ໃນວັນທີ 04 ກໍລະກົດ 2016, ທີ່ ກະຊວງການຕ່າງປະເທດ, ໄດ້ມີພິທີລົງນາມເອກະສານແລກປ່ຽນໂຄງການຊ່ວຍເຫລືອລ້າ ຈາກລັດຖະບານຍີ່ປຸ່ນ ໃຫ້ແກ່ ສປປ ລາວ ຈຳນວນ 01 ໂຄງການຄື: ໂຄງການພັດທະນາຊັບພະຍາກອນມະນຸດ (Human Resource Development Scholarship Project), ມູນຄ່າ 308.000.000 ເຢັນ.ຕາງໜ້າລັດຖະບານ ແຫ່ງ ສປປ ລາວ ຮ່ວມລົງນາມເອກະສານແລກປ່ຽນດັ່ງກ່າວ ແມ່ນ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແລະ ຕາງໜ້າລັດຖະບານຍີ່ປຸ່ນ ແມ່ນ ທ່ານ ຕາເກຊິ ຮິກິຮາຣາ (Takeshi HIKIHARA), ເອກອັກຄະລັດຖະທູດຍີ່ປຸ່ນ ປະຈໍາ ສປປ ລາວ, ໂດຍມີ ຄະນະກົມ ແລະ ພະນັກງານ ຈາກບັນດາກະຊວງທີ່ກ່ຽວຂ້ອງ ຂອງ ສປປ ລາວ ແລະ ສະຖານທູດຍີ່ປຸ່ນ ເຂົ້າຮ່ວມເປັນສັກຂີພິຍານ.
ໃນວັນທີ 30 ມິຖຸນາ 2016, ໄດ້ມີພິທີເປີດສະຖານກົງສຸນໃຫຍ່ ແຫ່ງ ສປປ ລາວ ທີ່ ແຂວງຊຽງແຕງ, ຣາຊະອານາຈັກ ກຳປູເຈຍ ໂດຍໃຫ້ກຽດເປັນປະທານຮ່ວມຂອງ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ລອງ ວິຊາໂລ, ຮອງລັດຖະມົນຕີກະຊວງການຕ່າງປະເທດ ແລະ ການຮ່ວມມື ແຫ່ງ ຣາຊະອານາຈັກ ກຳປູເຈຍ, ເຊິ່ງມີບັນດາເຈົ້າແຂວງ ຂອງບັນດາແຂວງໃກ້ຄຽງຂອງລາວ ແລະ ກຳປູເຈຍ, ເອກອັກຄະລັດຖະທູດ ລາວ ແລະ ກຳປູເຈຍ, ພ້ອມດ້ວຍແຂກຖືກເຊີນຈຳນວນໜຶ່ງ ເຂົ້າຮ່ວມ.
ໃນຕອນບ່າຍຂອງວັນທີ 29 ມິຖຸນາ 2016, ທີ່ ສູນຝຶກອົບຮົມ ແລະ ຮ່ວມມືສາກົນ (ICTC), ໄດ້ມີການຈັດພິທີ ມອບ-ຮັບ ສູນ ICTC ຄືນ ພາຍຫລັງໄດ້ມີການສ້ອມແປງຄືນໃຫມ່ ແລະ ລົດຊ່ວຍເຫລືອຈາກ ລັດຖະບານຍີ່ປຸ່ນ. ໃນພິທີດັ່ງກ່າວນີ້, ມອບໂດຍ ທ່ານ ເອກອັກຄະລັດຖະທູດຜູ້ມີອຳນາດເຕັມ ແຫ່ງ ຍີ່ປຸ່ນ ປະຈຳ ສປປ ລາວ ແລະ ກ່າວຮັບໂດຍ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍບັນດາຫົວໜ້າກົມພາຍໃນກະຊວງການຕ່າງປະເທດ, ຫົວຫນ້າອົງການໄຈກາ ປະຈຳລາວ ລວມເຖິງບັນດາແຂກຈາກກະຊວງທີ່ກ່ຽວຂ້ອງ, ພະນັກງານສະຖານ ທູດຍີ່ປຸ່ນ ແລະ ພະນັກງານອົງການໄຈກາຈຳນວນໜຶ່ງເຂົ້າຮ່ວມ.