ໃນວັນທີ 30 ສິງຫາ 2016, ທີ່ ບາງກອກ, ຣາຊະອານາຈັກໄທ, ທ່ານ ກິ່ງໂພແກ້ວ ພົມມະຫາໄຊ, ອຸປະທູດຊົ່ວຄາວ ແຫ່ງ ສປປ ລາວ ປະຈໍາ ຣາຊະອານາຈັກໄທ ພ້ອມດ້ວຍຄະນະນຳສະຖານທູດ ໄດ້ເຂົ້າອວຍພອນ ທ່ານ ຫງວຽນ ຕັດ ທັນ, ເອກອັກຄະລັດຖະທູດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ປະຈໍາ ຣາຊະອານາຈັກໄທ, ເນື່ອງໃນໂອກາດວັນຊາດ ແຫ່ງ ສສ. ຫວຽດນາມຄົບຮອບ 71 ປີ (2 ກັນຍາ 1945 - 2 ກັນຍາ 2016).
ໃນໂອກາດດັ່ງກ່າວ, ທ່ານ ກິ່ງໂພແກ້ວ ພົມມະຫາໄຊ ໄດ້ສະແດງຄວາມຊົມເຊີຍຜົນສໍາເລັດໃນຫລາຍດ້ານແຫ່ງການພັດທະນາເສດຖະກິດ-ສັງຄົມ ຂອງ ສສ. ຫວຽດນາມ ຕະຫລອດໄລຍະຜ່ານມາ, ຕີລາຄາສູງການພົວພັນແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດ ລາວ-ຫວຽດນາມ; ອວຍພອນໄຊອັນປະເສີດແກ່ຜູ້ນໍາ ພັກ-ລັດ ແລະ ປະຊາຊົນບັນດາເຜົ່າຫວຽດນາມ ເວົ້າລວມ, ເວົ້າສະເພາະແມ່ນ ທ່ານເອກອັກຄະລັດຖະທູດຫວຽດນາມ ພ້ອມດ້ວຍພະນັກງານ ຈົ່ງມີແຕ່ຄວາມສຸກໂຊກດີມີຜົນສໍາເລັດໃໝ່ໃນໜ້າທີ່ວຽກງານ, ນໍາພາປະເທດຫວຽດນາມ ກ້າວສູ່ຄວາມສໍາເລັດໃນທຸກດ້ານ; ອວຍພອນໃຫ້ສາຍພົວພັນແບບພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ຈົ່ງຈະເລີນງອກງາມຍິ່ງໆຂຶ້ນໄປ.
ໃນໂອກາດດຽວກັນ, ທ່ານເອກອັກຄະລັດຖະທູດ ຫງວຽນ ຕັດ ທັນ ກໍ່ໄດ້ກ່າວສະແດງຄວາມດີໃຈ ແລະ ຂອບໃຈຕໍ່ຄຳອວຍພອນໄຊອັນປະເສີດມາຍັງ ທ່ານ ກິ່ງໂພແກ້ວ ພົມມະຫາໄຊ ພ້ອມດ້ວຍຄະນະນໍາສະຖານທູດລາວ ແລະ ຫວັງເປັນຢ່າງຍິ່ງວ່າສາຍພົວພັນມິດຕະພາບອັນຍິ່ງໃຫຍ່ ຫວຽດນາມ-ລາວ ຈະໄດ້ຮັບການເສີມຂະຫຍາຍໃຫ້ແຕກດອກອອກຜົນຈະເລີນງອກງາມເລື້ອຍໆໄປ.
