ໂດຍຕອບສະໜອງຕາມຄຳເຊື້ອເຊີນຂອງ ພັກກອມມູນິດຝຣັ່ງ, ຄະນະຜູ້ແທນພັກ ປະຊາຊົນ ປະຕິວັດລາວ ນຳໂດຍ ສະຫາຍ ສົມພອນ ສີຈະເລີນ, ຮອງຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ໄດ້ເຂົ້າຮ່ວມກອງປະຊຸມໃຫຍ່ ຄັ້ງທີ 37 ຂອງພັກກອມມູນິດຝຣັ່ງ, ຊຶ່ງໄດ້ຈັດຂຶ້ນແຕ່ວັນທີ 2-5 ມິຖຸນາ 2016, ທີ່ ນະຄອນຫຼວງປາຣີ, ສາທາລະນະລັດ ຝຣັ່ງ.
ກອງປະຊຸມໃຫຍ່ ຄັ້ງທີ 37 ຂອງພັກກອມມູນິດຝຣັ່ງ ເປັນເຫດການການເມືອງທີ່ມີຄວາມໝາຍສຳຄັນໃນຊີວິດການເມືອງຂອງພັກກອມມູນິດ ແລະ ຊາວຜູ້ອອກແຮງງານຝຣັ່ງ, ກອງປະຊຸມໃຫຍ່ໄດ້ໄຂຂຶ້ນໃນທ່າມກາງສະພາບແວດລ້ອມສາກົນ ແລະ ພາກພື້ນທີ່ຜັນແປໄປຢ່າງສັບສົນ. ກອງປະຊຸມໃຫຍ່ ໄດ້ສະຫຼຸບຕີລາຄາການຜັນແປຂອງສະພາບການສາກົນ ແລະ ພາຍໃນປະເທດ, ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 36 ຂອງພັກວາງອອກ, ຄົ້ນຄວ້າ ແລະ ຮັບຮອງເອົາມະຕິກອງປະຊຸມໃຫຍ່ ຄັ້ງທີ 37 ເປັນຕົ້ນແມ່ນການກຳນົດທິດທາງໃນການສືບຕໍ່ເພີ່ມທະວີປັບປຸງບົດບາດການນຳພາ ແລະ ການຈັດຕັ້ງຂອງພັກໃຫ້ໜັກແໜ້ນເຂັ້ມແຂງ, ພ້ອມກຳນົດເປົ້າໝາຍສູ້ຊົນແນໃສ່ສ້າງສັງຄົມຝຣັ່ງ ເພື່ອສ່ວນລວມ, ເພີ່ມການພົວພັນຮ່ວມມືກັບພັກຝ່າຍ ແລະ ກຳລັງທີ່ກ້າວໜ້າໃນໂລກ. ກອງປະຊຸມໃຫຍ່ ໄດ້ເລືອກຕັ້ງຄະນະບໍລິຫານງານສູນກາງພັກສະໄໝທີ 37.
ໂດຍຕອບສະໜອງຕາມການເຊື້ອເຊີນ ຂອງ ສູນກາງພັກກອມມູນິດຍີ່ປຸ່ນ, ຄະນະຜູ້ແທນ ພັກປະຊາຊົນ ປະຕິວັດລາວ ນຳໂດຍ ສະຫາຍ ປອ ນາງ ສູນທອນ ໄຊຍະຈັກ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ພ້ອມດ້ວຍຄະນະ ໄດ້ໄປຢ້ຽມຢາມ ແລະ ເຮັດວຽກກັບ ພັກກອມມູນິດຍີ່ປຸ່ນ ແຕ່ວັນທີ 01-04 ມິຖຸນາ 2016.
ຄະນະຜູ້ແທນລາວ ນຳໂດຍ ທ່ານ ປອ.ຄຳລຽນ ພົນເສນາ, ຮອງລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍຄະນະຈາກສະພາແຫ່ງຊາດ, ກະຊວງການຕ່າງປະເທດ ແລະ ກະຊວງແຜນການ ແລະ ການລົງທຶນ ໄດ້ສຳເລັດການເຂົ້າຮ່ວມ ກອງປະຊຸມທົບທວນຄືນກາງສະໄຫມ ການຈັດຕັ້ງປະຕິບັດແຜນດຳເນີນງານ ອິດສະຕັນບູນ (Istanbul Programme of Action - IPoA) ແຕ່ປີ 2011 ເຖິງປີ 2020 ສຳລັບປະເທດດ້ອຍພັດທະນາ, ຊຶ່ງໄດ້ຈັດຂຶ້ນແຕ່ວັນທີ 27-29 ພຶດສະພາ 2016, ທີ່ ເມືອງອານຕາເລຍ, ປະເທດຕວັກກີ. ກອງປະຊຸມດັ່ງກ່າວຖືກຈັດຂຶ້ນຮ່ວມກັນ ໂດຍລັດຖະບານຕວັກກີ ແລະ ອົງການສະຫະປະຊາຊາດ ພາຍໃຕ້ຫົວຂໍ້ ''ການເປັນຄູ່ຮ່ວມມືເພື່ອສ້າງການປ່ຽນແປງດ້ານການພັດທະນາຢ່າງຕັ້ງຫນ້າຢູ່ປະເທດດ້ອຍພັດທະນາ'' ໂດຍການເປັນປະທານ ຂອງ ພະນະທ່ານ ເມບລຸດ ຊາວວຸສໂອກໂລ (MevlütÇavuşoğlu), ລັດຖະມົນຕີກະຊວງການຕ່າງປະເທດ ຂອງປະເທດຕວັກກີ ແລະ ມີຜູ້ແທນຂັ້ນສູງ ຈາກລັດຖະບານຂອງປະເທດສະມາຊິກ ແລະ ຜູ້ຕາງຫນ້າທີ່ກ່ຽວຂ້ອງຈາກສະພາ, ອົງການຈັດຕັ້ງພາກພື້ນແລະສາກົນ, ສັງຄົມພົນລະເຮືອນ, ພາກເອກະຊົນ, ມູນນິທິ, ສະຖາບັນຄົ້ນຄວ້າແລະສື່ມວນຊົນ ເຂົ້າຮ່ວມ 2 ພັນກວ່າຄົນ.