ໃນຕອນເຊົ້າຂອງວັນທີ 31 ສິງຫາ 2016, ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດແຫ່ງ ສປປ ລາວ ໄດ້ເຂົ້າຮ່ວມພິທີເຊັນປື້ມໄຫວ້ອາໄລແກ່ດວງວິນຍານຂອງ ທ່ານ ວານເຕີ້ ແຊວ, ອະດີດປະທານາທິບໍດີ ແຫ່ງ ສາທາລະນະລັດ ສະຫະພັນ ເຢຍລະມັນ (1974-1979) ທີ່ເຖິງແກ່ມໍລະນະກຳ ໃນວັນທີ 24 ສິງຫາ 2016, ທີ່ ສະຖານທູດ ເຢຍລະມັນ ທີ່ ນະຄອນຫຼວງວຽງຈັນ.
ໃນຕອນບ່າຍ ຂອງ ວັນທີ 24 ສິງຫາ 2016, ພະນະທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍຄະນະ ໄດ້ຕາງໜ້າລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເຂົ້າຮ່ວມພິທີ ແລະ ລົງນາມ ປຶ້ມໄວ້ອາໄລ ແກ່ ພະນະທ່ານ ເອສ ອາ ນາທານ (S.R Nathan), ອາດີດປະທານາທິບໍດີ ແຫ່ງ ສາທາລະນະລັດ ສິງກະໂປ. ພິທີເຊັນປື້ມໄຫ້ວອາໄລ ໄດ້ຈັດຂື້ນ ຢູ່ ສະຖານເອກອັກຄະລັດຖະທູດ ແຫ່ງ ສ. ສິງກະໂປ ທີ່ ນະຄອນຫຼວງວຽງຈັນ.
ພະນະທ່ານ ເອສ ອາ ນາທານ ເກີດເມື່ອວັນທີ 3 ກໍລະກົດ 1924, ເປັນລັດຖະບູລຸດ ທີ່ແສນເຄົາລົບຮັກ ຂອງ ປະຊາຊົນສິງກະໂປ, ຊຶ່ງເຄີຍດຳລົງຕຳແໜ່ງເປັນປະທານາທິບໍດີຄົນທີ 6 ຂອງສິງກະໂປ ທີ່ດຳລົງຕຳແໜ່ງດົນທີ່ສຸດ ແຕ່ປີ 1999 ຫາປີ 2011. ນອກນັ້ນ, ຍັງເຄີຍດຳລົງຕຳແໜ່ງ ເປັນຂ້າຫຼວງໃຫ່ຍ ຂອງສິງກະໂປ ປະຈຳປະເທດມາເລເຊຍ, ເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ. ສິງກະໂປ ປະຈຳ ສະຫະລັດອາເມລິກາ ແລະ ຕຳແໜ່ງອື່ນໆ ທີ່ສຳຄັນ ຂອງປະເທດ. ຕະຫຼອດໄລຍະການປະຕິບັດໜ້າທີ່ອັນມີກຽດ, ທ່ານ ໄດ້ປະກອບສ່ວນຢ່າງໃຫ່ຍຫຼວງ ໃນການພັດທະນາປະເທດສິງກະໂປ ໃຫ້ມີຄວາມຈະເລີນຮຸ່ງເຮືອງ ແລະ ສົ່ງເສີມຊີວິດການເປັນຢູ່ ຂອງປະຊາຊົນສິງກະໂປ ໃຫ້ດີຂື້ນ. ນອກນັ້ນ, ທ່ານ ຍັງໄດ້ອຸທິດເຫື່ອແຮງ ໃນການລະດົມທຶນຈາກແຫຼ່ງຕ່າງໆ ເພື່ອນຳໃຊ້ເຂົ້າໃນວຽກງານການກຸສົນ ເພື່ອຊ່ວຍເຫຼືອສັງຄົມ ໃຫ້ດີຂື້ນ ແລະ ໄດ້ປະກອບສ່ວນອັນສຳຄັນ ເຂົ້າໃນການສົ່ງເສີມ ແລະ ຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສ. ສິງກະໂປ.