ໃນວັນທີ່ 24 ທັນວາ 2021, ທີ່ສະຖານເອກອັກຄະລັດຖະທູດແຫ່ງສປປ. ລາວປະຈຳຣາຊະອານາຈັກໄທໄດ້ຈັດພິທີລົງນາມບົດບັນທຶກຄວາມເຂົ້າໃຈວ່າດ້ວຍການປຶກສາຫາລືທາງການເມືອງລະຫວ່າງກະຊວງການຕ່າງປະເທດແຫ່ງສາທາລະນະລັດປະຊາທິປະໄຕປະຊາຊົນລາວແລະກະຊວງການຕ່າງປະເທດແຫ່ງສາທາລະນະລັດໂຄລົມເບຍ.

ໃນພິທີລົງນາມດັ່ງກ່າວ, ຕາງໜ້າໃຫ້ກະຊວງການຕ່າງປະເທດສປປ. ລາວແມ່ນທ່ານແສງສຸຂະທິວົງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສປປ. ລາວປະຈຳຣາຊະອານາຈັກໄທແລະຕາງໜ້າໃຫ້ກະຊວງການຕ່າງປະເທດໂຄລົມເບຍແມ່ນທ່ານນາງແອນນາມາເຣຍເປຣຍໂຕອາແບດ (Ana Maria Prieto Abad), ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງໂຄລົມເບຍປະຈໍາສປປ. ລາວທີ່ມີສໍານັກງານຕັ້ງຢູ່ບາງກອກ, ຣາຊະອານາຈັກໄທ.

ສາທາລະນະລັດປະຊາທິປະໄຕປະຊາຊົນລາວແລະສາທາລະນະລັດໂຄລົມເບຍມີການພົວພັນແລະຮ່ວມມືກັນໃນລະດັບດີນັບແຕ່ໄດ້ສ້າງຕັ້ງສາຍ​ພົວພັນ​ການ​ທູດນຳກັນ ​ໃນວັນ​ທີ 30 ກັນຍາ 1988. ຜ່ານມາໂຄລົມເບຍກໍໄດ້ໃຫ້ຄວາມຊ່ວຍເຫຼືອສປປ. ລາວດ້ານການພັດທະນາຊັບພະຍາກອນມະນຸດໂດຍໄດ້ໃຫ້ທຶນຝຶກອົບຮົມດ້ານພາສາແອັດສະປາໂຍນໄລຍະສັ້ນໃຫ້ແກ່ພະນັກງານກະຊວງການຕ່າງປະເທດລາວແລະນັກສຶກສາພາກວິຊາພາສາແອັດສະປາໂຍນຂອງມະຫາວິທະຍາໄລແຫ່ງຊາດຜ່ານຂອບເວທີການຮ່ວມມືລະຫວ່າງພາກພື້ນອາຊີຕາເວັນອອກແລະອາເມລິກາລາຕິນ (FEALAC). ໃນປີ 2019 ກະຊວງການຕ່າງປະເທດສປປ. ລາວໄດ້ຮັບເອົາອາຈານອາສາສະໝັກສອນພາສາແອັດສະປາໂຍນຂອງໂຄລົມເບຍມາສອນຢູ່ລາວເປັນຄັ້ງທໍາອິດໂດຍແມ່ນສະຖາບັນການຕ່າງປະເທດເປັນຜູ້ຈັດຕັ້ງປະຕິບັດ.

     ການຮ່ວມລົງນາມບົດບັນທຶກຄວາມເຂົ້າໃຈກ່ຽວກັບການປຶກສາຫາລືທາງດ້ານການເມືອງລະຫວ່າງສອງກະຊວງການຕ່າງປະເທດລາວແລະໂຄລົມເບຍຈະເປັນກົນໄກສໍາຄັນໃຫ້ແກ່ການປຶກສາຫາລືແລະແລກປ່ຽນສະພາບການຕ່າງໆເພື່ອສົ່ງເສີມການພົວພັນຮ່ວມມືແລະການສະໜັບສະໜູນຊຶ່ງກັນແລະກັນໃນເວທີພາກພື້ນແລະສາກົນເພື່ອຜົນປະໂຫຍດຂອງທັງສອງຝ່າຍລາວແລະໂຄລົມເບຍໃນອານາຄົດ.

