ໃນວັນທີ 20 ທັນວາ 2018 ກະຊວງການຕ່າງປະເທດ ໄດ້ຈັດກອງປະຊຸມສໍາມະນາ ກ່ຽວກັບ ວັນສາກົນຢຸດຕິການໃຊ້ຄວາມຮຸນແຮງຕໍ່ແມ່ຍິງ 25 ພະຈິກ 2018 ພາຍໃຕ້ຫົວຂໍ້ '' ຮັບຟັງຂ້ອຍແດ່ '' ເຊີ່ງກອງປະຊຸມດັ່ງກ່າວໄດ້ຈັດຂື້ນ ທີ່ ທ່າລາດ ແຂວງ ວຽງຈັນ, ໂດຍການເປັນປະທານຂອງ ທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີ ກະຊວງການຕ່າງປະເທດ. ມີຄະນະກົມ, ຄະນະພະແນກ ແລະ ວິຊາການ ເຂົ້າຮ່ວມ.
ຄະນະຜູ້ແທນລາວ ນຳພາໂດຍ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແລະຄະນະໄດ້ສຳເລັດການເຂົ້າຮ່ວມກອງປະຊຸມ ສປຊ ເພື່ອຮັບຮອງເອົາເອກະສານຄຳໝັ້ນສັນຍາສາກົນ ວ່າດ້ວຍ ການເຄື່ອນ ຍ້າຍຖິ່ນຖານ ຢ່າງປອດໄພ, ເປັນລະບຽບ ແລະ ປົກກະຕິ ທີ່ໄດ້ຈັດຂຶ້ນ ໃນວັນທີ 10-11 ທັນວາ 2018 ທີ່ເມືອງ ມາຣາເກດສ, ຣາຊະອານາຈັກມາຣົກ, ພາຍໃຕ້ການເປັນປະທານຂອງລັດຖະມົນຕີກະຊວງຕ່າງປະເທດ ແລະ ການຮ່ວມມືສາກົນມາຣົກ ໂດຍມີປະມຸກລັດ, ຫົວໜ້າລັດຖະບານ ແລະ ຄະນະຜູ້ແທນຂັ້ນສູງຈາກປະເທດສະມາຊິກ ສປຊ ເຂົ້າຮ່ວມ 160 ກວ່າປະເທດ ແລະ ມີປະທານສະມັດຊາໃຫຍ່ ສປຊ ສະໄໝທີ 73, ເລຂາທິການໃຫຍ່ ສປຊ, ຫົວໜ້າ ແລະ ຜູ້ຕາງໜ້າອົງການເຄືອຂ່າຍ ສປຊ ແລະ ອົງການຈັດຕັ້ງສາກົນອື່ນໆເຂົ້າຮ່ວມຢ່າງຫຼວງຫຼາຍ.
ໃນວັນທີ 12 ທັນວາ 2018, ທີ່ ກະຊວງການຕ່າງປະເທດ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ໄດ້ຕາງໜ້າລັດຖະບານ ແລະ ປະຊາຊົນລາວ ປະດັບ ຫຼຽນກາມິດຕະພາບ ໃຫ້ແກ່ ທ່ານ ໂກລດ ຊັງແຊງ, ອາດີດອຸປະທູດຊົ່ວຄາວ ແຫ່ງ ລາຊະອານາຈັກ ລຸກຊຳບວກ ປະຈຳ ສປປ ລາວ ເພື່ອສະແດງຄວາມຍ້ອງຍໍຊົມເຊີຍຜົນງານອັນດີເດັ່ນ ຂອງ ທ່ານອຸປະທູດຊົ່ວຄາວ ໃນໄລຍະການປະຕິບັດໜ້າທີ່ການທູດ ຢູ່ ສປປ ລາວ, ໂດຍສະເພາະແມ່ນການປະຕິບັດບົດບາດອັນສຳຄັນໃນການປະສານງານ ແລະ ຈັດຕັ້ງປະຕິບັດແຜນການຮ່ວມມື ລາວ-ລຸກຊຳບວກ ຢ່າງມີປະສິດທິຜົນ ເຮັດໃຫ້ການຊ່ວຍເຫຼືອຂອງລັດຖະບານລຸກຊຳບວກ ເພີ່ມຂຶ້ນຈາກ 50 ລ້ານເອີໂຣ ໃນແຜນງານຮ່ວມມືຄັ້ງທີ່ 3 ( ICP3) ສຳລັບສົກປີ2011-2015 ມາເປັນ 75 ລ້ານໃນແຜນງານຮ່ວມມືຄັ້ງທີ່4 ( ICP4) ສຳລັບສົກປີ 2016-2020, ອັນເປັນການປະກອບສ່ວນເຂົ້າໃນການເສີມສ້າງສາຍພົວພັນມິດຕະພາບແລະການຮ່ວມມືອັນມີປະສິດທິຜົນລະຫວ່າງສອງປະເທດລາວແລະລາຊະອານາຈັກລຸກຊຳບວກໃຫ້ເຂັ້ມແຂງ ແລະຂະຫຍາຍຕົວຕະຫຼອດມາ.