ໃນ​ວັນ​ທີ 26 ກຸ​ມພາ - 02 ມີນາ​ 2018 ທີ່ຜ່ານມາ, ກະຊວງ​ການ​ຕ່າງປະ​ເທດ ​ໄດ້​ຈັດ​ຕັ້ງ​ກອງ​ປະຊຸມປຶກສາ​ຫາລື​ຮ່າງ​ກົດໝາຍ​ ວ່າ​ດ້ວຍ ສຳນັກງານ​ຜູ້ຕາງໜ້າ ​ແຫ່ງ ສປປ ລາວ ຢູ່ຕ່າງປະເທດ, ຢູ່ທ່າລາດ, ເມືອງແກ້ວອຸດົມ, ​ແຂວງ​ວຽງ​ຈັນ, ພາຍ​ໃຕ້​ການ​ເປັນ​ປະທານ​ຂອງ ​ທ່ານ ນາງ ຄຳ​ເພົາ ​ເອີນ​ທະ​ວັນ, ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ, ​ໂດຍ​ມີ​ການ​ເຂົ້າ​ຮ່ວມ​ຂອງຄະນະ​ຮັບຜິດຊອບ​ຊີ້ນຳລວມໃນການສ້າງ​ກົດໝາຍ​ດັ່ງກ່າວ, ຜູ້ຕາງໜ້າ​ຈາກສະພາແຫ່ງຊາດ, ກະຊວງການຕ່າງປະເທດ, ຫ້ອງວ່າການສຳນັກງານນາຍົກລັດຖະມົນຕີ, ກະຊວງພາຍໃນ, ຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ຄະນະພົວພັນຕ່າງປະເທດສູນກາງພັກ, ອົງການກວດກາລັດຖະບານ ແລະ ຂະແໜງການອື່ນທີ່ກ່ຽວຂ້ອງ ລວມປະມານ 80 ກວ່າທ່ານ.

    ໃນວັນທີ 27 ກຸມພາ 2018 ທີ່ ເມືອງວັງວຽງ, ແຂວງວຽງຈັນ, ໄດ້ມີການຈັດກອງປະຊຸມສໍາມະນາ ເຜີຍແຜ່ ຜົນການຮ່ວມມືພາກພືື້ນ ແລະ ສາກົນ ຂອງ ສປປ ລາວ ແລະ ເຜີຍແຜ່ຜົນຂອງກອງປະຊຸມປຶກສາຫາລືຂັ້ນສູງວ່າດ້ວຍການຮ່ວມມືສາກົນ “ໜຶ່ງແລວ ໜຶ່ງເສັ້ນທາງ” ຄັ້ງທີ 2, ຊຶ່ງໃຫ້ກຽດເປັນປະທານຮ່ວມໂດຍ ທ່ານ ດາວເຮືອງ ນັນທະວົງ, ຄະນະປະຈຳພັກແຂວງ, ຮອງເຈົ້າແຂວງ ແຂວງວຽງຈັນ ແລະ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ພ້ອມນີ້ຍັງມີຜູ້ເຂົ້າຮ່ວມຈາກບັນດາກະຊວງ/ຂະແໜງການຕ່າງໆ ແລະ ອໍານາດການປົກຄອງທ້ອງຖິ່ນຂອງ 7 ແຂວງ (ແຂວງ ຫຼວງພະບາງ, ໄຊຍະບູລີ, ຫົວພັນ, ຊຽງຂວາງ, ວຽງຈັນ,​ ບໍລິຄໍາໄຊ ແລະ ນະຄອນຫຼວງວຽງຈັນ) ລວມທັງໝົດ 230 ທ່ານ.

ໃນ​ວັນ​ທີ 21-22 ກຸມພາ 2018, ກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ຜົນການ​ເຄື່ອນ​ໄຫວ​ວຽກງານ​ອາຊຽນ ຂອງ ສປປ ລາວ ໃຫ້​ບັນດາ​ແຂວງພາກ​ກາງ ​ແລະ ພາກ​ໃຕ້, ທີ່ ໂຮງ​ແຮມດາວ​ສະຫວັນ, ແຂວງ​ສະຫວັນ​ນະ​ເຂດ, ໂດຍການໃຫ້ກຽດເປັນປະທານຂອງ ທ່ານ ທອງ​ຜ່ານ ສະຫວັນ​ເພັດ, ຮອງລັດຖະມົນຕີກະຊວງ​ການ​ຕ່າງປະ​ເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ​ແລະ ໃຫ້ກຽດ​ກ່າວ​ເປີດກອງ​ປະຊຸມໂດຍ ທ່ານ ປອ. ​​ໂພ​ໄຊ ​ໄຊ​ຍະ​ສອນ, ຮອງ​ເຈົ້າ​ແຂວງ​ສະຫວັນ​ນະ​ເຂດ ແລະ ມີຜູ້​ຕາງຫນ້າຈາກພະແນກການຕ່າງປະເທດ, ພະແນກອຸດສະຫະກຳ ແລະ ການຄ້າ ແລະ ສະພາການຄ້າ​ຂອງ​ບັນດາ​ແຂວງ​ພາກກາງ ​ແລະ ພາກ​ໃຕ້ ​​ເຂົ້າ​ຮ່ວມ​ຫຼາຍ​ກວ່າ 100 ທ່ານ.