        ຕອນບ່າຍເວລາ 15:00 ໂມງ ຂອງວັນທີ່ 27 ທັນວາ 2021, ທ່ານ ພົນໂທ ສັນເສີນ ແກ້ວກໍາເນີດ, ຫົວໜ້າກົມປະຊາສໍາພັນ ພ້ອມດ້ວຍຄະນະ 6 ທ່ານ ໄດ້ເຂົ້າພົບທ່ານ ແສງ ສຸຂະທິວົງ, ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ຣາຊະອານາຈັກໄທ ທີ່ສະຖານທູດລາວ ເພື່ອມາຂໍໂທດກ່ຽວກັບການສະເໜີຂ່າວລົດໄຟຄວາມໄວສຸງ ລາວ-ຈີນ ຊຶ່ງສື່ຂອງສະຖານີວິທະຍຸ ໂທລະພາບ ແຫ່ງປະເທດໄທ (NBT) ໄດ້ອອກຂ່າວທີ່ຂາດຂໍ້ມູນຄວາມຈິງໃນວັນທີ່ 6 ທັນວາ 2021 ທີ່ຜ່ານມາໃນລາຍການ “ຟັງຊັດໆ ຖະໜອມຈັດໃຫ້” ຂອງທ້າວ ຖະໜອມ ອ່ອນເກດພົນ ໄດ້ນໍາສະເໜີຂ່າວທີ່ບໍ່ມີມູນຄວາມຈິງ ເຮັດໃຫ້ເຂົ້າໃຈວ່າ ລັດຖະບານລາວບໍ່ສາມາດໄຊ້ໜີ້ຈີນໄດ້ ຈາກການກູ້ຢືມເງີນມາລົງທຶນສ້າງທາງລົດໄຟອັນມະຫາສານ ແລະ ຍັງດູໝິ່ນຄົນລາວວ່າບໍ່ສາມາດຂີ່ລົດໄຟໄດ້ຍ້ອນປີ້ລົດໄຟແພງກວ່າລາຍຮັບຂອງພົນລະເມືອງລາວ.

          ໃນການເຂົ້າພົບເພື່ອຂໍໂທດ, ທ່ານ ພົນໂທ ສັນເສີນ ແກ້ວກໍາເນີດ ໄດ້ກ່າວສະແດງຄວາມເສຍໃຈຕໍ່ຄວາມຜິດພາດໃນການອອກຂ່າວຄັ້ງນີ້, ເຊິ່ງເພີ່ນເອງໃນນາມຜູ້ບັງຄັບບັນຊາໂດຍກົງຂອງໂທລະພາບຊ່ອງ NBT ໄດ້ຂໍໂທດທ່ານທູດ ແລະ ປະຊາຊົນລາວ ແລະ ຍອມຮັບວ່າເຄີຍເກີດມີຄວາມຜິດພາດໃນການສະເໜີມາແລ້ວເທື່ອໜຶ່ງ, ໂດຍຕອນນັ້ນໄດ້ມີຈົດໝາຍຂໍໂທດເປັນທາງການວ່າຈະບໍ່ໃຫ້ມີເຫດການເກີດຂື້ນອີກ ແຕ່ມາເທື່ອນີ້ໂທລະພາບ NBT ກໍໄດ້ສະເໜີຂ່າວຜິດພາດອີກຄັ້ງໜຶ່ງ. ສະນັ້ນຄັ້ງນີ້ຈຶ່ງໄດ້ນໍາພາຄະນະຜູ້ບໍລິຫານ ແລະ ນັກຂ່າວມາຂໍໂທດທີ່ສະຖານທູດໂດຍກົງ ເພື່ອສະແດງຄວາມຈິງໃຈ ແລະ ສໍານຶກໃນຄວາມຜິດທີ່ເກີດຂື້ນ ແລະ ຫວັງຢ່າງຍິ່ງວ່າຈະໄດ້ຮັບການອະໄພຈາກປະຊາຊົນລາວ ພ້ອມທັງຮັບປາກຢ່າງໜັກແໜ້ນວ່າ ຈະບໍ່ໃຫ້ເຫດການລັກຊະນະນີ້ເກີດຂື້ນອີກ. ພ້ອມດຽວກັນນີ້, ທ່ານພົນໂທ ສັນເສີນ ໄດ້ໃຫ້ທ້າວ ຖະໜອມ, ນັກຂ່າວຊ່ອງ NBT ກ່າວຄໍາຂໍໂທດດ້ວຍຕົນເອງຕໍ່ທ່ານທູດ ແລະ ປະຊາຊົນລາວ ແລະ ຜູ້ກ່ຽວໄດ້ເອົາພວງມະໄລກາບຂໍໂທດໂດຍກົງຕໍ່ທ່ານທູດ ແລະ ປະຊາຊົນລາວທັງຊາດ ແລະ ຫວັງວ່າປະຊາຊົນລາວຈະໃຫ້ອະໄພຕົນຕໍ່ຄວາມຜິດພາດໃນຄັ້ງນີ້.

