີຍທ່ານ ສີສະຫວາດ ອິນພະຈັນ ທີ່ໄດ້ຖືກແຕ່ງຕັ້ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ເຄືອຈັກກະພົບ ອົດສະຕຣາລີ. ທ່ານທູດລາວໄດ້ນໍາເອົາຄວາມຢ້ຽມຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຈາກພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປລາວ ຝາກເຖິງຜູ້ສໍາເລັດລາຊະການແຫ່ງເຄືອຈັກກະພົບອົດສະຕຣາລີແລະ ສະແດງຄວາມຂອບໃຈ ຢ່າງຈິໃຈ ຕໍ່ການຕ້ອນຮັບອັນອົບອຸ່ນ ແລະ ການຈັດພິທີຍື່ນສານຕາຕັ້ງສະເພາະໄຫ້ແກ່ທູດລາວ ໃນຄັ້ງນີ້.
ພ້ອມກັນນີ້, ທ່ານທູດ ສີສະຫວາດ ອິນພະຈັນ ກໍໄດ້ແຈ້ງໃຫ້ຜູ້ສໍາເລັດລາຊະການຊາບໂດຍຫຍໍ້ກ່ຽວກັບ ການພັດທະນາເສດຖະກິດ-ສັງຄົມ ຂອງ ສປປ ລາວ, ໄດ້ສະແດງຄວາມຍິນດີຕໍ່ການຮ່ວມມືທີ່ມີຫມາກຜົນຂອງສອງປະເທດໃນກອບສອງຝ່າຍ, ພາກພື້ນແລະສາກົນ. ໃນໂອກາດນີ້, ທ່ານທູດກໍໄດ້ຕາງຫນ້າ ລັດຖະບານ ແລະ ປະຊາຊົນ ແຫ່ງ ສປປ ລາວ ສະແດງຄວາມຂອບໃຈຕໍ່ລັດຖະບານກໍ່ຄືປະຊາຊົນອົດສະຕຣາລີ ທີ່ໄດ້ໄຫ້ການຊ່ວຍເຫລືອ ແລະ ສະຫນັບສະຫນູນ ສປປ ລາວ ໃນໄລຍະຜ່ານມາອັນໄດ້ປະກອບສ່ວນສຳຄັນເຂົ້າໃນການສ້າງສາພັດທະນາປະເທດແລະ ຫວັງວ່າຈະສືບຕໍ່ໄດ້ຮັບການຊ່ວຍເຫລືອໃນຊຸມປີຕໍ່ຫນ້າ. ພະນະທ່ານຜູ້ສໍາເລັດລາຊະການ ໄດ້ສະແດງຄວາມຂອບໃຈ ສປປ ລາວ ທີ່ໄດ້ໄຫ້ການຮ່ວມມື ແລະ ສະຫນັບສະຫນູນ ອົດສະຕຣາລີ ໃນເວທີພາກພື້ນ ແລະ ສາກົນ ແລະ ໄດ້ຢືນຢັນວ່າອົດສະຕຣາລີ ຈະສືບຕໍ່ໃຫ້ການຊ່ວຍເຫລືອ ແລະ ຮ່ວມມືກັບ ສປປ ລາວ ທັງໃນກອບສອງຝ່າຍ ແລະ ຫລາຍຝ່າຍ.
ພິທີຍື່ນສານຕາຕັ້ງຄັ້ງນີ້ ໄດ້ຈັດຂື້ນສະເພາະສຳລັບເອກອັກຄະລັດຖະທູດແຫ່ງສປປລາວແລະໄດ້ດຳເນີນໄປດ້ວຍບັນຍາກາດທີ່ດີແລະສົມກຽດ.
ລາວ ແລະ ອົດສະຕຣາລີ ໄດ້ສ້າງຕັ້ງສາຍພົນພັນການທູດນຳກັນ ໃນວັນທີ 15 ມັງກອນ 1952.
ໃນວັນທີ 28-29 ມິຖຸນາ 2018, ທ່ານ ສົງການ ຫລວງມຸນິນທອນ, ຫົວໜ້າກົມເສດຖະກິດ ກະຊວງການຕ່າງປະເທດ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສ ອາຊີ-ເອີຣົບ ຫລື ອາເຊັມ ທີ່ ນະຄອນຫລວງ ວຽນ, ປະເທດ ໂອຕຣິດ ເຊິ່ງກອງປະຊຸມດັ່ງກ່າວແມ່ນເພື່ອເປັນການສືບຕໍ່ກະກຽມໃຫ້ແກ່ກອງປະຊຸມສຸດຍອດອາເຊັມຄັ້ງທີ 12 ທີ່ຈະຈັດຂຶ້ນຢູ່ ນະຄອນຫລວງ ບຣຸກແຊນ ປະເທດແບນຊິກ ໃນວັນທີ 18-19 ຕຸລາ 2018.