ໃນຕອນເຊົ້າຂອງວັນທີ 06 ພຶດສະພາ 20016, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການ ຕ່າງປະເທດ ແຫ່ງ ສປປ ລາວ ໄດ້ໃຫ້ການຕ້ອນຮັບການເຂົ້າຢ້ຽມຄຳນັບຂອງ ທ່ານ ຢູໂກ ແອສຕູໂທ (Ugo Astuto), ຫົວຫນ້າກົມອາຊີ-ປາຊີຟິກ ປະຈຳຫ້ອງການພົວພັນຕ່າງປະເທດ ຂອງສະຫະພາບເອິຣົບ, ຫົວຫນ້າຄະນະຜູ້ແທນສະຫະພາບເອິຣົບ ແລະ ຄະນະ, ເນື່ອງໃນໂອກາດທີ່ມາຮ່ວມ ກອງປະຊຸມເຈົ້າຫນ້າທີ່ອາວຸໂສກະກຽມ ໃຫ້ແກ່ເວທີປຶກສາຫາລືດ້ານຄວາມຫມັ້ນຄົງຂອງອາຊຽນ (ARF SOM), ທີ່ ຫລວງພະບາງ, ສປປ ລາວ.

ໃນວັນທີ 6 ພຶດສະພາ 2016, ສປປ ລາວ ໃນນາມປະທານອາຊຽນ ໄດ້ເປັນເຈົ້າພາບ ແລະ ປະທານກອງປະຊຸມເຈົ້າໜ້າທີ່ອາວຸໂສອາຊຽນ, ທີ່ ໂຮງແຮມ ຫຼວງພະບາງວິວ, ແຂວງ ຫຼວງພະບາງ ພາຍໃຕ້ການເປັນປະທານຂອງ ທ່ານ ອາລຸນແກ້ວ ກິດຕິຄຸນ, ລັດຖະມົນຕີ ປະຈຳ ສຳນັກງານ​ນາຍົກລັດຖະມົນຕີ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ແລະ ມີຄະນະຜູ້ແທນຈາກ 10 ປະເທດສະມາຊິກອາຊຽນ ແລະ ຜູ້ຕາງໜ້າຈາກ ກອງເລຂາອາຊຽນ ເຂົ້າຮ່ວມ.

ໃນລະຫວ່າງວັນທີ 26 ຫາ 28 ເມສາ 2016, ທີ່​ ເມືອງອານຸວົງ, ແຂວງໄຊສົມບູນ, ຄະນະວິຊາການ ຊຶ່ງປະກອບດ້ວຍບັນດາຄະນະກົມ ແລະ ຄະນະພະແນກ ຂອງກະຊວງ​ການ​ຕ່າງປະ​ເທດ, ນຳໂດຍ ທ່ານ ແສງ​ເພັດ​ ຮຸ່ງ​ບຸນ​ຍວງ, ຮອງເລຂາຄະນະພັກກະຊວງການຕ່າງປະເທດ, ຮອງ​ລັດຖະມົນຕີກະຊວງ​ການ​ຕ່າງປະ​ເທດ, ໄດ້ຈັດ​ກອງ​ປະຊຸມ​ເຜີ​ຍ​ແຜ່​ວຽກ​ງານ​ການ​ຕ່າງປະ​ເທດ ​ໃຫ້​​ພະນັກງານ​ແຂວງໄຊສົມບູນ ຕາມການສະເໜີຂອງແຂວງດັ່ງກ່າວ. ໃຫ້ກຽດກ່າວຄຳເຫັນຕໍ່ພິທີເປີດກອງປະຊຸມໂດຍ​ ທ່ານ ລາວປາວຊົ່ງ ນະວົງໄຊ, ກໍາມະການສໍາຮອງສູນກາງພັກ, ຮອງເລຂາຄະນະພັກແຂວງ, ຮອງ​ເຈົ້າ​ແຂວງ​ໄຊສົມບູນ ແລະ ທ່ານ ແສງເພັດ ຮຸ່ງບຸນຍວງ, ​ຮອງເລຂາຄະນະພັກກະຊວງການຕ່າງປະເທດ, ຮອງລັດຖະມົນຕີກະຊວງການຕ່າງປະເທດ, ມີບັນດາຄະນະພັກເມືອງ, ເຈົ້າເມືອງ, ຮອງເຈົ້າເມືອງ, ພະນັກງານ​ຈາກ​ຫ້ອງ​ວ່າການ​ປົກຄອງ​ແຂວງ ​​ແລະ ພະນັກງານຂອງພະ​ແນ​ກການ​ຕ່າງໆອ້ອມຂ້າງແຂວງໄຊສົມບູນ ເຂົ້າ​ຮ່ວມປະມານ 120 ທ່ານ.