​ວັນທີ 26 ພຶດສະພາ 2016, ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີ ກະຊວງການຕ່າງປະເທດ ໄດ້ນຳພາຄະນະຜູ່ແທນ ຈາກບັນດາກະຊວງຕ່າງໆ ຂອງ ສປປ ລາວ ໂດຍປະກອບມີ ກະຊວງໂຍທາທິການ ແລະ ຂົນສົ່ງ, ຄະນະກຳມະການແຫ່ງຊາດລາວ ເພື່ອຄຸ້ມຄອງເຂດເສດຖະກິດພິເສດ ແລະ ເຂດເສດຖະກິດສະເພາະ, ແຂວງ ຫຼວງພະບາງ ແລະ ກົງສຸນໃຫຍ່ລາວ ທີ່ ໜານໜິງ ເຂົ້າຮ່ວມກອງປະຊຸມເວທີປຶກສາຫາລືການຮ່ວມມືເສດຖະກິດ ອ່າວ ພານ-ເປີຍປູ ຄັ້ງທີ 9 ທີ່ ແຂວງ ກວາງຊີ, ນະຄອນ ໜານໜິງ, ສປ ຈີນ.

ໃນວັນ​ທີ 23 ພຶດສະພາ 2016, ທີ່ ກະຊວງ​ການ​ຕ່າງປະ​ເທດ, ທ່ານ ສະ​ເຫຼີມ​ໄຊ ກົມມະ​ສິດ, ລັດຖະມົນຕີກະຊວງ​ການ​ຕ່າງປະ​ເທດ ​​ແຫ່ງ ສປປ ລາວ ໄດ້​ຕ້ອນຮັບ​ການ​ເຂົ້າ​ຢ້ຽມຂໍ່ານັບ​ຂອງ​ທ່ານ Hiroyuki Kishino,​​ ​ເອກ​ອັກຄະ​ລັດຖະທູດ​ວິສາມັນ​ຜູ້​ມີ​ອຳນາດ​ເຕັມ ​ແຫ່ງ ຍີ່ປຸ່ນ ປະຈຳ ສປປ ລາວ, ​ເນື່ອງ​ໃນ​ໂອກາດ​ທີ່ ທ່ານ​ ສະ​ເຫຼີມ​ໄຊ ກົມມະ​ສິດ ໄດ້​ຮັບ​ການ​ແຕ່ງ​ຕັ້ງ​ເປັນ​ລັດຖະມົນຕີ​ຕ່າງປະ​ເທດ​ ​ແຫ່ງ ສປປ ລາວ ຄົນ​ໃໝ່. ​ໃນ​ໂອກາດ​ດັ່ງກ່າວ, ທ່ານທູດກໍ່ໄດ້ສະແດງຄວາມຊົມເຊີຍ ແລະ ອວຍພອນໃຫ້ທ່ານລັດຖະມົນຕີຕ່າງປະເທດ ຈົ່ງໄດ້ຮັບຜົນສຳເລັດໃນການປະຕິບັດໜ້າທີ່ຂອງ​ຕົນ, ຊົມເຊີຍ ແລະ ຕີລາຄາສູງຕໍ່ໝາກຜົນສຳເລັດ ແຫ່ງການສ້າງສາພັດທະນາປະເທດຊາດ ແລະ ການເຕີບໃຫຍ່ຂະຫຍາຍຕົວຂອງວຽກງານການທູດລາວ, ຍິນດີໃຫ້ການສະໜັບສະໜູນ ສປປ ລາວໃນການເປັນປະທານອາຊຽນ, ສະ​ແດງ​ຄວາມ​ພໍ​ໃຈ​ຕໍ່ການ​ພົວພັນ​ຮ່ວມ​ມື​ທີ່ມີໝາກຜົນ​ອັນ​ດີ ລະຫວ່າງ ​ລາວ-ຍີ່ປຸ່ນ ແລະ ຈະສືບຕໍ່ພົວພັນຮ່ວມມືກັບ ສປປ ລາວ ​ເພື່ອເສີມຂະຫຍາຍສາຍພົວພັນແບບ​ຄູ່​ຮ່ວມ​ມື​ຍຸດ​ທະ​ສາດ ລະຫວ່າງ ລາວ ​ແລະ ຍີ່ປຸ່ນ.

ໃນຕອນເຊົ້າຂອງວັນທີ 23 ພຶດສະພາ 2016, ທີ່ ກະຊວງການຕ່າງປະເທດ ໄດ້ຈັດບັ້ນເຊື່ອມຊຶມມະຕິກອງປະຊຸມໃຫຍ່ ຄັ້ງທີ X ຂອງພັກ ຊຸດທີ I ໃຫ້ແກ່ບັນດາພະນັກງານຫຼັກແຫຼ່ງ-ນຳພາຄຸ້ມຄອງຂອງກະຊວງການຕ່າງປະເທດຂຶ້ນ, ໂດຍການໃຫ້ກຽດເຂົ້າຮ່ວມເປັນປະທານ ແລະ ເຜີຍແຜ່ຂອງ ສະຫາຍ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການຕ່າງປະເທດ; ມີບັນດາຮອງຫົວໜ້າກົມ, ຄະນະພະແນກ, ປະທານ ແລະ ຮອງປະທານ 3 ອົງການຈັດຕັ້ງມະຫາຊົນ ຂອງກະຊວງການຕ່າງປະເທດ ເຂົ້າຮ່ວມຈຳນວນ 228 ສະຫາຍ, ບັ້ນເຊື່ອມຊຶມດັ່ງກ່າວຈະໄດ້ດຳເນີນໄປເປັນເວລາ 3 ວັນ, ເລີ່ມແຕ່ວັນທີ 23-25 ພຶດສະພາ 2016.