ໃນວັນທີ 10 ມີນາ 2022, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ດີນາ ຈອຍ ດີ. ອາມາຕົງ (Ms. Deena Joy D. Amatong), ໃນໂອກາດຖືກແຕ່ງຕັ້ງໃຫ້ດຳລົງຕໍາແໜ່ງເປັນ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ຟີລິບປິນ ຄົນໃໝ່ ປະຈໍາ ສປປ ລາວ.
ການມອບໃບຢັ້ງຢືນຊາວໜຸ່ມ 4 ບຸກ ໃຫ້ແກ່ບັນດາໜ່ວຍຊາວໜຸ່ມອ້ອມຂ້າງກະຊວງການຕ່າງປະເທດ
ການມອບໃບຍ້ອງຍໍໃຫ້ແກ່ບັນດາຊາວໜຸ່ມຕົວແບບດີເດັ່ນ ຂອງບັນດາໜ່ວຍຊາວໜຸ່ມອ້ອມຂ້າງກະຊວງ
ໃນຕອນເຊົ້າຂອງວັນທີ 28 ກຸມພາ 2022, ທີ່ ກະຊວງການຕ່າງປະເທດ, ຄະນະຊາວໜຸ່ມປະຊາຊົນປະຕິວັດລາວ ກະຊວງການຕ່າງປະເທດ ໄດ້ຈັດກອງປະຊຸມສະຫຼຸບວຽກງານຊາວໜຸ່ມ ປະຈຳປີ 2021 ຂອງຕົນຂຶ້ນ. ພາຍໃຕ້ການເປັນປະທານຂອງ ສະຫາຍ ສະເຫຼີມໄຊ ກົມມະສິດ, ກຳມະການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການຕ່າງປະເທດ, ມີບັນດາສະຫາຍຄະນະພັກກະຊວງ, ເລຂາໜ່ວຍພັກ ແລະ ຕາງໜ້າໜ່ວຍພັກ ຈາກຫ້ອງການ ແລະ ບັນດາກົມຕ່າງໆ ຂອງກະຊວງການຕ່າງປະເທດ, ແຂກຖືກເຊີນ ຈາກສູນກາງຊາວໜຸ່ມ ແລະ ກະຊວງອ້ອມຂ້າງຈຳນວນໜຶ່ງ, ພ້ອມດ້ວຍສະມາຊິກຊາວໜຸ່ມຂອງກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ.
ໃນວັນທີ 07 ມີນາ 2022, ທີ່ ສະຖາບັນການຕ່າງປະເທດ, ກະຊວງການຕ່າງປະເທດ ໄດ້ຈັດພິທີເປິດຊຸດຝຶກອົບຮົມພະນັກງານໃໝ່ຂອງກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ຊຸດທີ 24 ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ສະເຫຼີມໄຊ ກົມມະສິດ, ກຳມະການກົມການເມືອງສູນກາງພັກ, ລັດຖະມົນຕີກະຊວງການຕ່າງປະເທດ , ໂດຍມີບັນດາຫົວໜ້າກົມ, ຄະນະກົມ , ຄະນະຮັບຜິດຊອບ, ນັກວິທະຍາກອນ ແລະ ນັກສຳມະນາກອນ ເຂົ້າຮ່ວມທັງໝົດ 50 ກວ່າ ທ່ານ. ຊຸດຝຶກອົບຮົມພະນັກງານໃໝ່, ຊຸດທີ 24 ນີ້ ມີຜູ້ເຂົ້າຮ່ວມຝຶກອົບຮົມຈໍານວນ 28 ທ່ານ, ຍິງ 15 ທ່ານ ໂດຍຈະດໍາເນີນໄປເປັນເວລາ 1 ເດືອນ ນັບແຕ່ວັນທີ 07 ມີນາ - 08 ເມສາ 2022.
