ວັນທີ 13 ກັນຍາ 2019, ໄດ້ມີພິທີເປີດງານບຸນມະໂຫລານ ອຸຍມານິເຕ ຄັ້ງທີ 84 ຂຶ້ນທີ່ປາຣີ ຊຶ່ງໃນໂອກາດດັ່ງກ່າວ ສະຖານທູດລາວ ທີ່ ປາຣີ ໂດຍການປະສານສົມທົບຂອງສຳພັນຄົນລາວທີ່ປະເທດຝຣັ່ງ ໄດ້ມີການເປີດຮ້ານວາງສະແດງມູນເຊື້ອຂະບວນການປະຕິວັດຕໍ່ສູ້ກູ້ຊາດຂອງປະຊາຊົນລາວ, ໂດຍຜ່ານການໂຄສະນາໃນໜ້າໜັງສືພິມປະຊາຊົນສະບັບທໍາອິດ, ກະບອກສຽງຂອງແນວລາວອິດສະຫຼະ ກໍ່ຄື ສູນກາງພັກປະຊາຊົນປະຕິວັດລາວ ໃນປັດຈຸບັນ. ງານບຸນມະໂຫລານ ອຸຍມານິເຕ ໃນຄັ້ງນີ້ມີການເຂົ້າຮ່ວມຂອງ ທ່ານ ຢົງ ຈັນທະລັງສີ, ເອກອັກຄະລັດຖະທູດ ແຫ່ງ ສປປ ລາວ ປະຈຳ ສ.ຝຣັ່ງ; ທ່ານ ຫງວຽນ ທຽບ, ເອກອັກຄະລັດຖະທູດ ແຫ່ງ ສສ. ຫວຽດນາມ ປະຈຳ ສ.ຝຣັ່ງ; ທ່ານ ເລ ຄາຍ ຮ່ວນ, ຮອງບັນນາທິການໜັງສືພິມເຢິນເຊີນຫວຽດນາມ; ທ່ານ ວາດິມ ກາເມນກາ, ປະທານຄະນະຈັດຕັ້ງບຸນມະໂຫລານ ອຸຍມານິເຕ; ທ່ານ ເດນິສ ໂຣສປີແອ, ກຳມະການກົມການເມືອງສູນກາງພັກຄອມມູນິດຝຣັ່ງ; ທ່ານ ຈູມຄຳ ເລືອງວັນ, ປະທານສໍາພັນຄົນເຊື້ອຊາດລາວທີ່ປະເທດຝຣັ່ງ; ພະນັກງານສະຖານທູດລາວທີ່ປາຣີ ພ້ອມດ້ວຍແຂກທີ່ຖືກເຊີນເຂົ້າຮ່ວມ ຈຳນວນ 100 ກວ່າຄົນ.

ໃນໄລຍະກອງປະຊຸມ ຄັ້ງທີ 9 ຂອງລັດພາຄີຕໍ່ສົນທິສັນຍາເກືອດຫ້າມລະເບີດລູກຫວ່ານຈັດຂຶ້ນ, ແຕ່ວັນທີ 02-04 ກັນຍາ 2019, ທີ່ ນະຄອນເຊີແນວ, ໄດ້ມີການພິຈາລະນາການຂໍອະນຸມັດຕໍ່ໄລຍະເວລາ ການຈັດຕັ້ງປະຕິບັດມາດຕາ 3 ແລະ 4 ວ່າດ້ວຍພັນທະໃນການເກັບກູ້ລະເບີດທີ່ຕົກຄ້າງຈາກປາງສົງຄາມ ສຳລັບບັນດາປະເທດທີ່ບໍ່ສາມາດທໍາລາຍຄັງລະເບີດ ດັ່ງກ່າວ ແລະ ເກັບກູ້ລະເບີດບໍ່ທັນແຕກຕົກຄ້າງ ໃຫ້ຫມົດໄດ້ ພາຍໃນປີ 2020 ຕາມພັນທະທີ່ລະບຸໄວ້ໃນສອງມາດຕາດັ່ງກ່າວຂອງສົນທິສັນຍາ ອອກໄປຕື່ມອີກ 05 ປີ (2020-2025) ເຊິ່ງໃນນີ້ມີ 03 ປະເທດ ທີ່ໄດ້ສະເໜີຂໍຕໍ່ເວລາການທຳລາຍຄັງລະເບີດ ແລະ ເກັບກູ້ ຄື: ບູນກາລີ, ເຢຍລະມັນ ແລະ ສປປ ລາວ. ສໍາລັບກໍລະນີຂອງ ສປປ ລາວ ເຫດຜົນຂອງການຂໍຕໍ່ໄລຍະເວລາການເກັບກູ້ພາຍໃຕ້ມາດຕາ 4 ໃນຄັ້ງນີ້ ກໍແມ່ນຍ້ອນ ສປປ ລາວ ເປັນຫນຶ່ງໃນບັນດາປະເທດທີ່ມີລະເບີດບໍ່ທັນແຕກຕົກຄ້າງຫລາຍກວ່າຫມູ່ໃນໂລກ ເຊິ່ງກວມເອົາເຖິງ 1 ສ່ວນ 3 ຂອງເນື້ອທີ່ທັງຫມົດຂອງປະເທດ ແລະ ມີຈຳນວນຕົກຄ້າງຫລາຍເກີນກວ່າຄວາມສາມາດດ້ານທຶນຮອນ ແລະ ເຕັກໂນໂລຊີ ເພື່ອສາມາດເກັບກູ້ລະເບີດທີ່ມີຢູ່ໃນປະຈຸບັນ ໃຫ້ຫມົດໄດ້ພາຍໃນ 5 ປີ.