ໃນ​ວັນ​ທີ 16 ກໍລະກົດ 2017, ສະຖານ​ເອກ​ອັກຄະ​ລັດຖະທູດ ​ແຫ່ງ ສປປ ລາວ ປະຈຳ ​ບຣູ​ໄນ ດາ​ຣູຊາລາມ​ ຮ່ວມ​ກັບ ສະຖານ​ເອກ​ອັກຄະ​ລັດຖະທູດ ສສ.ຫວຽດນາມ​​ ຈັດ​ງານ​ພົບ​ປະ​ສັງ​ສັນ​ປີ​ສາມັກຄີ​ມິດຕະພາບ ລາວ-ຫວຽດນາມ, ຫວຽດນາມ-ລາວ, ຢູ່​ສຳນັກງານ​ສະຖານທູດ​ລາວ ​ໂດຍ​ມີບັນດາ​ພະນັກງານ​ການ​ທູດ​ຈາກ​ສອງ​ສະຖານທູດ​ເຂົ້າ​ຮ່ວມ​. ການ​ພົບ​ປະ​ສັງ​ສັນ​ດັ່ງກ່າວ, ​ປະກອບ​ມີ​ກິດ​ຈະ​ກຳຫລີ້ນ​ກິລາ​ດອກ​ປີກ​ໄກ່, ຕີ​ບູນ, ຕີ​ປິ່ງປ່ອງ.

​    ໃນ​​ວັນ​ທີ 03 ກໍລະກົດ 2017, ທີ່ ສະຖານ​ເອກ​ອັກຄະ​ລັດຖະທູດ​ລາວ ປະຈຳ ສ.​ເກົາຫລີ, ​ໄດ້​ມີການ​ຈັດ​ຕັ້ງ​ພິ​ທີ ​ມອບ-ຮັບ ເຄື່ອງ​ຊ່ວຍ​ເຫລືອເປັນເກີບ​ກິ​ລາ ຈຳ​ນວນ 1.000 ຄູ່, ມູນ​ຄ່າ​ປະ​ມານ 30.000 ໂດ​ລາສະ​ຫະ​ລັດ,ຈາກ 4 ອົງ​ການຈັດ​ຕັ້ງເອກະຊົນຄື: ​ ໂຮງ​ຫມໍ ແບັກ ຂອງມະ​ຫາ​ວິ​ທະ​ຍາ​ໄລ ອິນ​ເຈ ແຫ່ງ ນະ​ຄອນ​ຫລວງ​ ເຊ​ອູນ (Inje University Seoul Paik Hospital), Bluecross Medical Volunteers, Community Chest of Korea ແລະ ​ Unique Union ຂອງ ສ.ເກົາ​ຫລີ ໃຫ້​ແກ່ ສ​ປ​ປ ລາວ, ໂດຍການເຂົ້າ​ຮ່ວມ​ໃນ​ພິ​ທີມີ​ ທ່ານ​ເອກ​ອັກ​ຄະ​ລັດ​ຖະ​ທູດ ຄຳ​ສວຍ ​ແກ້ວ​ດາລາ​ວົງ ແລະ ບັນດາປະ​ທານ​ຈາກ 4 ​ອົງ​ການດັ່ງກ່າວ, ພ້ອມນີ້ຍັງມີ ​ທ່ານ ໂອ ມຽງ​ຮ​ວັນ, ປະ​ທານ​ສະ​ມາ​ຄົມ​ມິດ​ຕະ​ພາບ ເກົາ​ຫລີ-ລາວ, ບັນດາ​ພະນັກງານ​ສະ​ຖານ​ທູດ ແລະ ພະ​ນັກ​ງານ​ຂອງ​ບັນ​ດາ​ອົງ​ການ​, ປະ​ທານ​ສະ​ມາ​ຄົມ​ນັກ​ສຶກ​ສາ​ລາວ ​ແລະ ນັກ​ສຶກສາລາ​ວ ທີ່ ສ.ເກົາ​ຫລີ ຈຳ​ນວນ​ຫນຶ່ງເຂົ້າຮ່ວມ.

    ສະຖານເອກອັກຄະລັດຖະທູດແຫ່ງ ສປປ ລາວ ປະຈໍາປະເທດ ຍີ່ປຸ່ນ ໄດ້ຈັດພິທີມອບສານແຕ່ງຕັ້ງຢ່າງສົມກຽດໃຫ້ແກ່ ທ່ານ ສ.ຈ. ອາກິຣະ ອາຣາສະກິ (Prof. Akira ARASAKI), ເປັນກົງສຸນກິດຕິມະສັກ ແຫ່ງ ສປປ ລາວ ຄົນໃໝ່ ປະຈຳ ແຂວງ ໂອກິນາວາ, ປະເທດ ຍີ່ປຸ່ນ, ໃນວັນທີ 03 ກໍລະກົດ 2017 ທີ່ສໍານັກງານສະຖານທູດ, ຊຶ່ງຕາງໜ້າໃຫ້ລັດຖະບານລາວ ມອບໂດຍ ທ່ານ ວິໂຣດ ສູນດາຣາ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳປະເທດ ຍີ່ປຸ່ນ ແລະ ມີພະນັກງານສະຖານທູດ ເຂົ້າຮ່ວມຢ່າງພ້ອມພຽງ.