ໃນພິທີ, ທ່ານ ໄມໄຊຍະວົງສ໌, ຫົວໜ້າສະຖາບັນການຕ່າງປະເທດ ໄດ້ລາຍງານເນື້ອໃນຫຼັກສູດ, ກົດລະບຽບ ແລະ ຂໍ້ແຂ່ງຂັນ ຂອງຊຸດຝຶກອົບຮົມ. ສຳລັບເນື້ອໃນໂຄງການຫຼັກສູດຂອງຊຸດຝຶກອົບຮົມນີ້ ແມ່ນຈະໄດ້ຮຽນຮູ້ກ່ຽວກັບພາລະບົດບາດຂອງກະຊວງການຕ່າງປະເທດ ແລະ ການເຄື່ອນໄຫວວຽກງານການຕ່າງປະເທດ ເປັນຕົ້ນ: ການພົວພັນການທູດສອງຝ່າຍ ແລະ ຫຼາຍຝ່າຍ, ວຽກງານຊາຍແດນແຫ່ງຊາດ, ວຽກງານກົງສຸນ, ວຽກງານພິທີການ, ວຽກງານການຂີດຂຽນເອກະສານທາງການທູດ ແລະ ວິຊາອື່ນໆ. ໃນແຕ່ຕ່ລະວິຊາຂອງການຝຶກອົບຮົມ ແມ່ນໄດ້ເຊື້ອເຊີນເອົານັກວິທະຍາກອນ ຈາກຫຼາຍພາກສ່ວນມາຂຶ້ນຫ້ອງບັນຍາຍເປັນຕົ້ນ: ມະຫາວິທະຍາໄລແຫ່ງຊາດ, ບັນດາທ່ານທູດອາວຸໂສບຳນານ, ກະຊວງພາຍໃນ, ກະຊວງແຜນການ ແລະ ການລົງທຶນ, ຄະນະພົວພັນຕ່າງປະເທດສູນກາງພັກ ແລະ ກົມຕ່າງໆ ພາຍໃນກະຊວງການຕ່າງປະເທດ.
ໃນໂອກາດເຂົ້າຮ່ວມພິທີເປີດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ກໍຍັງໄດ້ໃຫ້ກຽດຂື້ນປາຖະກະຖາ ໃນຫົວຂໍ້ “ ບົດຮຽນການເຄື່ອນໄຫວການທູດ: ການຈັດຕັ້ງປະຕິບັດການທູດປ້ອງກັນເຫດ ແລະ ບຸກທະລຸ ເພື່ອປົກປັກຮັກສາ ແລະ ພັດທະນາປະເທດຊາດ ” ເຊິ່ງທ່ານໄດ້ເນັ້ນໃຫ້ເຫັນຄຸນລັກສະນະຂອງນັກການທູດທີ່ດີຄວນປະກອບດ້ວຍ 6 ມາດຖານ ຕາມແບບຜູ້ນຳຮຸ້ນກ່ອນສ້າງໄວ້ ໂດຍສະເພາະຂອປະທານ ໄກສອນ ພົມວິຫານ ແລະ ປະທານ ສຸພານຸວົງ. ພ້ອມກັນນັ້ນ, ທ່ານກໍໄດ້ຍົກໃຫ້ເຫັນບົດບາດຄວາມສໍາຄັນໃນການເຄື່ອນໄຫວການທູດຂອງ ສປປ ລາວ ໃນແຕ່ລະໄລຍະ ໂດຍສະເພາະການເຄື່ອນໄຫວການທູດປ້ອງກັນເຫດ ເພື່ອບຸກທະລຸໃນການປົກປັກຮັກສາ ແລະ ສາ້ງສາພັດທະນາປະເທດ ທີ່ມີຄວາມສຳຄັນຍິ່ງ ເພື່ອນໍາພາປະເທດກ້າວສູ່ຄວາມສີວິໄລຖາວອນ ຕາມແນວທາງນະໂຍບາຍຂອງພັກ ແລະ ລັດຖະບານ.