ໃນວັນທີ 26 ເມສາ2018 ທີ່ ສິງກະໂປ, ທ່ານ ທອງຜ່ານສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ​ໄດ້​ນຳພາຄະນະຜູ້ແທນລາວ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ເພື່ອກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 32 ພາຍໃຕ້ການເປັນປະທານຂອງ ສິງກະໂປ.

ໃນວັນທີ 28-29 ມີນາ 2018 ທີ່ ຫ້ອງປະຊຸມສະພາປະຊາຊົນ ແຂວງ ຫຼວງພະບາງ, ກະຊວງ​ການ​ຕ່າງປະ​ເທດ ​ໄດ້​ຈັດ​ຕັ້ງ​ກອງ​ປະຊຸມເພື່ອທາບທາມ​ຄຳຄິດເຫັນນໍາ ເຈົ້າໜ້າທີ່ຂັ້ນແຂວງ 08 ແຂວງພາກເໜືອ ຄື: ແຂວງ ຜົ້ງ​ສາລີ, ຫົວພັນ,    ອຸດົມ​ໄຊ, ບໍ່​ແກ້ວ, ຫຼວງ​ນ້ຳ​ທາ, ຊຽງຂວາງ, ​ໄຊ​ຍະ​ບູລີ ແລະ ຫຼວງພະບາງ ຕໍ່ຮ່າງ​ກົດໝາຍ​ວ່າ​ດ້ວຍສຳນັກງານ​ຜູ້ຕາງໜ້າ​ແຫ່ງ ສປປ ລາວ ຢູ່ຕ່າງປະເທດ ພາຍ​ໃຕ້ການ​ເປັນ​ປະທານຮ່ວມຂອງ ​ທ່ານ ນາງ. ຄໍາເພົາ ​ເອີນ​ທະ​ວັນ, ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ ແລະ ທ່ານ ວົງສະຫວັນ ເທບພະຈັນ, ຮອງເຈົ້າແຂວງຫຼວງ​ພະ​ບາງ ໂດຍມີຜູ້ຕາງໜ້າຈາກ ສະພາແຫ່ງຊາດ, ບັນດາທ່ານຮອງປະທານສະພາ​​ປະຊາຊົນຂັ້ນແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງ, ຫົວໜ້າ ແລະ ຮອງຫົວໜ້າພະ ແນກການຕ່າງປະເທດແຂວງ, ຜູ້ຕາງໜ້າຈາກຂະແໜງການທີ່ກ່ຽວຂ້ອງ ເຂົ້າຮ່ວມ.

ທ່ານ ທອງ​ຜ່ານ ສະ​ຫວັນ​ເພັດ, ຮອງ​ລັດ​ຖະ​ມົນ​ຕີກະ​ຊວງ​ການ​ຕ່າງ​ປະ​ເທດ, ທັງ​ເປັນ​ຫົວ​ໜ້າ​ເຈົ້າ​ໜ້າ​ທີ່​ອາ​ວຸ​ໂສອາ​ຊຽນ​ຂອງ ສ​ປ​ປ ລາວ ໄດ້​ນຳ​ພາ​ຄະ​ນະ​ຜູ້​ແທນ​ລາວ​ ເຂົ້າ​ຮ່ວມກອງ​ປະ​ຊຸມ​ເຈົ້າໜ້າທີ່​ອາວຸ​ໂສ​ອາຊຽນ-ອິນ​ເດຍຄັ້ງ​ທີ 20, ​ເຊິ່ງ​ໄດ້​ຈັດ​ຂຶ້ນ​ໃນ​ວັນ​ທີ 5-6 ເມ​ສາ 2018 ທີ່ຮ່າ​ໂນ້ຍ, ຫວຽດນາມ ພາຍ​ໃຕ້​ການ​ເປັນ​ປະ​ທານ​ຮ່ວມຂອງ ທ່ານ Nguyen Quoc Dzung , ຮອງລັດຖະມົນຕີ​ກະ​ຊວງ​ການ​ຕ່າງ​ປະ​ເທດ, ທັງ​ເປັນ​ເຈົ້າ​ໜ້າ​ທີ່​ອາ​ວຸ​ໂສອາ​ຊຽນຂອງຫວຽດນາມ ແລະ ທ່ານ ນາງ Preeti Saran, ​ເລຂາທິການ​ຮັບຜິດຊອບ​ວຽກງານ​ພາກ​ຕາ​ເວັນ​ອອກ​ຂອງ​ກະຊວງ​ການ​ຕ່າງປະ​ເທດ, ທັງ​ເປັນ​ເຈົ້າ​ໜ້າ​ທີ່​ອາ​ວຸ​ໂສອາ​ຊຽນຂອງ​ອິນ​ເດຍ.