          ຫຼັງຈາກນັ້ນ, ທ່ານທູດ ແສງ ໄດ້ຮັບຊາບຄໍາຂໍໂທດດັ່ງກ່າວ ໂດຍຈະນໍາເອົາການຂໍໂທດຄັ້ງນີ້ ແຈ້ງໃຫ້ປະຊາຊົນຮັບຊາບ, ເຊິ່ງທ່ານທູດເຊື່ອໝັ້ນວ່າປະຊາຊົນລາວຜູ້ມີຈິດໃຈໂອບເອື້ອອາລີ ຈະໃຫ້ອະໄພໃນຄວາມຜິດພາດຄັ້ງນີ້ ແລະ ສະແດງຄວາມຫວັງວ່າຈະບໍ່ເກີດຄວາມຜິດພາດໃນລັກຊະນະນີ້ເກີດຂື້ນອີກ. ໃນໂອກາດນີ້ ທ່ານທູດ ໄດ້ເໜັ້ນໃຫ້ເຫັນເຖິງຄວາມສໍາພັນ ລາວ-ໄທ ທີ່ເປັນເພື່ອນບ້ານໃກ້ຄຽງ ທີ່ມີຮີດຄອງປະເພນີ, ວັດທະນະທໍາ ແລະ ພາສາປາກເວົ້າ ທີ່ຄ້າຍຄືກັນ. ພ້ອມນີ້ ທ່ານທູດຍັງໄດ້ກ່າວຕື່ມວ່າ ຕໍ່ໜ້າຫາກມີບັນຫາບໍ່ເຂົ້າໃຈ ຫຼື ຕ້ອງການຂໍ້ມູນລະອຽດ ກໍຂໍໃຫ້ຕິດຕໍ່ປະສານມາຍັງສະຖານທູດເພື່ອຂໍຂໍ້ມຸນຂ່າວສານທີ່ຖຶກຕ້ອງຕາມຄວາມເປັນຈິງ ເພື່ອສະເໜີຂ່າວທີ່ເຮັດໃຫ້ສັງຄົມຮັບຮູ້ ແລະ ມີຄວາມເຂົ້າໃຈທີ່ຖຶກຕ້ອງ.

          ທ່ານທູດ ຍັງໄດ້ຍົກໃຫ້ເຫັນຄວາມໝາຍຄວາມສໍາຄັນຂອງໂຄງການລົດໄຟຄວາມໄວສູງ ລາວ-ຈີນ ທີ່ເປັນເສັ້ນທາງປະຫວັດສາດ ແລະ ແມ່ນເສັ້ນທາງທໍາອິດສໍາລັບປະຊາຊົນລາວ. ປະຊາຊົນລາວ ມີຄວາມພາກພູມໃຈໃນການເປີດການນໍາໃຊ້ລົດໄຟຄວາມໄວສູງດັ່ງກ່າວ, ເຊິ່ງໂຄງການນີ້ ແມ່ນເພື່ອຜົນປະໂຫຍດຂອງປະຊາຊົນລາວ, ປະຊາຊົນປະເທດເພື່ອນບ້ານ, ປະເທດອາຊຽນ ແລະ ພາກພື້ນໃນອານາຄົດ.

          ສຸດທ້າຍນີ້, ທ່ານທູດ ໄດ້ເໜັ້ນຄືນຈຸດຢືນຂອງລັດຖະບານ ສປປ. ລາວ ຍາມໃດ ກໍພະຍາຍາມເສີມຂະຫຍາຍ ສາຍພົວພັນມິດຕະພາບຖານບ້ານໃກ້ເຮືອນຄຽງທີ່ດີນໍາກັນຂອງສອງປະເທດ ໃຫ້ນັບມື້ຈະເລີນກ້າວໜ້າ, ເຊິ່ງຕົນເອງໃນນາມທູດ ຈະທຸ້ມເທເຫື່ອແຮງສືບຕໍ່ຊຸກຍູ້ການພົວພັນ ແລະ ການຮ່ວມມືຂອງສອງປະເທດ ໃຫ້ຈະເລີນງອກງາມຍິ່ງໆຂື້ນ.

