ໃນວັນທີ 27 ກຸມພາ 2019, ກະຊວງການຕ່າງປະເທດ ໂດຍປະສານສົມທົບກັບ ແຂວງສາລະວັນ ໄດ້ຈັດກອງປະຊຸມເຜີຍແຜ່ ແລະ ຜັນຂະຫຍາຍຜົນກອງປະຊຸມສຸດຍອດ ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ (CLV) ຄັ້ງທີ 10 ແລະ ກະກຽມແຜນວຽກທີ່ສໍາຄັນ ສໍາລັບສົກປີ 2019 – 2020 ທີ່ ສະໂມສອນ ຂອງ ຫ້ອງວ່າການປົກຄອງແຂວງສາລະວັນ, ພາຍໃຕ້ການເປັນປະທານຮ່ວມຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ພູທົງ ຄຳມະນີວົງ, ຮອງເຈົ້າແຂວງສາລະວັນ, ໂດຍມີຜູ້ເຂົ້າຮ່ວມຈາກບັນດາຂະແໜງການທີ່ກ່ຽວຂ້ອງ ຂອງ 4 ແຂວງພາກໃຕ້ ຄື: ແຂວງສາລະວັນ, ແຂວງຈໍາປາສັກ, ແຂວງເຊກອງ ແລະ ແຂວງອັດຕະປື, ຈໍານວນ 100 ກ່ວາ ທ່ານ.
ໃນວັນທີ 20 ກຸມພາ 2019, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສ ອາຊຽນ-ລັດເຊຍ ຄັ້ງທີ 16 ທີ່ ບາຫຼີ, ອິນໂດເນເຊຍ ພາຍໃຕ້ການເປັນປະທານຮ່ວມ ຂອງ ທ່ານ ໂຮເຊ ທາວາເຣັສ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ອິນໂດເນເຊຍ ແລະ ທ່ານ ອີກໍ ມໍກູລອບ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສະຫະພັນ ລັດເຊຍ.
ໃນຕອນເຊົ້າຂອງວັນທີ 15 ກຸມພາ 2019, ຢູ່ທີ່ ກະຊວງການຕ່າງປະເທດ ໄດ້ມີພິທີລົງນາມໃນສັນຍາ ຮ່ວມມືໂຄງການກອງທຶນພິເສດ ແມ່ນ້ຳຂອງ-ແມ່ນ້ຳລ້ານຊ້າງ ປະຈຳ ປີ 2018 ລະຫວ່າງ ລັດຖະບານລາວ ແລະ ລັດຖະບານຈີນ. ໃນພິທີດັ່ງກ່າວ ຕາງໜ້າໃຫ້ແກ່ຝ່າຍລາວ ໂດຍແມ່ນ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ຈຽງຈາຍຕົງ, ເອກອັກຄະລັດທູດ ແຫ່ງ ສປ ຈີນ ປະຈຳ ສປປ ລາວ ຕາງໜ້າໃຫ້ຝ່າຍ ຈີນ ແລະ ມີຜູ້ຕາງໜ້າຈາກບັນດາ ກະຊວງ/ຂະແໜງການ ທີ່ກ່ຽວຂ້ອງ ຈຳນວນໜຶ່ງ ເຂົ້າຮ່ວມເປັນສັກຂີພະຍານ. ການລົງນາມໃນສັນຍາຮ່ວມມືໂຄງການໃນຄັ້ງນີ້ ແມ່ນ ເພື່ອເປັນການຈັດຕັ້ງຜັນ ຂະຫຍາຍຜົນກອງປະຊຸມລັດຖະມົນຕີຕ່າງປະເທດ ແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 4 ທີ່ຈັດຂຶ້ນຢູ່ ແຂວງ ຫຼວງພະບາງ ໃນເດືອນທັນວາ 2018, ຊຶ່ງກອງປະຊຸມ ດັ່ງກ່າວ ໄດ້ຮັບຮອງເອົາ ທັງໝົດ 138 ໂຄງການຂອງ 6 ປະເທດສະມາຊິກ (ກຳປູເຈຍ, ສປ ຈີນ, ສປປ ລາວ, ມຽນມາ, ໄທ ແລະ ຫວຽດນາມ), ໃນນັ້ນ, ສປປ ລາວ ໄດ້ຮັບຈຳນວນ 21 ໂຄງການ ລວມມູນຄ່າ 4,551,100 ໂດລາສະຫະລັດ, ຊຶ່ງປະກອບມີ 7 ກະຊວງ/ ຂະແໜງການ ຄື: ກະຊວງການຕ່າງປະເທດ, ກະຊວງ ສຶກສາທິການ ແລະ ກິລາ, ກະຊວງໄປສະນີ, ໂທລະຄົມ ມະນາຄົມ ແລະ ການສື່ສານ, ກະຊວງໂຍທາທິການ ແລະ ຂົນສົ່ງ, ກະຊວງວິທະຍາສາດ ແລະ ເຕັກໂນໂລຊີ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ກະຊວງກະສິກຳ ແລະ ປ່າໄມ້ ເພື່ອໃຫ້ແຕ່ລະພາກ ສ່ວນທີ່ໄດ້ຮັບໂຄງການ ນຳໄປສືບຕໍ່ຈັດຕັ້ງປະຕິບັດໃຫ້ເກີດຜົນ.
ໂຄງການກອງທຶນພິເສດແມ່ນໍ້າຂອງ-ແມ່ນ້ຳລ້ານຊ້າງ ເປັນໂຄງການທີ່ຢູ່ພາຍໃຕ້ ຂອບການຮ່ວມມືແມ່ນ້ຳ ຂອງ-ແມ່ນ້ຳລ້ານຊ້າງ, ຊຶ່ງກອງທຶນດັ່ງກ່າວ ໄດ້ຮັບການສ້າງຕັ້ງຂຶ້ນໃນໂອກາດກອງປະຊຸມຜູ້ນຳແມ່ນ້ຳຂອງ-ແມ່ນ້ຳ ລ້ານຊ້າງຄັ້ງທີ I ໃນປີ 2016 ທີ່ ເມືອງຊັນຢາ, ແຂວງໄຫໜານ, ສປ ຈີນ. ສຳລັບ ໃນປີ 2017, ສປປ ລາວ ໄດ້ຮັບທັງໝົດ ຈຳນວນ 13 ໂຄງການ ຊຶ່ງປະກອບມີ 5 ກະຊວງ/ຂະແໜງການ ລວມມູນຄ່າຫຼາຍກວ່າ 3 ລ້ານ ໂດລາສະຫະລັດ ແລະ ປະຈຸບັນກຳລັງຢູ່ ໃນຂັ້ນຕອນການຈັດຕັ້ງປະຕິບັດຕາມແຜນການທີ່ໄດ້ວາງໄວ້. ສ່ວນໂຄງ ການທີ່ໄດ້ຮັບອະນຸມັດໃນປີ 2018 ຈຳນວນ 21 ໂຄງການນັ້ນ ຈະໄດ້ຖືກຈັດຕັ້ງປະຕິບັດໃນປີ 2019.