ໃນຕອນເຊົ້າຂອງວັນທີ 19 ມັງກອນ 2021, ທີ່ ສະຖານເອກອັກຄະລັດຖະທູດ ແຫ່ງ ສາທາລະນະລັດແຟັງລັງ ປະຈໍາ ຣາຊະອານາຈັກ ຊູແອັດ ທີ່ ນະຄອນຫຼວງສະຕ໋ອກໂຮມ, ທ່ານ ບຸນລຽບ ຮຸ່ງວົງສອນ ໄດ້ຍື່ນສານຕາຕັ້ງໃຫ້ ພະນະທ່ານ Sauli Niinistö, ປະທານາທິບໍດີ ແຫ່ງ ສາທາລະນະລັດ ແຟັງລັງ, ໂດຍມອບສານຜ່ານ ທ່ານ ນາງ Liisa Talonpoika, ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ແຟັງລັງ ປະຈໍາ ຊູແອັດ ທີ່ນະຄອນຫຼວງ ສະຕ໋ອກໂຮມເພື່ອດຳລົງຕຳແໜ່ງເປັນ ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ (ສປປ ລາວ) ປະຈຳ ສາທາລະນະລັດ ແຟັງລັງ ທີ່ມີສຳນັກງານ ສະຖານເອກອັກຄະລັດຖະທູດ ຕັ້ງຢູ່ນະຄອນຫຼວງ ສະຕ໋ອກໂຮມ, ຣາຊະອານາຈັກ ຊູແອັດ.

ໃນຕອນເຊົ້າຂອງວັນທີ 03 ທັນວາ 2020, ທ່ານ ກິ່ງໂພແກ້ວ ພົມມະຫາໄຊ,​ ຫົວຫນ້າກົມເສດຖະກິດ   ທັງເປັນຫົວຫນ້າເຈົ້າຫນ້າທີ່ອາວຸໂສ ຂອບຍຸດທະສາດການຮ່ວມມືດ້ານເສດຖະກິດ ແມ່ນໍ້າອີຣະວະດີ-ແມ່ນໍ້າເຈົ້າພະຍາ-ແມ່ນໍ້າຂອງ ແອັກແມັກ (ACMECS) ຂອງສປປລາວພ້ອມດ້ວຍຄະນະຈາກ ຂະແຫນງການກ່ຽວຂ້ອງ   ໄດ້ເຂົ້າຮ່ວມກອງປະຊຸມ ເຈົ້າໜ້າທີ່ອາວຸໂສ ແອັກແມັກ ໃນຮູບແບບທາງໄກ, ໂດຍການເປັນປະທານຂອງ ທ່ານ Sok Soken, ຜູ້ຊ່ວຍລັດຖະມົນຕີ ກະຊວງການຕ່າງປະເທດ, ຕາງຫນ້າຫົວຫນ້າເຈົ້າຫນ້າທີ່ອາວຸໂສ ACMECS ຂອງກໍາປູເຈຍ ແລະ ໄດ້ມີບັນດາ ທ່ານຫົວຫນ້າເຈົ້າຫນ້າທີ່ອາວຸໂສ ຂອງປະເທດສະມາຊິກ ແອັກແມັກ ເຂົົ້າຮ່ວມກອງປະຊຸມດັ່ງກ່າວ.

ໃນຕອນບ່າຍຂອງວັນທີ 30 ພະຈິກ 2020, ທີ່ສະຖານເອກອັຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ ນະຄອນຫຼວງວໍຊິງຕັນ, ດີຊີ, ສ.ອາເມລິກາ, ທ່ານ ຄຳພັນ ອັ່ນລາວັນ ໄດ້ຍື່ນສານຕາຕັ້ງເພື່ອດຳລົງຕຳແໜ່ງເປັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ການາດາ, ເຊິ່ງມີສຳນັກງານຕັ້ງຢູ່ນະຄອນຫຼວງ ວໍຊິງຕັນ, ດີຊີ, ສ. ອາເມລິກາ.