ໃນວັນທີ 26 ສິງຫາ 2016, ທີ່ ໂຮງແຮມອ່າງຄຳ, ນະຄອນຫຼວງວຽງຈັນ ໄດ້ຈັດກອງປະຊຸມແລກປ່ຽນບົດຮຽນ ລະຫວ່າງ ກົມການຂ່າວ, ກະຊວງການຕ່າງປະເທດ ແລະ ເຈົ້າໜ້າທີ ປກສ ເພື່ອຮັບໃຊ້ເຂົ້າໃນກອງປະຊຸມສຸດຍອດອາຊຽນ ຄັ້ງທີ 28 ແລະ 29, ໂດຍການເປັນປະທານຂອງ ທ່ານ ພອນທະວີ ບຸດດາລາ, ຫົວໜາກົມການຂ່າວ,ກະຊວງການຕ່າງປະເທດ, ຫົວໜ້າສູນຂ່າວຕ່າງປະເທດ ໃນອານຸກຳມະການໂຄສະນາ, ວັດທະນາທຳ ແລະ ຂ່າວສານ, ມີຄະນະກົມການຂ່າວ, ບັນດາເຈົ້າໜ້າທີ່ ປກສ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ໃນວັນທີ 23 ສິງຫາ 2016, ທີ່ ນະຄອນຫຼວງວຽງຈັນ, ກົມການຂ່າວ ກະຊວງການຕ່າງປະເທດ ໃນນາມໜ່ວຍງານສູນຂ່າວ ແລະ ຄຸ້ງຄອງສື່ມວນຊົນຕ່າງປະເທດ, ອະນຸກຳມະການໂຄສະນາເຜີຍແຜ່ວັດທະນະທຳ ແລະ ຂ່າວສານ, ກອງປະຊຸມສຸດຍອດອາຊຽນ ຄັ້ງທີ 28 ແລະ 29 ໄດ້ຈັດຊຸດຝຶກອົບຮົມ ຫົວຂໍ້ ວຽກງານການຄຸ້ມຄອງສື່ມວນຊົນຕ່າງປະເທດ ໃຫ້ແກ່ພະນັກງານປະສານງານດ້ານການຂ່າວ ໂດຍການເປັນປະທານຂອງ ທ່ານ ພອນທະວີ ບຸດດາລາ, ຫົວໜ້າກົມການຂ່າວ ກະຊວງການຕ່າງປະເທດ, ຫົວໜ້າສູນຂ່າວຕ່າງປະເທດ; ມີບັນດາທ່ານຄະນະກົມການຂ່າວ, ຄະນະພະແນກກົມການຂ່າວ, ພະນັກງານຈາກກະຊວງການຕ່າງປະເທດ ແລະ ນັກສຶກສາຈາກມະຫາວິທະຍາໄລແຫ່ງຊາດເຂົ້າຮ່ວມ 120 ກວ່າທ່ານ.
ໃນກອງປະຊຸມ, ທ່ານ ພອນທະວີ ບຸດດາລາ ໄດ້ເນັ້ນໃຫ້ຜູ້ເຂົ້າຮ່ວມຝຶກອົບຮົມ ໄດ້ຮັບຮູ້ ເຂົ້າໃຈ ເຖິງຄວາມໝາຍຄວາມສຳຄັນຂອງກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະຊຸມທີ່ກ່ຽວຂອງອື່ນໆ ທີ່ ສປປ ລາວ ຈະເປັນເຈົ້າພາບໃນ ວັນທີ 6-8 ກັນຍາ 2016 ນີ້, ຄວາມໝາຍຄວາມສໍາຄັນຂອງວຽກງານດ້ານການຂ່າວ, ການແນະນຳ, ການຄຸ້ມຄອງ ແລະ ອຳນວຍຄວາມສະດວກດ້ານຕ່າງໆໃຫ້ແກ່ນັກຂ່າວຕ່າງປະເທດທີ່ຈະມາເກັບກຳຂ່າວໃນກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະຊຸມທີ່ກ່ຽວຂ້ອງອື່ນໆ ໃນລະຫວ່າງວັນທີ 6-8 ກັນຍາ 2016. ຫຼັງຈາກນັ້ນ, ຄະນະພະແນກຈາກກົມການຂ່າວ ກໍ່ໄດ້ພັດປ່ຽນກັນຂຶ້ນບັນຍາຍ ໃນຫົວຂໍ້ຕ່າງໆ ຄື: ວຽກງານບໍລິຫານສູນຂ່າວຕ່າງປະເທດ, ວຽກງານຂໍ້ມູນຂ່າວສານ ແລະ ປະຊາສຳພັນ, ວຽກງານພາຫະນະ ແລະ ໂຮງແຮມ ແລະ ວຽກງານຄຸ້ມຄອງສື່ມວນຊົນຕ່າງປະເທດ. ແລະ ໃນຕອນບ່າຍກໍໄດ້ລົງທັດສະນະສຶກສາເບິ່ງສະຖານທີ່ສູນຂ່າວຕ່າງປະເທດ ICTC ແລະ ຫໍປະຊຸມແຫ່ງຊາດ NCC.