ໃນຕອນເຊົ້າຂອງວັນທີ 20 ທັນວາ 2021, ທ່ານ ກິ່ງໂພແກ້ວ ພົມມະຫາໄຊ, ຫົວຫນ້າກົມເສດຖະກິດ, ຫົວຫນ້າເຈົ້າຫນ້າທີ່ອາວຸໂສຂອບການຮ່ວມມືແມ່ນໍ້າຂອງ-ຍີ່ປຸ່ນ ໄດ້ນຳພາຄະນະຜູ້ແທນ ແຫ່ງ ສປປ ລາວ ເຂົ້າຮ່ວມກອງປະຊຸມເຈົ້າຫນ້າທີ່ອາວຸໂສຂອບການຮ່ວມມືແມ່ນໍ້າຂອງ-ຍີ່ປຸ່ນ (ໃນຮູບແບບກອງປະຊຸມທາງໄກ), ພາຍໃຕ້ການເປັນປະທານຂອງ ທ່ານ ກາໂນະ ທາເກຮີໂຣະ, ຜູ້ຊ່ວຍລັດຖະມົນຕີ, ຫົວໜ້າກົມອາຊີຕາເວັນອອກສຽງໃຕ້ ແລະ ຕາເວັນຕົກສຽງໃຕ້. ຈຸດປະສົງຂອງກອງປະຊຸມແມ່ນເພື່ອປຶກສາຫາລືທົບທວນຄືນຄວາມຄືບຫນ້າຂອງການຮ່ວມມືໃນໄລຍະຜ່ານມາ ເປັນຕົ້ນແມ່ນການຈັດຕັ້ງປະຕິບັດບັນດາໂຄງການ ແລະ ແຜນງານ ພາຍໃຕ້ຍຸດທະສາດໂຕກຽວ 2018 (Tokyo Strategy 2018) ແລະ ແຜນການຮ່ວມມືໃນຕໍ່ໜ້າ ເຊິ່ງຈະໄດ້ມີການປັບປຸງຍຸດທະສາດໂຕກຽວສະບັບໃຫມ່ ແລະ ການກະກຽມໃຫ້ແກ່ການເຂົ້າຮ່ວມກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ຄັ້ງທີ 13 ທີ່ມີແຜນຈະຈັດຂື້ນໃນປີ 2022, ທີ່ ປະເທດຍີ່ປຸ່ນ. ກອງປະຊຸມຄັ້ງນີ້ ສປປ ລາວ ໄດ້ສະເໜີໃຫ້ບັນດາປະເທດສະມາຊິກແມ່ນໍ້າຂອງ ແລະ ຍີ່ປຸ່ນ ເພີ່ມທະວີການຮ່ວມມື ໂດຍສຸມໃສ່ການຟື້ນຟູເສດຖະກິດພາຍຫຼັງການແຜ່ລະບາດຂອງພະຍາດໂຄວິດ 19, ການແລກປ່ຽນຂໍ້ມູນຂ່າວສານໂດຍສະເພາະໃນຂະແໜງສາທາລະນະສຸກ, ການສົ່ງເສີມການນໍາໃຊ້ເຕັກໂນໂລຊີ ແລະ ນະວັດຕະກຳເຂົ້າໃນຂົງເຂດເສດຖະກິດ ເພື່ອສົ່ງເສີມບັນດາຫົວໜ່ວຍທຸລະກິດ ທັງຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ຂະຫນາດກາງໃຫ້ມີຄວາມເຂັ້ມແຂງຍິ່ງຂຶ້ນ. ພ້ອມດຽວກັນນັ້ນ, ໃນວັນດຽວກັນ ທ່ານ ກິ່ງໂພແກ້ວ ພົມມະຫາໄຊ, ກໍ່ໄດ້ເຂົ້າຮ່ວມພິທີເປີດກອງປະຊຸມເວທີສໍາມະນາເປົ້າຫມາຍການພັດທະນາແບບຍືນຍົງແມ່ນໍ້າຂອງ-ຍີ່ປຸ່ນ ຄັ້ງທີ 1 (The First Mekong-Japan SDGs Forum), ຈຸດປະສົງແມ່ນເພື່ອສຸມໃສ່ດຳເນີນການຈັດຕັ້ງປະຕິບັດຂໍ້ລິເລີ່ມເປົ້າຫມາຍການພັດທະນາແບບຍືນຍົງ (SDGsInitiative) ຮອດປີ 2030 ພາຍໃຕ້ຂອບການຮ່ວມມືແມ່ນໍ້າຂອງ-ຍີ່ປຸ່ນ ເພື່ອວາງແຜນກ້າວໄປສູ່ການພັດທະນາສີຂຽວໃນພາກພື້ນແມ່ນໍ້າຂອງໃນອະນາຄົດ.