ໃນຕອນເຊົ້າຂອງວັນທີ 20 ພຶດສະພາ 2022 ທີ່ ນະຄອນຫຼວງວຽງຈັນ, ກົມອົງການຈັດຕັ້ງສາກົນ, ກະຊວງການຕ່າງປະເທດ ຮ່ວມກັບ ຫ້ອງການຜູ້ປະສານງານ ອົງການ ສປຊ ປະຈໍາ ສປປ ລາວ ໄດ້ຈັດ ກອງປະຊຸມວິຊາການຂອງ ຄະນະກໍາມະການຊີ້ນໍາຮ່ວມການຈັດຕັ້ງປະຕິບັັດຂອບການຮ່ວມມືເພື່ອການພັດທະນາແບບຍືນຍົງ ລະຫວ່າງ ລັດຖະບານ ແຫ່ງ ສປປ ລາວ ແລະ ອົງການ ສະຫະປະຊາຊາດ ຄັ້ງທີ 1 (The First Technical Meeting of the Joint Steering Committee of the Lao PDR – UN Sustainable Development Cooperation Framework 2022-2026) ຫຼື ເອີ້ນວ່າ UNSDCF”, ພາຍໃຕ້ການເປັນປະທານໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ຮ່ວມກັບ ທ່ານ ນາງ ຊາຣາ ເຊເກັນເນສ, ຜູ້ປະສານງານ ອົງການ ສປຊ ປະຈໍາ ສປປ ລາວ, ໂດຍມີຜູ້ຕາງໜ້າຈາກບັນດາກະຊວງ ແລະ ອົງການທຽບເທົ່າກະຊວງທີ່ກ່ຽວຂ້ອງ ແລະ ບັນດາອົງການເຄືອຂ່າຍ ສປຊ ເຂົ້າຮ່ວມຫຼາຍກ່ວາ 40 ທ່ານ.
ວັນທີ 19 ພຶດສະພາ 2022, ທີ່ ສູນ ICTC, ສະຖາບັນການຕ່າງປະເທດ ແລະ ສະຖານທູດ ສປປ ເກົາຫລີ ໄດ້ເປັນເຈົ້າພາບຮ່ວມກັນຈັດປາຖະກະຖາ ເນື່ອງໃນໂອກາດຄົບຮອບ 30 ປີ ຂອງການພົບປະ ລະຫວ່າງ ພະນະທ່ານ ໄກສອນ ພົມວິຫານ, ອະດີດເລຂາທິການໃຫຍ່ພັກປະຊາຊົນປະຕິວັດລາວ ແລະ ພະນະທ່ານ ກິມ ອິນ ເຊິງ ແລະ ພະນະທ່ານ ກິມ ເຈິງ ອິນ, ຜູ້ນຳສູງສຸດ ຂອງ ສປປ ເກົາຫຼີ (1992-2022). ໃຫ້ກຽດເປັນປະທານກ່າວເປີດ ໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ໃຫ້ກຽດ ບັນຍາຍ ໂດຍ ທ່ານ ລີ ຢົງ ຊົນ, ເອກອັກຄະລັດຖະທູດ ສປປ ເກົາຫລີ ປະຈຳ ສປປ ລາວ
ໃນວັນທີ 13 ພຶດສະພາ 2022 ທີ່ ກະຊວງການຕ່າງປະເທດ, ທ່ານ ຕິ່ງ ສຸກສັນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າການຢ້ຽມຂໍ່ານັບຂອງ ທ່ານ ນາງ ມາຣຽມ ເຊີແມນ (Ms. Mariam Sherman), ຜູ້ອຳນວນຍການທະນາຄານໂລກ (WB) ສຳລັບ ມຽນມາ, ກຳປູເຈຍ ແລະ ສປປ ລາວ ພ້ອມດ້ວຍຄະນະ ເນື່ອງໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.